Ego, izoyishura. Bibiliya be n’ivyama vyabaye mu buzima bwa misi yose birerekana ko Imana yishura amasengesho. Ku vyerekeye Imana, Bibiliya ivuga iti: ‘Icipfuzo c’abayitinya izogishitsa, kandi izokwumva ugutabaza kwabo, ibakize.’ (Zaburi 145:19) Ariko kugira Imana yishure amasengesho yawe canke ntiyishure, ahanini bivana na wewe.

Ivyo Imana ibona ko bihambaye

•   Gusenga Imana, atari ugusenga Yezu, Mariya, aberanda, abamarayika canke ibishushanyo. Yehova Imana ni we wenyene ‘yumva amasengesho.’​—Zaburi 65:2.

•   Gusenga mu buryo buhuye n’ivyo Imana igomba canke isaba biri muri Bibiliya.​—1 Yohani 5:14.

•   Gusenga mw’izina rya Yezu, umuntu akaba yerekanye ko yemera ubukuru Yezu afise. Yezu yavuze ati: “Nta wuza kuri Data adaciye kuri jewe.”.​—Yohani 14:6.

•   Gusengana ukwizera, umuntu agasaba kwongerezwa ukwizera nimba bikenewe.​—Matayo 21:22; Luka 17:5.

•   Kwicisha bugufi no kuba inziraburyarya. Bibiliya ivuga iti: “Yehova ari hejuru, yamara arabona uwuciye bugufi.”​—Zaburi 138:6.

•   Guhozako. Yezu yavuze ati: “Mugume musaba, muzohabwa.”​—Luka 11:9.

Ivyo Imana ibona ko bidahambaye

•   Ubwoko bwawe canke ubwenegihugu ufise. “Imana [ntigira] nkunzi, mugabo mw’ihanga iryo ari ryo ryose umuntu ayitinya kandi agakora ivy’ubugororotsi iramwemera.”​—Ivyakozwe 10:34, 35.

•   Kuba wifashe mu buryo bunaka. Urashobora gusenga Imana wicaye, wunamye, upfukamye canke uhagaze.​—1 Ngoma 17:16; Nehemiya 8:6; Daniyeli 6:10; Mariko 11:25.

•   Gusenga uvuga canke usengera mu mutima. Imana irishura n’amasengesho umuntu asengeye mu mutima.​—Nehemiya 2:1-6.

•   Ivyo uyibwira vyaba bikomeye canke bisanzwe. Imana ituremesha iti: “Muterere amaganya yanyu yose kuri yo, kuko ibababara.”​—1 Petero 5:7.