Андэ Библия пистромэ, кай ек найлашо анӷело, пэ саво потом линэ тэ ԥэнэн Сатана, ԥэндя, кай лэ Дэвлэстэ нинай право тэ правий лэ манушэнца. Кадэва анӷело зашутя лэ манушэнди гиндо, кай би лэ Дэвлэско вонэ жувэна май бахталэс. Жалко, но и пэрви мануша, о Адамо и Ева, канглэ лэ Сатанас и жылэ против Дэл (Бытие 3:1—6; Откровение 12:9).

Кала о Адамо и Ева отԥэнделэ, кай о Дэл тэ авэл лэнго правителё, вонэ хасардэ райско цэр, лашо зор и вечно жызня (Бытие 3:17—19). Кода, со вонэ витидэ, пэрэжыля и лэндирэ бэятонэнди. Андэ Библия ԥэнэнпэ, кай через о Адамо «о бэзэх авеля андо миро, ай через о бэзэх авеля и смэрть» (Римлянам 5:12). О бэзэх дицэля инке андэ кода, кай о мануш ля тэ правий пэ мануша, и када анэн ек о найлашимос (Экклезиаст 8:9). Када сыкавэл, кай, пока исин лэ манушэндири правления, о ԥаримос кадя и авэла.

Сар пистромэ андэ Библия, пэрво правителё анда мануша ашэля о Нимродо, и во на прижанэнас лэ Иеговастири власть. Кодэла времятар и мануша через и власть терэнас вэрыто аврэ манушэнди. Акэ со пистросардя о царё Соломоно варикай 3 000 бэрш палпалэ: «Мэ... диқлэм и ясва кодэлэндирэ, пэр кастэ тасавэн, ай тэ подритярэн лэн сас най касти. Кодэлэндэ, ко пэр лэндэ тасавэлас, сас власть» (Экклезиаст 4:1).

Андэ амари время нисо на паруделя. Андэ статья, сави вимэкля ООН андо 2009 бэрш, ԥэнэнаспэ, кай кода, сар правин и мануша, «када ек анда ӷлавни причины, васо кай о миро скати проблемы».

Лэ манушэнди трэбуй авэр лащи правления и кодэла, ко ӷанэн тэ правин. Именно када о Создателё стерэла важ и мануша.

О Дэл стодя Царство, или правительство, саво улэла всаворэ манушыканэ правительства, ай екжэно «авэла тэ тердёл вечно» (Даниил 2:44). Када именно кодэва Царство, пала саво мангэнпэ милионоря мануша (Матфея 6:9, 10). Но най о Дэл авэла правителё андэ кадэва Царство. Во витидя царёса кодэлэс, ко варикала жувэлас пэ ԥув. Ко када?