Igihe utanguye kubana n’uwo mwubakanye, haraduka ingorane zitandukanye. Zoshobora kuva ku kuba mutandukanye mu kuntu mwiyumvira, ukuntu mwiyumva canke ukuntu muvyifatamwo mu buzima bivanye n’ivyo mwakuriyemwo. Zoshobora kandi guterwa n’ibintu bitabavuyeko canke mutari mwiteze.

Hari aho mwokwiyumvira kwirengagiza izo ngorane, mugabo Bibiliya iduhanura gutorera umuti ingorane dufise. (Matayo 5:23, 24) Uburyo bwiza kuruta ubundi bwo gutorera umuti ingorane zanyu ni ugukurikiza ingingo ngenderwako zo muri Bibiliya.

ICO BIBILIYA IBIVUGAKO: Hariho “igihe co kuvuga.” (Umusiguzi 3:1, 7) Nimufate umwanya muyage ivy’iyo ngorane. Nubwize ukuri uwo mwubakanye, amenye ico wiyumvira n’ingene wiyumva ku bijanye n’ico kibazo. Niwame ‘uvugana ukuri’ n’uwo mwubakanye. (Abanyefeso 4:25) Naho muri ico kiyago hogira ikikubabaza canke ikigushavuza, niwirinde guhazuka. Kwishura utekanye birashobora gutuma ikiyago kidahinduka uguterana amajambo kandi cari gikwiye kuba igisanzwe.—Imigani 15:4; 26:20.

Bishitse ntimuhuze, nugumane ubuntu kandi ntiwibagire kugaragariza uwo mwubakanye urukundo n’icubahiro. (Abakolosayi 4:6) Nimugerageze gutorera umuti ingorane mu maguru masha, kandi ntimureke kuvugana.—Abanyefeso 4:26.

ICO MWOKORA:

• Nimuvugane umwanya ubereye mwoganira iyo ngorane

• Hageze ko utega ugutwi uwo mwubakanye, niwirinde kumuciramwo. Uraza kuvuga niwaramukirwa

ICO BIBILIYA IBIVUGAKO: “Mugiriranire ikibabarwe. Mu vyo guterana iteka mube aba mbere.” (Abaroma 12:10) Uburyo wumviriza burahambaye cane. Nugerageze gutahura iciyumviro c’uwo mwubakanye ubigiranye ‘impuhwe n’ukwicisha bugufi.’ (1 Petero 3:8; Yakobo 1:19) Ntumere gusa nk’uwuteze ugutwi. Igihe bishoboka, nubanze uhagarike ivyo uriko urakora maze utege yompi uwo mwubakanye ata kigusamaza, canke umubaze nimba mwobiyaga hanyuma. Niwabona uwo mwubakanye nk’umuntu musangiye urugamba aho kumubona nk’uwukurwanya, “[ntuzokwihutira] kubabara mu mutima wawe.”— Umusiguzi 7:9.

ICO WOKORA:

• Nugume uteze ugutwi uwo mwubakanye n’umutima ukunze, naho ivyo ariko aravuga vyoba bitaguhimbara

• Nugerageze gutahura ico ashaka kuvuga. Niwitegereze ibimenyetso vy’umubiri agira, wumvirize n’ijwi akoresha

ICO BIBILIYA IBIVUGAKO: “Ubwoko bwose bw’ubucumukure burazana akarusho, mugabo ijambo ry’iminwa gusa riganisha ku bukene.” (Imigani 14:23) Kuba mwavuganye uburyo bwiza bwo gutorera umuti ingorane ntibihagije. Mukwiye guca mushira mu ngiro ingingo mwashitseko. Hari igihe ivyo vyosaba akigoro gakomeye, mugabo bizovamwo ivyiza. (Imigani 10:4) Nimwasenyera ku mugozi umwe, akigoro muzoba mwagize kazovamwo “impera nziza.”—Umusiguzi 4:9.

ICO MWOKORA:

• Nimuvugane ibintu bifadika umwe wese azokora kugira mutorere umuti ingorane mufise

• Nimuze muracishamwo musuzuma aho mubigejeje