Лащи новость лэ Лукастар 21:1-38
21 О Иисусо шутя сама, сар и барвалэ шон ловэ андэ кувшыноря*.
2 И во додиқля, сар ек чороры ԥивли шутя интя дуй хурдорэ мардэ*.
3 Тоди во ԥэндя: «Ԥэнав тумэнди чачимос: кадэя ԥивли стодя май бут, чем всаворэ кодэла мануша.
4 Важ кода кай вонэ отдэнас ловэ, савэ лэндэ ашэлэпэ, ай вой, хоть и жувэл чорорэс, отдя вся, со латэ сас важ и жызня».
5 Ӷэт май интя зажыля о розӷоворо пала лэ Дэвлэско цэр*, и дэсавэ ԥэндэ, кай во стердо анда шукарнэ бара и кай о миро интя анэн лэ Дэвлэсти сомнак и авэр подаркоря.
6 Пэ када о Иисусо ԥэндя: «Авэла время, кала на ашэлапэ бар пэ барэстэ кодэлэстар, со тумэ катэ диқэн, вся авэла розмардо».
7 Лэстар пушлэ: «Учителё, кала када авэла и пар со можно авэла тэ полас, кай кадэлэсти пашол и время?»
8 Во ԥэндя: «Диқэн, кай тумэн тэ на обдилярэн, важ кода кай бут ко авэла мэрнэ алавэстар и лэла тэ ԥэнэн: „Када мэ“, ай кадяжэ „И время пашэ“. На́ ԥирэн пала лэндэ.
9 И на́ даран, кала ашунэна, кай жал война и о миро терэл бида. Важ кода кай вся када трэбуй тэ терэлпэ спэрва, но вся улэлапэ най сразу».
10 Тоди во ԥэндя: «Ек народо жала войнаса* пэ авэр народо, и о царство — пэ авэр царство.
11 Лэла фартэ тэ тинойпэ и ԥув*, и андэ разни краёря авэла боқалимос и мэримос лэ насвалимастар. О миро лэла тэ диқэл, кай терэлпэ страшнимос, ай кадяжэ додиқэла ашунглэ и удивительни чудеса па нэбо.
12 Но англа вся када о миро лэла тэ ӷоний тумэн, и мануша лэна тэ хутилэн тумэн, тэ андярэн по сындо* и тэ шон андо баруно. Через мэрно алав тумэн андярэна каринг и барэ мануша и каринг и барэдэра андэ страна.
13 Тоди тумэ сможэте тэ росԥэнэн, андэр со тумэ патян*.
14 Но на́ пристон бут зор, кай май англал тэ обгиндон, сар лэна тэ зашонпэ пала пэстэ,
15 важ кода кай мэ потԥэнава тумэнди, сар годявэрнэс тэ дэн дума*, и ни ек тумаро вороӷо* нэ сможэт нисо тэ стерэл или тэ ԥэнэн против кацави дума*.
16 Тумэн лэна тэ здэн* дажэ и родителя, и ԥрала, и чаче, о родо и друӷоря, и дэсавэн андар тумэндэ умарэна.
17 И всаворэ вэрыцына тумэн через мэрно алав.
18 Но ни ек бал па тумаро шэро на пэрэла.
19 Если тумэ виритярэна и ԥари время, тумэ спасынапэ*.
20 Кала тумэ диқэна, кай круӷом о Иерусалимо тердён бут воиноря, ӷанэн: ӥто лэстар нисо на ашэлапэ*.
21 Тоди кодэла, ко андэ Иуде́я, мэк нашэн андэ плая; кодэла, ко андо форо, мэк вижан андэр лэстэ, ай кодэла, ко най дур лэ форостар, мэк на́ зажан андэр лэстэ,
22 важ кода кай тоди авэла время важ о справедливо сындо*, кай вся тэ ашэл кадя, сар пистромэ.
