Лэ Апосталонэндири дила 1:1-26
1 Фяфи́ло, андэ пэрво книжка мэ пистросардэм пала вся, со о Иисусо терэлас и сости сытярэлас
2 жы каринг кодэва дес, кала лэс линэ по нэбо. Англа када через о свынто духо во дя руковоцтво лэ апосталонэнди, савэн витидя.
3 Посли вся о ԥаримос, саво о Иисусо пэрэандярдя, во най еқвар доԥэндя, кай па чачимастэ жунделя. Важ 40 деса и апосталоря бут разоря диқлэ лэс, и во дэлас дума лэнца пала лэ Дэвлэско Царство.
4 Еқвар, кала вонэ сас вмести, о Иисусо приԥэндя лэнди: «На́ ужан анда Иерусалимо и аштярэн, сар о Дад зритярэла пэско алав, пала саво тумэ ашундэ мандар.
5 О Иоано болэлас паеса, ай тумэ ӥто болдёна лэ свынтонэ духоса».
6 Кала о Иисусо упалэ диқляпэ лэ апосталонэнца, вонэ пушлэ: «Учителё, най акана ту рисарэс лэ Израилёско царство?»
7 Во ԥэндя лэнди: «Када най тумари дила тэ ӷанэн и время и о сроко, савэ стодя о Дад*.
8 Но кала пэр тумэндэ зжала о свынто духо, тумэ лэна зор и авэна мэрнэ свидетеля андо Иерусалимо, па вся Иудея и Сама́рия и па вся ԥув».
9 Посли кадэла алава вонэ диқлэ, сар во ля тэ ваздэлпэ по нэбо. Тоди и туча ушарадя лэс, и во лэнди ужэ на дицолас.
10 Пока вонэ диқэнас упрэ, паша лэндэ появисайлэ дуй мануш андэ парни ӥда
11 и ԥэндэ: «Галилейски мануша, со тумэ тердён и диқэн упрэ? Тумэ диқлэ, сар о Иисусо, саво сас тумэнца, вазгляпэ по нэбо, и рияпэ во кадя жэ, сар ужыля по нэбо».
12 Тоди вонэ змэклэпэ па Али́фкаво плай и рисайлэ андо Иерусалимо. (Кадэва плай тердёл найдур лэ Иерусалимостар, пэ растаяния, сави можно тэ прожан в суботу*.)
13 Вонэ авелэ андо цэр, кай ашэлэпэ тэ ратярэн, и вазглэпэ упрэ андэ комната. Када сас о Пётро и о Иоано, о Иаково и о Андрий, о Фили́по и о Фама́, о Варфаламе́ё и о Матфеё, о Я́ково, лэ Алфеёско шаво, о Си́мано, пэ саво ԥэнэнас хваткако, и о Иуда, лэ Яковоско шаво.
14 Всаворэ вонэ на парашэнас тэ стидэнпэ вмести и тэ мангэнпэ; лэнца сас дэсавэ жувля, ай кадяжэ и Мария, лэ Иисусостири дэй, и лэстирэ ԥрала.
15 Еқвар, кала вонэ кадя стидэ́пэ, о Пётро терделя машкар ԥрала — лэн сас варикай 120 мануш — и ԥэндя:
16 «Ԥрала, о свынто духо через о Давидо инке май данглал ԥэндя пала Иуда, саво андясас кодэлэн, ко астардя лэ Иисусос, и кадя трэбуй сас тэ ашэл.
17 О Иуда сас ек андар мэндэ и во сас витидо тэ служый вмести амэнца.
18 (Кадэва мануш тиндя мал пэ ловэ, савэ лэсти динэ важ лэстири найлащи дила. Во пэля тэлэ шэрэса, розмарделя, и лэстирэ пора повихуклэ.
19 Пала када уӷанглэ всаворэ, ко жувэл андо Иерусалимо, и пэ лэндири шыб пэ кодэя мал линэ тэ ԥэнэн Акилдама́, со означает «ратвали мал».)
20 Андэ книжка лэ дилянца пистромэ: „Мэк ашэл шушо лэско цэр и мэк на́ жувэл будэр нико андэр лэстэ“, ай кадяжэ „Мэк лэско ҭан залэл авэр“.
21 Важ када трэбуй тэ витидас еқэс анда кодэла, ко сас амэнца вся и время, кала служыяс о Ӷосподино Иисусо —
22 кодэла времятар, кала лэс болдя о Иоано, и жы каринг кодэва дес, сар во вазгляпэ упрэ. Кадэва мануш, сар и амэ, трэбуй сас тэ диқэл, сар во жунделя».
23 И ԥрала ԥэндэ пала дуй: пала Ёсифо, пэ саво кадяжэ ԥэнэнас Варса́ва и Ю́сто, и инке пала Ма́тфиё.
24 Посли када вонэ манглэпэ: «Иегова, ту ӷанэс всаворэнго ди. Сыкав, кас анда кадэла дуй мануш ту витидян
25 важ и апостальско служэния, сави мэкля о Иуда, кай тэ жал пэстирэ дромэса».
26 Вонэ шутэ жребиё, и о жребиё випэля лэ Матфиёсти, и во стидяпэ каринг и 11 апосталоря.
