23 huatacunata charij joven Davidca cashnami nin: “Ña musuyajushpaca jaricunatallata munashcatami cuenta japircani. Chai munaicunaca ratogullatami canga yarcanimi. Shinapash chaitaca na cungaita ushashcanichu”.

 Davidca Taita Diosta sirvijmi can. Chaimi Taita Diosta cazungapaj munan. Jaritallata huarmitallata munajcunaca ¿Taita Diostaca cazuita ushanllu? Jaripurallata huarmipurallata canamandaca Taita Diosca ¿imatata yuyan?

•  Jaripurallata huarmipurallata canamandaca Bibliapica ¿imatata nin?

•  Shina nishpaca

•  Pero pipash

 Cada huata yalijpimi cada llactacunapica jaripura huarmipura canamandaca shuj shuj yuyaicunata gentecunaca charin. Jesuspa ali catijcunaca Efesios 4:14​pi nishcashnaca ‘huaira shamushna pandata yachachijpipash, na caiman chaiman apai tucungapaj’ munanchichu. Chaimi gentecunapa tucui nishcacunataca na crinchi. Jaripura huarmipura canamanda Biblia imata yachachijtami crinchi.

 Jaripura huarmipura canamanda Biblia ima nijta ricupashun:

•  “Maijan jarihuanbash, huarmihuanshnaca na puñunachu cangui” (Levítico 18:22).

•  ‘Paicunapaj shungu munashca mapacunata rurashpa causachun, pinganayai nali munaicunata rurachun Taita Diosca saquirca. Chaimandami paicunapaj huarmicunaca jarihuan causanapaj randica, paipurallata nalita rurashpa causajurca’ (Romanos 1:24, 26).

•  “Na quiquingunallata umachirinachu capanguichi. Huainayana juchata rurajcuna, imagengunata adorajcuna, cazarashca jahua shujhuan causajcuna, homosexualcuna. Shuhuacuna, ambiciosocuna, machajcuna, groserota rimajcuna, umachishpa shuhuajcunaca, Taita Diospa Gobiernota herenciatashna japitaca na ushangachu” (1 Corintios 6:9, 10, TNM ).

 Taita Diospa mandashcacunaca tucuicunapallatami ali can. Taita Dios millanayachishca cosascunata ama rurangapajmi ñucanchi yuyaitapash, ñucanchi shungutapash cuidana capanchi (Colosenses 3:5).

 Shina nishpaca ¿Bibliapica jaripura huarmipura cajcunata na ricunayachinatachu ningapaj munan?

 Chaitaca na ningapaj munanllu. Bibliapica pitapash na ricunayachishpa causanataca na yachachinllu. Ashtahuangarin ‘tucuicunahuan casilla, ali causana’ cashcatami yachachin (Hebreos 12:14). Jaripura huarmipura causajcunata asishpa ricuna, maltratanaca nalichu can.

 Shina nishpaca ¿Jesusta ali catijcunaca jaripurallata huarmipurallata cazarana leycunata nalicachishpa ricunatachu ningapaj munan?

 Bibliapi nishcashnaca, Taita Diosca shuj jarihuan shuj huarmihuan cazaranatallami alicachin (Mateo 19:4-6). Jesusta ali catijcunaca jaripurallata huarmipurallata cazaranamandaca ni paicunapa lado, ni paicunapa contrapash na canchichu. Jaripurallata huarmipurallata cana leypa lado tucushpa o contra tucushpaca politicapi chapuri cuendami can. Bibliapica politicapi na chapurina cashcatami yachachin (Juan 18:36).

 Pero pipash ¿jaripurallata huarmipurallata causajcuna cashpaca cambiaita ushangacha?

 Ari, paicunaca cambiaita ushanmi. Bibliapica punda tiempopi huaquin gentecunaca jaripurallata huarmipurallata causashca cashpapash cambiaita ushashcatami yachachin. Apóstol Pabloca Corinto llactamanda huauquipanicunaman cartata escribijushpaca jaripurallata, huarmipurallata causajcunaca Taita Diospa Reinoman na yaicui ushanatami intindichirca. Caitapashmi nirca “chashnallatami huaquingunaca causarcanguichi” (1 Corintios 6:11).

 Shinaca jaripurallata huarmipurallata causanata saquishca cashpapash chaicunataca ¿nunca na yuyaringachu ninchimanllu? Na, Bibliapica ninmi: “Taita Dios carashca mushuj causaitaca ropata churajunshnami churajuna capanguichi. Chai mushuj causaica, Taita Diosta ashtahuan aliguta rijsimandami, Taita Dios imashina cashcata ricuchingapaca mushujyashpa catijun.” (Colosenses 3:10, TNM ). Chai munaicunataca asha ashami cambiaita usharin.

 Pero pipash ¿jaripurallata huarmipurallata cangapaj munajcunaca Taita Diospa mandashcataca cazuita ushangacha?

 Chai nali munaicunata saquinata, na saquinataca cada unomi decidina can. Nali munaicunataca ¿imashinata mishai ushapangui? Bibliapica “Diospa espirituhuanmi causana canguichi. Ashtahuangarin na quiquinba munaicunatalla ruranachu canguichi” ninmi (Gálatas 5:16).

 Gálatas 5:16​pi nishca shinaca nali munaicunata ñana charinataca na nijunllu. Ashtahuangarin Bibliata ashtahuan yachajuna, Taita Diosta mañanami nali munaicunata mishachunga ayudanga.

 Callaripi parlashca joven Davidtaca paipa taitamamahuan parlanami nali munaicunata mishachunga ayudarca. Joven Davidca “pundapi ñuca taitamamacunahuan parlashca cashpaca, cai llaquicunataca na charinmanllu carcani” ninmi.

 Jehovapa mandashcacunata cazushpami cushilla causai ushanchi. Taita Diospa mandashcacunaca alipacha cashpami shunguta cushichin cashcataca seguro capanchi. Shinallata Taita Diospa mandashcacunata cazushpallami Taita Diospa bendiciongunataca chasquishun (Salmo 19:8, 11).