Можно тэ ԥэнас, кай всаворэ мануша андэ кацави жэ ситуацыя. Пар мэндэ жал баро ураӷано, пэ саво о Иисусо ԥэндя «само бари бида» (Матфея 24:21). Со бы амэ тэ на терас, кадэя бида всаек авэла. Но амэндэ вижала тэ фэрисавас. Сар?

Акэ со ԥэндя о Иисусо: «На парашэн тэ родэн спэрва... [о] царство и лэ Дэвлэско чачимос [или праведно законо]» (Матфея 6:33). Сар амэ када тэ стерас?

Родэн спэрва лэ Дэвлэско Царство. О Царство трэбуй тэ авэл важ амэндэ пэ пэрво ҭан андэ жызня (Матфея 6:25, 32, 33). Васо? Важ кода кай и мануша екжэнэ нэ моӷут тэ улэн и проблемы, савэ исин андо миро. Тэ улэл вся о ԥаримос можэт кати лэ Дэвлэско Царство.

Родэн лэ Дэвлэско праведно законо. Амэнди трэбуй тэ ритярас лэ Дэвлэско праведно законо и тэ жувас па лэстирэ принцыпоря. Васо? Если амэ екжэнэ ласа тэ витидас, со лашимос, ай со найлашимос, кадэлэстар авэла вэрыто (Притчи 16:25). Но если амэ ритярас лэ Дэвлэско законо, андэ амари жызня авэла бах и радость и, само ӷлавно, о Дэл авэла лошало пала амэндэ (Исаия 48:17, 18).

На парашэн тэ родэн спэрва лэ Дэвлэско царство и лэ Дэвлэско праведно законо. О Иисусо ԥэнэнас, кай дэсавэ мануша моӷут тэ бистрэн пала кода, со трэбуй тэ авэл пэ пэрво ҭан андэ жызня, и тэ гиндон, кай если вонэ лэна тэ родэн о барвалимос, то во лэн фэрия. Кай авэр мануша можэт фартэ бут время тэ жал пэ обычно  дила, сави исин кажно дес, кай лэндэ ужэ на ашэлпэ время пэ дила, сави трэбуй важ лэ Дэвлэско Царство (Матфея 6:19—21, 25—32).

О Иисусо дэл алав, кай кодэлэндэ, ко витидя лэ Дэвлэско Царство, ужэ акана авэла вся, со трэбуй, ай англэ лэндэ авэла вечно лашимос лэ Дэвлэстар (Матфея 6:33).

Пэрви лэ Иисусостирэ ученикоря кадя и терэнас и родэнас спэрва о Царство и лэ Дэвлэско праведно законо, но андэ лэндири жызня инке ашэласпэ о ԥаримос. И всаек лэн фэрияс о Дэл. Сар во када терэлас?

Лэ Иисусостирэ ученикоря ритярэнас лэ Дэвлэско праведно законо, и када фэрияс лэн лэ ԥаримастар, саво исин андэ жызня кодэлэндэ, ко на камэл тэ кандэл лэ Дэвлэс. Кода, кай вонэ фартэ патянас, кай авэла лэ Дэвлэско Царство, поможыяс лэнди тэ виритярэн и ԥари время. Кадяжэ о Дэл дэлас лэнди «зор, саво май баро обычнонэстар», кай вонэ вся тэ виритярэн (2 Коринфянам 4:7—9).

И пэрви христианоря кандэнас лэ Иисусос и пэ пэрво ҭан стонас лэ Дэвлэско Царство. Вонэ росԥэндэ и лащи новость важ о Царство андэ кодэла ҭана, кай жувэнас (Колоссянам 1:23). Исин ли адес кацавэ мануша, ко терэн кадя жэ?

Да! Лэ Иеговастирэ свидетеля полэн, кай фартэ йто лэ Дэвлэско Царство улэла кадэя найлащи время. Важ када вонэ стон вся пэско зор, кай тэ терэн и дила, пала сави ԥэнэнас о Иисусо: «Кадэя лащи весть пала царство росԥэнэна па вся и ԥув, кай тэ уӷанэн всаворэ народоря, и тоди авэла конец» (Матфея 24:14).

Со ту авэса тэ терэс? Ту можэш тэ стерэс кадяжэ, сар и мануша, савэ жувэнас андо македонско форо Верия. Вонэ всаворэ одеса прилинэ и лащи новость важ о Царство, сави росԥэндя лэнди о апостоло Павло. Кадэла мануша линэ драго тэ уӷанэн, со пистромэ андэ Свынто Писания, кай тэ додиқэн, чачимос ли кода, со ԥэндя о Павло, чи най. Кала вонэ полинэ, кай и новость важ о Царство, када чачимос, вонэ линэ тэ жувэн кадя, сар уӷанглэ (Деяния 17:11, 12).

Кадя жэ можэш тэ терэс и ту. Если ту авэса тэ стос лэ Дэвлэско Царство пэ пэрво ҭан андэ пэстири жызня и тэ ритярэс лэско праведно законо, то ужэ акана тут лэла тэ фэрий о Дэл, ай англэ ту сможэш вечно тэ лошавас ла жызняти, сави авэла пэ мирно ԥув.