Juan 20:1-31
20 Semana qallariy p’unchaytan* María Magdalenaqa tutallamanta, manaraq p’unchayamushaqtin sepulturaman rirqan,+ chaypin payqa sepultura wisq’asqanku rumita suchuchisqataña tarirqan.+
2 Jinan payqa phawarqan Simón Pedroman Jesuspa munakusqan discipulomanwan,+ jinaspa paykunata nirqan: “Señortan sepulturamanta orqorapusqaku,+ manan yachaykuchu maymanchus churarunku chayta”, nispa.
3 Chaymi Pedrowan juj kaq discipulowanqa sepulturaman rirqanku.
4 Iskayninkun phawaylla rirqanku, chay juj kaq discipulon ichaqa Pedromanta aswan usqhaylla phawaspa ñaupaqta sepulturaman chayarqan.
5 Jinan payqa k’umuykuspa qhawaykurqan, jinaspa rikurqan lino telakuna chaypi churarayashaqta,+ ichaqa manan sepultura ukhumanqa jaykurqanchu.
6 Chayllamanmi qhepanta phawamuq Simón Pedropas chayamullarqantaq, jinaspa sepulturaman jaykurqan, jinan paypas rikullarqantaq lino telakuna chaypi churarayashaqta.
7 Jesuspa umanpi kaq telaqa manan juj telakunawan kuskachu kasqa, aswanpas juj ladopin k’uyusqa churarayashasqa.
8 Ñaupaqta chayamuq juj kaq discipulopas jaykullarqantaqmi sepultura ukhuman, chayta rikuspan payqa creerqan.
9 Ichaqa manaraqmi entienderqankuchu Diospa simin qelqapi Jesuspa kausarimpunanmanta willasqanta.+
10 Chaymi paykunaqa wasinkuman kutipurqanku.
11 Marian ichaqa sepultura t’oqo jawapi waqaspa sayasharqan. Waqan-waqantaq k’umuykuspa sepultura t’oqota qhawaykurqan.
12 Jinaspan maypichus Jesuspa cuerpon karqan chaypi rikurqan yuraq p’achayoqkama iskay angelkunata,+ jujninta maypichus uman kasharqan chaypi tiyashaqta, jujnintataq maypichus chakin kasharqan chaypi tiyashaqta.
13 Paykunan Mariata nirqanku: “¿Imaraykun waqashanki?” nispa. Jinan payqa nirqan: “Señorniytan orqorusqaku, manan yachanichu maymanchus churarunku chayta”, nispa.
14 Chayta nispan payqa kutirispa Jesusta chaypi sayashaqta rikurqan, ichaqa manan repararqanchu Jesús kasqanta.+
15 Jesustaq payta nirqan: “¿Imaraykun waqashanki? ¿Pitan maskhashanki?”, nispa. Mariaqa huertapi llank’aq runapaqmi piensarqan, chaymi payta nirqan: “Wiraqocha, qan aparqanki chayqa, willaway maymanchus churamurqanki chayta, chhaynapi apakapunaypaq”, nispa.
16 Jinan Jesusqa nirqan: “¡María!”, nispa. Paytaq kutirispa hebreo rimaypi nirqan: “¡Raboni!”,* nispa (chayqa “yachachikuq” ninantan nin).
17 Jesustaq payta nirqan: “Ama jap’ipakuwaychu, manaraqmi janaq pacha Taytamanqa wichapuniraqchu. Ichaqa phaway wayqeykunaman+ nimuy: Noqan wichapushani Taytayman,+ Taytaykichisman; Diosniyman,+ Diosniykichisman”, nispa.
18 Jinan María Magdalenaqa rispa chayta Jesuspa discipulonkunaman willamurqan: “¡Señortan rikuramuni!”, nispa. Willarqanmi Jesuspa nisqantapas.+
19 Semana qallariy p’unchay tardeyaykuqtintaq, Jesuspa discipulonkunaqa judiokunata manchakusqankurayku punkukunata allinta wisq’arukuspa kasharqanku. Jinan Jesusqa qonqaylla paykuna chaupipi rijurirqan, jinaspa paykunata nirqan: “Thaj kay kachun qankunapaq”,+ nispa.
20 Chayta nispanmi Jesusqa paykunaman rikuchirqan makinta waqtannintawan.+ Jinan discipulonkunaqa kusikurqanku Señorta rikusqankumanta.+
21 Jesusqa wajmantan paykunata nillarqantaq: “Thaj kay kachun qankunapaq.+ Imaynan janaq pacha Taytaqa noqata kachamuwarqan,+ chhaynatan noqapas qankunata kachaykichis”,+ nispa.
22 Chayta nisqan qhepatan paykunaman phukuykuspa nirqan: “Chaskiychis santo espirituta.*+
23 Piqpa juchantapas perdonankichis chayqa, chay juchaqa perdonasqañan kapun; manachus perdonankichis chayqa, chay juchaqa manan perdonasqachu kashan”, nispa.
24 Chunka iskayniyoq apostolkunamanta jujnin, Mellizo nisqa Tomasqa+ manan chaypichu kasharqan Jesús jamuqtinqa.
25 Chaymi wakin discipulokunaqa payta nirqanku: “¡Señortan rikuruyku!”, nispa. Jinan Tomasqa nirqan: “Manachus clavokunaq t’oqosqanta makinpi rikusaq, dedoytapas clavokunaq t’oqosqanman mana winasaqchu, waqtannin t’urpusqankumanpas mana makiyta winasaqchu chayqa,+ manapunin creesaqchu”, nispa.
26 Chaymanta pusaq p’unchay qhepamanmi Jesuspa discipulonkunaqa wajmanta wasi ukhupi kasharqanku, Tomaspas paykunawanmi kasharqan. Jinan allin wisq’asqaña punku kasharqan chaypas, Jesusqa qonqaylla paykuna chaupipi rijurirqan, jinaspa nirqan: “Thaj kay kachun qankunapaq”,+ nispa.
27 Chaymantataq Tomasta nirqan: “Qhawariy makiyta, dedoykita kayman winaykuy; makiykitapas waqtanniyman winaykuy, amaña iskayaychu, aswanpas creey”, nispa.
28 Jinan Tomasqa payta nirqan: “¡Señorníy, Diosníy!”, nispa.
29 Chaymi Jesusqa payta nirqan: “¿Rikuwasqaykiraykuchu creenki? Kusisqan kanku mana rikuspalla creeqkunaqa”, nispa.
30 Jesusqa imaymana señalkunatawanmi ruwarqan discipulonkunaq ñaupanpi, chaykunaqa manan kay qelqa k’uyupiqa qelqasqachu kashan.+
31 Kaypi qelqasqakunan ichaqa kashan Jesusqa Diospa Churin Cristo kasqanpi iñinaykichispaq, paypi iñisqaykichisrayku sutinpi kausayniyoq kanaykichispaqwan.+
Uraypi willakuykuna
^ Chayqa karqan domingo p’unchaymi, judío runakunapaqqa chaymi karqan semana qallariy p’unchay.
^ Qhaway Explicasqa simikuna nisqapi “Rabí, raboni” nisqata.
^ Chaypiqa “Diospa atiyninta” nillanmantaqmi. Qhaway Explicasqa simikuna nisqapi “Santo espíritu” nisqata.
