Лащи новость лэ Матфеёстар 24:1-51
24 Кала о Иисусо вижалас анда храмо, каринг лэстэ пашэлэ лэстирэ ученикоря, кай тэ сыкавэн лэсти вся о храмо.
2 Ай во ԥэндя лэнди: «Диқэн вся када? Ԥэнав тумэнди чачимос: катэ нисо на ашэлапэ, вся авэла розмардо».
3 Кала во сас по Аливкаво плай, и ученикоря пашэлэ каринг лэстэ и пушлэ: «Ԥэн амэнди, кала када авэла и со сыкавэла, кай ту рисайлян и кай пашэлэ и послидни деса кадэла люмати*?»
4 О Иисусо ԥэндя лэнди: «Диқэн, кай тумэн нико тэ на обдилярэл,
5 важ кода кай бут ко авэна и ԥэнэна пэр пэстэ: „Мэ Христос“ — и бутэн кадэлэса дилярэна.
6 Тумэ ашунэна пала война, сави жала андэ разни ҭана. На даран, важ кода кай вся када трэбуй тэ терэлпэ, но када инке на сыкавэл, кай и время пашэля.
7 О народо дэла пэ авэр народо, и о царство — пэ авэр царство, и андэ разни ҭана авэла боқалимос и землетрясении.
8 Вся када сыкавэл, кай и ԥари время кати залэлпэ*.
9 Тоди тумэн лэна тэ ӷонин и тэ умарэн, и всаворэ народоря лэна тэ вэрыцын тумэн через мэрно алав.
10 Андэ кодэя время бут мануша хасарэна и вера андо Дэл и лэна тэ придэн и тэ вэрыцын ек еқэс.
11 Авэна бут хохавнэ пророкоря*, савэ бутэн обдилярэна,
12 и кодэлэстар, кай андэ люма ашэла май бут найлашымос, фартэ бут мануша парашэна тэ любин аврэн.
13 Но ко вся виритярэла*, спасыяпэ.
14 Па вся и ԥув росԥэнэна и лащи новость пала Царство, кай ла тэ ашунэн всаворэ народоря, и тоди поджала и время кадэла люмати.
15 Кала тумэ диқэна, кай о гряцымос, саво анэн шушымос, — пала со ԥэнэнас о пророко Даниило — тердёл по свынто ҭан (мэк полэл, ко адиной*),
16 тоди кодэла, ко андэ Иудея, мэк нашэн андэ плая.
17 Кодэва, ко пэ крыша, на трэбуй тэ змэкэлпэ, кай тэ лэл варисо анда цэр.
18 Кодэва, ко пэ мал, на трэбуй тэ рийпэ пала пэстири ӥда.
19 Сар дэ ԥарэс авэла андэ кодэла деса лэ жувлянди, савэ аштярэн бэятос, и лэ манушнянди, савэ праварэн лэ колинэса!
20 Мангэнпэ, кай тумэнди тэ на прижалпэ тэ нашэн ӥвэндэ или в суботу,
21 важ кода кай тоди авэла бари бида, сави на сас кодэла времятар, сар появисайля и люма, жы каринг амари время и будэр никала на авэла.
22 И если о Дэл на стерэла кодэла деса* май скурти, тоди нико на спасыяпэ, но важ пэстирэ мануша, савэн во витидя, кодэла деса во стерэла май скурти.
23 Если тоди тумэнди ԥэнэна: „О Христос катэ!“ или „Во котэ!“ — на́ патян кадэлэсти.
24 Важ кода кай авэна хохавнэ мануша, савэ ԥэнэна пэр пэстэ лэ Христоско алав, и авэна хохавнэ пророкоря, савэ терэна барэ чудеса, кай тэ обдилярэн лэ Дэвлэстирэ манушэн, савэн во витидя.
25 Мэ май данглал ԥэнав тумэнди пала када.
26 Важ када, если тумэнди ԥэнэна: „Во андэ пустыня“, — на́ жан интя. И если тумэнди ԥэнэна: „Во андо цэр*“. — на́ патян кадэлэсти.
27 Важ кода кай кала рияпэ лэ манушэско Шаво, када авэла сар молния, сави дэлдап по востоко, но дицол аж по западо.
28 Кай авэла трупо, котэ стидэнапэ и орлоря.
