Gálatas 5:1-26
5 Ñucanchicuna Leymanda libre cachunmi, Cristoca ñucanchita libre saquirca. Shinaca shinllimi shayarina capanguichi. Cutinga na esclavocunashna causanachu capanguichi.
2 Ñucallatami quiquingunataca nipani, quiquinguna circuncisión* nishcata rurajpica, Cristo imata rurashcaca ñana quiquingunapa beneficiochu canman carca.
3 Cutinmi quiquingunataca nipani, circuncisión nishcata rurajcunaca, Leypi tucui ima nishcatapash cazunami can nishpa.
4 Quiquingunaca Leyta cazushpami ima culpapash illa justo ricuringapaj munanguichi. Shina rurashpami Cristomanda caruyanajunguichi. Shinallata paipa ninan juyaita* chasquinamandapashmi caruyanajunguichi.
5 Ñucanchica Taita Diospa ñaupapi ima culpapash illa justo ricurinatami ansia shuyanajunchi. Espíritu santomandalla y crishcamandallami shina ricuritaca ushashun.
6 Porque Cristo Jesuspa discípulo cajcunapaca, circuncisionda rurana o circuncisionda na ruranapash nimapa na sirvinllu. Sino juyaimanda crishcata ricuchinami ashtahuan ali can.
7 Quiquingunaca alitami ruranajurcanguichi. Ali yachachishcacunata catinata saquichunga ¿pita quiquingunamanga jarcaicunata churajun?
8 Chashna yachachishcacunaca, quiquingunata agllashca Taita Diosmandaca na shamunllu.
9 Asha levadurallatami gulpi masataca punguichinlla.
10 Quiquinguna ñucanchi Señor Jesuspa discipulocuna cajpimi, ñucahuan de acuerdo canataca seguro capani. Pero quiquingunata problemata ruranajujcunaca, pi cashpapash pai miricishca castigotami chasquinga.
11 Huauquicuna, si cunangaman circuncisionmanda ñuca villachishpa catijujpica, paicunaca na catiriashpa llaquichinajuhuanmanllu. Shinallata Jesusca jatun racu caspipimi* huañurca nishpa yachachishpapash ñana gentecunataca culirachijuimanllu.
12 Quiquingunata pandachingapaj munaj jaricunaca, paicunallata paicunapa charishcata capashpami ali canman.
13 Huauquicuna, quiquingunaca libre cangapami agllai tucurcanguichi. Shinapash libremi cani nishpallaca, nali munaicunataca na ruranachu capanguichi. Sino juyaimandami caishujpa chaishujpa esclavocunashna cana capanguichi.
14 Porque Leyca tucuillami shujlla mandamientopi pactarijun. Chai mandamientopica ninmi: “Canba projimotaca* quiquin juyarinshnallatami juyana cangui” nishpa.
15 Shinapash caishujhuan chaishujhuan randimanda llaquichirishpa, culirarinajushpaca, pactara quiquingunapurallata huañuchiringuichiman.
16 Chaimi quiquingunataca cashna nipani, Taita Diospa espíritu santo munashcashnami causana capanguichi. Shina rurashpallami nali munaicunataca nimata na ruranguichi.
17 Porque nali munaicunaca Taita Diospa espíritu santopa contrami can. Taita Diospa espíritu santopash nali munaicunapa contrami can. Taita Diospa espíritu santopash nali munaicunahuan contra cajpimi quiquingunaca imata rurangapaj munashcataca na ruranguichi.
18 Ashtahuangarin, Taita Diospa espíritu santo quiquingunata pushajujpica, Leyca ñana quiquingunataca mandajunllu.
19 Shinapash nali munaicunaca caicunami can, huainayana jucha* millanai ruraicuna* nalicunata rurashpa nimata na pinganayachina*
20 santocunata adorana, brujeriata* rurana, contrarijuna, macanajuna, risintirina, yapata culirana, pliturina, gentecunata separangapaj grupocunata rurana, sectacunata* callarichina,
21 envidiana, machana, nali fiestacuna* y shuj chashna nali cosascunata ruranami nali munaicuna can. Punda advirtishcashnami cutin nijupani, caicunata rurajcunaca Taita Diospa Gobiernota herenciatashna japitaca na ushangachu.
22 Cutin Taita Diospa espíritu santo pushajpi causajcunaca cashnami can, shujcunata juyan, cushijun, tranquilo ali causan, pacienciata charin, ali shunguta charin, ali ali can, tucui shunguhuan crin,
23 na ñapash culiran, controlarin. Chaicunata ama rurachunga ima leypash na jarcaita ushanllu.
24 Ashtahuangarin, Cristo Jesuspa discipulocunaca, paicunapa pecador cuerpotami paicunapa nali pensamientocunandi, nali munaicunandi jatun racu caspipi* clavashcashna saquishca.
25 Taita Diospa espíritu santo munashcashna causanajushpaca, Taita Diospa espíritu santo munashcashna causashpa catipashunchi.
26 Na alabarijunachu capanguichi. Porque alabarinajushpaca, caishujman chaishujmanmi mishana yuyaicunata yachachishun y ñucanchipurapashmi envidiarinajushun.
Notacuna
^ Glosariopi “circuncisión” shimita ricupangui.
^ Glosariopi “bondad inmerecida” shimita ricupangui.
^ Glosariopi “huañuchingapaj jatun racu caspi” shimita ricupangui.
^ Caipi prójimo nishpaca “na solo ñucanchipa rijsicunamandallachu parlajun. Sino gulpi gentecunamandami” griego shimipica parlajun.
^ Griego shimipica “pornéia” nijunmi. Glosariopi “huainayana jucha” shimita ricupangui.
^ O “conducta descarada”. Glosariopi “conducta descarada” shimita ricupangui.
^ O “espiritismota”. Glosariopi “espiritismo” shimita ricupangui.
^ Chai fiestacunapica, paicuna munashcatami gentecunaca ruran cashca.
^ Glosariopi “jatun racu caspi” shimita ricupangui.