23 Сар дэ ԥарэс авэла андэ кодэла деса лэ жувлянди, савэ аштярэн бэятос, и лэ манушнянди, савэ праварэн лэ колинэса! Важ кода кай пэ кадэла краёря авэла бут ԥаримос и бида, и о Дэл спушэла кадэлэ народостар.
24 Дэсавэн зашынэна шуряса, аврэн стерэна рабонэнца и ундярэна андэ разни краёря. И народоря* лэна тэ топчин о Иерусалимо, пока на прожала лэ народонэндири время*.
25 По қам, по шон и пэ звёзды лэла тэ терэлпэ варисо нэобычно, ай пэ ԥув о миро лэла тэ мучийпэ, кай на ӷанэна каринг тэ дэл, важ кода кай и моря лэла тэ рэвий и тэ бурлий.
26 Кода, со исин по нэбо, затинояпэ, и важ када и мануша лэна кадя тэ даран и тэ пэрэжывают кодэлэстар, со авэла ла ԥувьяса, кай дажэ лэна тэ хасарэн и сознания.
27 И тоди вонэ додиқэна лэ манушэстирэ Шавэс, саво жал па тучи, и лэнди дицола, саво дэ баро зор лэстэ и сави дэ бари стэма лэстар марэл.
28 Кала вся када лэла тэ терэлпэ, вивортонпэ и ваздэн и шэрэ, важ кода кай пашол и время тэ спасынпэ».
29 Посли када во призындярдя лэнди ек примеро: «Диқэн пэ инжырово витка и пэ авэр витки.
30 Кала тумэ диқэн, кай вонэ лэн тэ розмэкэнпэ, тумэ полэн, кай о милай ужэ пашэ.
31 Точно кадя жэ, кала тумэ диқэна, кай вся када терэлпэ, ӷанэн, кай пашэ и время, кала лэла тэ правий лэ Дэвлэско Царство.
32 Ԥэнав тумэнди чачимос: на прожала кадэлэ миростири время*, сар вся када авэла.
33 Стрияпэ о нэбо и ԥув, но мэрнэ алава ашэнапэ.
34 Диқэн пала пэстэ и на́ терэн пэсти май ԥарэс, кай опханпэ, опэнпэ и фартэ заботинпэ пала пэстири дила. Фэринпэ, кай кадэва дес нэожыдано тэ на астарэл тумэн,
35 сар ловушка. Важ кода кай во авэла важ всаворэ, ко жувэл пэ ԥув.
36 Кочай на́ совэн и вся и время анда ди мангэнпэ, кай тэ фэринпэ всаворэстар, со трэбуй тэ авэл, и тэ тердён англа лэ манушэско Шаво».
37 Десэ о Иисусо сытярэлас андэ лэ Дэвлэско цэр, ай вэчэром ужалас тэ ратярэл по Али́фкаво плай.
38 И жы анда тэсара вся о народо стидэласпэ андэ лэ Дэвлэско цэр, кай тэ ашунэл лэс.
Сноски
^ Или «кувшыноря важ и ловэ».
^ Или «манетки».
^ Или «храмо». Катэ и май дур андэ кадэя ӷлава.
^ Или «дэла».
^ Или «авэна барэ землетрясении».
^ Досл. «по сындо андэ ла собраниятирэ цэра».
^ Или «тэ авэн сар свидетеля».
^ Или «всаворэ тумарэ вороӷоря, савэ стидэнапэ вмести».
^ Или «годявэрнимос».
^ Или «дава тумэнди кацавэ алава и кацаво годявэрнимос».
^ Или «тэ андярэн андо сындо; тэ отԥэндён».
^ Или «спасына пэстири жызня».
^ Или «во ашэла шушо».
^ Или «важ лэ Дэвлэстири холи».
^ Или «авря шыбатирэ народоря». Катэ и дума жала пала мануша, савэ найевреёря.
^ Или «и время, сави стодя важ авэр народоря».
^ Или «кадэя поколения».
