Ésaïe 63:1-19
63 Zo wa la alondo na Édom+ si ayeke ga so?
Zo wa la alondo na Bozrah+ si ayeke ga, na lo yü bongo ti anzoroko nde nde so aza zango so?*
Bongo ti lo ayeke pendere mingi;lo yeke tambela na ngangu ngangu ti ga.
Lo tene: “A yeke mbi, mbi so mbi yeke sara tënë ti ye so ayeke na lege ni,mbi so mbi yeke na kota ngangu ti sö azo.”
2 Bongo ti mo abe bengo ngbanga ti nyen?
Ngbanga ti nyen bongo ti mo akpa ti zo so ayeke dö yâ ti alê ti vigne na ndo ti sarango vin?+
3 Lo tene: “Gï mbi oko la mbi dö yâ ti alê ti vigne ni.
Na popo ti azo, mbeni zo ti ga na terê ti mbi ayeke dä pëpe.
Na yâ ti ngonzo ti mbi, mbi ngbâ ti dö yâ ti ala;+na yâ ti kota ngonzo ti mbi, mbi ngbâ ti dö yâ ti ala.
Mênë ti ala atï na terê ti bongo ti mbi kirikiri,na a buba bongo ti mbi kue.
4 Mbi mû desizion ti ga na mbeni lango so na yâ ni mbi yeke kiri na azo peko ti sioni so ala sara;+nga, so ayeke ngu ti tene mbi futa mbeni ye ti zi azo ti mbi la.
5 Mbi bâ ndo, me mbeni zo ti mû maboko na mbi ayeke dä pëpe;bê ti mbi ason ngangu so mbeni zo amû mbage ti mbi pëpe so.
Ni la maboko ti mbi wani aga na salut,*+nga ngonzo ti mbi ayeke mû ngangu na mbi.
6 Na ngoi so ngonzo asara mbi, mbi dö yâ ti azo.
Kota ngonzo ti mbi asara si ala ga tongana azo so asoulé,+na mbi tuku mênë ti ala na sese.”
7 Mbi yeke sara tënë ti aye so Jéhovah asara ti fa tâ ndoye ti lo,aye so Jéhovah asara so alingbi ti tene a gonda ni.
Mbi yeke sara tënë ni ndali ti anzoni ye kue so Jéhovah asara ndali ti e,+gbâ ti anzoni ye so lo sara ndali ti ahale ti Israël,a lingbi na nzoni bê ti lo nga na tâ ndoye ti lo so ayeke kota mingi.
8 Lo tene: “Ti tâ tënë ni, ala yeke azo ti mbi, amolenge ti mbi so ayeke dö mbi ti zia lâ oko pëpe.”*+
Ni la lo ga Sauveur ti ala.+
9 Na ngoi kue so ala yeke na yâ ti ye ti vundu, a sara lo vundu,+nga watokua ti lo wani* la asö ala.+
Ndoye so lo yeke na ni nga bango mawa ti zo apusu lo ti futa mbeni ye ti zi ala;+na yâ ti angoi kue so ahon ândö, lo mû ala na nduzu na lo yô ala.+
10 Me ala sara kpengba-li na lo+ nga ala mû vundu na yingo vulu ti lo.+
Fadeso lo ga wato ti ala,+na lo ga na bira na terê ti ala.+
11 Na pekoni, ala dabe ti ala na ngoi ti giriri,ngoi ti wakua ti lo Moïse, na ala tene:
“Lo so amû azo nga na aberger so afa lege na ataba ti lo+ lani si lo sigi na ala na yâ ti kota ngu-ingo so,+ lo yeke na ndo wa?
Zo so azia yingo vulu ti lo na ndö ti lo ayeke na ndo wa?+
12 Zo so asara si maboko ti lo so ayeke na gloire ague oko na maboko ti Moïse ti koli ayeke na ndo wa?+
Zo so asuru yâ ti angu na devant ti azo ni+ti sara si azo agirisa iri ti lo lâ oko pëpe, lo yeke na ndo wa?+
13 Lo sara si ala tambela na popo ti angu so asua na ngangu,*si ala tambela me ala pika gere ti ala pëpetongana mbarata so ayeke kpe na yâ ti kota kpangbala ndo.* Lo yeke na ndo wa?
14 Legeoko tongana nyama so ague na yâ ti popo-hoto ti wu terê ti lo,yingo ti Jéhovah asara si ala wu terê ti ala.”+
A yeke tongaso la mo fa lege na azo ti mo,ti sara si iri ti mo aga kota.*+
15 Mo so mo yeke kâ na yayu,mo so mo yeke kâ na ndo ti duti ti mo so ayeke na nduzu mingi, so ayeke nzoni-kue na so asi singo na gloire,* bâ ndo na sese na mo bâ ye.
Kota nzara ti mo ti sara ye nga na ngangu ti mo ayeke na ndo wa?
Bango mawa ti zo+ nga na nzoni bê so apusu mo ti sara ye ayeke na ndo wa?+
Mo gbanzi ni na mbi awe.
16 Mo yeke Babâ ti e.+
Atâa so Abraham ahinga e pëpe,nga Israël ahinga e tongana amolenge ti lo pëpe,mo Jéhovah, mo yeke Babâ ti e.
Ngbene ye ândö la mo yeke Zo so ayeke futa ye ti zi e.+
17 Jéhovah, mo zia* e tambela kirikiri, yongoro na lege ti mo ngbanga ti nyen?
Mo zia* si bê ti e akpengba si e kpe mbeto ti mo pëpe ngbanga ti nyen?+
Kiri na mbage ti e, ndali ti so e yeke awakua ti mo,amara so ayeke ye ti mo.+
18 Teti kete ngoi, azo ti mo so ayeke nzoni-kue asara kodro na sese so mo mû na ala.
Awato ti e atambela na yâ ti ndo ti mo so ayeke nzoni-kue.+
19 A ninga mingi awe la e ga tongana azo so mo komande na ndö ti ala lâ oko pëpe,nga tongana azo so iri ti mo ayeke na ndö ti ala lâ oko pëpe.
Akete tënë na terê ni
^ A lingbi nga ti tene “bongo so abe ngangu.”
^ Wala “asara si mbi sö benda.”
^ Wala “ayeke handa mbi pëpe.”
^ Wala “ange so aluti na gbele lo.”
^ Wala “alï ngangu.”
^ Wala “benyama.”
^ Wala “pendere.”
^ Wala “ayeke pendere mingi.”
^ Wala “sara si.”
^ Na Hébreu: “sara.”
