О Иисусо ԥэндя: «О народо ваздэлапэ против народо, царство против царство, авэла фартэ тэ тинойпэ и ԥув и андэ ек ҭан и андэ авэр ҭана авэла боқалимос и насвалимос, саво йто розжалпэ» (Луки 21:10, 11). Сар кай о отпечатко по най исин рисунко, саво будэр никастэ нинай, кадя и вся, со терэлпэ андэ люма, сыкавэл кати пэ ек признако. И сар лэ манушэско отпечатко по най поможый тэ уӷанэн, ко во сыно, кадя и вся, со терэлпэ андэ люма важ ек время, поможый точно тэ полас, кай «лэ Дэвлэско Царство пашэ». Терэлпэ ли кода, пала со ԥэндя о Иисусо, андэ ек время и па вся и ԥув? Давайте диқаса.

1. ВОЙНЫ

Андо 1914 бэрш жыля и война, сави сас май бари анда всаворэ, савэ слинэ жы каринг латэ. И учони мануша часто ԥэнэн, кай андо 1914 бэрш вся паруделя, важ кода кай жыля и пэрво мирово война. Андэ кадэя война, сар никала, слинэ фартэ бут танкоря, авиабомбы, пулемёторя, ядовито ӷазо и авэр оружыя, сави умарэл. Посли пэрво мирово война сас дуйто мирово война, андэ сави пэрво разо сшутэ и ядерни бомбы. Анда 1914 бэрш андэ разни ҭана пэ ԥув вся и время жан и войны. Важ кадэла бэрша андэ войны помулинэ милионоря мануша.

2. ЗЕМЛЕТРЯСЕНИИ

Сар пистромэ андэ «Британско инцыклапедия», кажно бэрш терэнпэ варикай 100 барэ землетрясении, савэ анэн баро ущербо (Britannica Academic). И учони мануша андэ США, савэ диқэн пала Ԥув анда 1900 бэрш, ԥэнэн, кай кажно бэрш авэла варикай 16 барэ землетрясении. Варико можэт тэ гиндой, кай и землетрясении на ашэлэ май бут, ай просто и мануша линэ через и прибороря май бут тэ уӷанэн пала землетрясении. Но па чачимастэ, и барэ землетрясении, савэ терэнпэ па вся и ԥув, анэн биды и смэрть, сар никала.

 3. БОҚАЛИМОС

Па вся и ԥув о боқалимос через и войны, через кода, кай и мануша подтинэн ек еқэс, через о кризисо лэ ловэнца и кай найлашо уражаё. И всемирно помощь лэ хамаса анда ООН ԥэнэн, кай андо 2018 бэрш па вся и ԥув о боқалимос сас кай 821 милионоря мануша, ай кай 124 милионоря андар лэндэ сас баро боқалимос. Кода, кай на дохан, када ек анда причины, васо кажно бэрш мэрэн май бут чем 3 милионоря бэятцэ. Анда бэятцэ, савэ мулинэ андо 2011 бэрш, почти епаш мулинэ лэ боқалимастар.

4. НАСВАЛИМОС И ЭПИДЕМИИ

Акэ со пистросардя и Всемирно арӷанизацыя, сави диқэл пала лэ манушэско зор: «Важ послидни 20 бэрш и мануша ужэ диқлэ дэсавэ барэ эпидемии. Рисайля кацаво насвалимос, сар холера, чума и жолто лихорадка. Кадяжэ появисайля нэво насвалимос, сар атипично пневмония (ТОРС), пандемическо гриппо, ближневосточно респираторно синдромо (БВРС), вирусо Эбола и вирусо Зика». Хоть и врачоря и учони бут ӷанэн пала насвалимос, лэндэ на вижал тэ виарақэн драб всаворэ насвалимастар.

5. ПА ВСЯ И ԤУВ РОСԤЭНЭН И ЛАЩИ НОВОСТЬ

Кала о Иисусо дэлас дума пэстирэ учениконэнца пала время, кала трэбуй тэ авэл о Царство, во ԥэндя ек маменто: «Кадэя лащи весть пала царство росԥэнэна па вся и ԥув, кай тэ уӷанэн всаворэ народоря, и тоди авэла конец» (Матфея 24:14). Андэ люма терэнпэ барэ биды, но андэ кадэя время май бут чем 8 милионоря мануша анда всаворэ народоря росԥэнэн и лащи новость пала лэ Дэвлэско Царство андэ 240 страны и тиритории май бут чем пэ 1000 шыба. Кацаво инке никала на сас андэ люма!

Всаворэ кадэла маменторя, пала савэ дя дума о Иисусо, точно сыкавэн пэ амари время. Васо амэнди када трэбуй тэ ӷанас? Важ кода кай о Иисусо ԥэндя: «Кала диқэна, кай када вся терэлпэ, ӷанэн, кай лэ Дэвлэско царство пашэ» (Луки 21:31).

Если драго тэ роздиқас кода, со ԥэндя о Иисусо важ кадэя время, ай кадяжэ кода, со пистромэ андэ Библия, драго дицол, кай о Дэл стодя пэско Царство по нэбо андо 1914 бэрш *. Тоди о Дэл дя пэстирэ шавэсти лэ Иисусости Христости царско власть (Псалом 2:2, 4, 6—9). Йто лэ Дэвлэско Царство лэла тэ правий ла ԥувьяса и улэла всаворэ лэ манушэндирэ правительства. Кала правия о Царство, и ԥув авэла раё, андэ саво и мануша лэна тэ жувэн вечно.

Ашэляпэ набут тэ аштярас, кала и алава анда лэ Иисусостири молитва исполняца: «Мэк авэл тиро царство. Мэк тири воля авэла и пэ ԥув, сар по нэбо» (Матфея 6:10). Сави дила терэл лэ Дэвлэско Царство кодэла времятар, кала ля тэ правий андо 1914 бэрш? Со амэн аштярэл, кала во авэла тэ правий всаворя ԥувьяса?