29 Сразу жэ посли бида, сави авэла андэ кадэла деса, о қам тэмноя, и луна парашэла тэ свитийпэ, па нэбо пэрэна и звёзды и о нэбо затинояпэ.
30 Тоди по нэбо авэла знако лэ манушэстирэ Шавэстар и всаворэ народоря ла бидатар марэна пэс андо колин. Вонэ додиқэна лэ манушэстирэ Шавэс, саво жала па тучи*. Лэнди дицола, саво дэ баро лэстэ зор и сави дэ бари бах лэстар марэл.
31 Кала ашундёла ӷромко звуко ла трубатар, во бишалэла лэ анӷелонэн, кай вонэ тэ стидэн кодэлэн, кас во витидя, па штар ла люматирэ краёря, еқэ краёстар по нэбо жы каринг авэр краё.
32 Погиндон пала инжыро. Кала пэ лэстирэ тэрнорэ и ковлэ виточки появинпэ листоря, тумэ полэн, кай ӥто авэла о милай.
33 Точно кадя жэ, кала тумэ диқэна вся када, ӷанэн, кай лэ манушэско Шаво пашэ, паша двэри.
34 Ԥэнав тумэнди чачимос: на прожала кадэлэ манушэндири время*, сар вся када авэла.
35 Стрияпэ о нэбо и ԥув, но мэрнэ алава ашэнапэ.
36 Нико на ӷанэн, кала авэла кадэва дес и часо: ни ек анӷело по нэбо, ни о Шаво — када ӷанэн ек о Дад.
37 Но сар сас андэ лэ Ноёстири время, кадя авэла и тоди, кала рияпэ лэ манушэско Шаво.
38 Англа потопо и мануша ханас и пэнас, жэнинаспэ и жанас миростэ жы каринг кодэва дес, кала о Ноё зажыля андо кавчеӷо.
39 Вонэ на шонас сама пэ кода, со терэлпэ, пока на дя о паи* и на ундярдя лэн всаворэн. Кадя авэла и тоди, кала рияпэ лэ манушэско Шаво.
40 Андэ кодэя время дуй мануш авэна пэ мал: еқэс залэна, ай аврэс ашавэна.
41 Дуй манушня мэлина пэ ек ручно мэльница: еқа залэна, ай авря ашавэна.
42 Кочай на́ совэн и авэн внимательни, важ кода кай на ӷанэн, андэ саво дес авэла тумаро Ӷосподино.
43 Погиндон акэ пала со: если лэ цэрэско хулай тэ ӷанэн, кала* авэла о чор, тоди во на совэла и на домэкэла лэсти тэ заӷулел андо цэр.
44 Кадя и тумэ трэбуй тэ авэн ӷотови, важ кода кай лэ манушэско Шаво рияпэ, кала тумэ када на аштярэн.
45 Ко тоди о кандино и годявэрно* рабо, савэс о ӷосподино стодя тэ диқэл пала слуӷоря андэ пэско цэр, кай вовремя тэ дэл лэнди о хамос?
46 Бахтало кадэва рабо, если лэско хулай авэла и диқэла, кай во кадя и терэл!
47 Ԥэнав тумэнди чачимос: во стола лэс тэ диқэл пала вся пэско мищимос.
48 Но если кадэва рабо ашэла вэрыто и погиндоя: „Мэрно ӷосподино заритярдёл“ —
49 и марэла аврэ рабонэн и хала пэла лэ матимаренца,
50 тоди лэско ӷосподино авэла андэ кодэва дес, кала во на аштярэл, и андэ кодэва часо, пала саво во на ӷанэн.
51 Во лэс строӷо просытярэла и шола интя, кай находинпэ и лицымероря. Котэ во лэла тэ ровэл и тэ мучийпэ лэ ԥаримастар.
Сноски
^ Или «поджал и время кадэла люмати».
^ Букв. «залэнпэ и схватки (сар кай и жувли)».
^ Или «бут хохавнэ мануша, савэ ԥэнэна, кай дэн дума лэ Дэвлэстар».
^ Или «виритярэла до конца».
^ Катэ и дума жал пала кодэва, ко адиной лэ Даниилоско пророчество.
^ Или «кодэя время».
^ Или «андо секретно ҭан».
^ Букв. «па небесни тучи».
^ Букв. «кадэя поколения».
^ Или «потопо».
^ Или «кала и рят». Букв. «андэ сави стража».
^ Или «мудро».
