Juan 1:1-51
1 Qallariypin Simiqa karqan,+ Simitaq Dioswan kasharqan;+ chay Simiqa Dios jinan karqan.*+
2 Qallariypiqa paymi Dioswan kasharqan.
3 Tukuy imaymanapas paywanmi ruwasqa karqan.+ Mana paywanqa manan imapas ruwasqachu karqan.
4 Paywanmi kausayqa paqarirqan, chay kausaytaq runakunapaq k’anchay karqan.+
5 K’anchayqa tutayaqpin k’anchan,+ manataqmi tutayaqqa chay k’anchayta wañuchiyta atinchu.
6 Juj runatan Dios kachamurqan, paypa sutinmi karqan Juan.+
7 Paymi jamurqan chay k’anchaymanta willaq,+ chhaynapi llapa runakuna paypa willasqanwan creenankupaq.
8 Payqa manan chay k’anchaychu karqan,+ aswanmi payqa jamurqan chay k’anchaymanta willaq.
9 Llapa runaman k’anchaq cheqaq k’anchayqa kay pachaman jamunanpaqñan kasharqan.+
10 Kay pachaqa paywanmi ruwasqa karqan;+ payqa kay pachapin kasharqan,+ kay pachan ichaqa mana reqsirqanchu.
11 Payqa llaqtanmanmi jamurqan, llaqtamasinkunan ichaqa mana chaskirqankuchu.
12 Chaywanpas pikunachus payta chaskirqanku, chaykunamanmi atiyta qorqan Diospa wawankuna kanankupaq,+ paypa sutinpi iñisqankurayku.+
13 Paykunaqa manan runamantachu nacenku, ni tayta-mamanpa munasqanraykuchu ni runaq munasqanraykupaschu, aswanpas Diosmantan nacenku.+
14 Simiqa runamanmi tukurqan,+ jinaspa noqanchiswan kausarqan, paypa qhapaq atiynintapas rikurqanchismi. Chay qhapaq atiyqa imaynan juj tayta sapallan wawanman+ qhapaq atiyta qon, chhaynan karqan. Payqa Diospa sumaq qhawarisqanwan* cheqaq kaywan iman junt’aykusqa karqan.
15 (Paymantan Juanqa willarqan, alto kunkawanmi nirqan: “Paymantan noqaqa nirqaykichis: Qhepayta jamuqqa ñauparamuwanmi, noqamanta aswan ñaupaqtan payqa kausarqan, nispa”).+
16 Paymantan Diospa ancha sumaq sonqo kayninta askhatapuni chaskirqanchis, paypi Diospa ancha sumaq sonqo kaynin junt’a kasqanrayku.
17 Kamachikuy simiqa Moiseswanmi qosqa karqan,+ Diospa ancha sumaq sonqo kayninwan+ cheqaq kaywan imataq Jesucristowan jamurqan.+
18 Diostaqa manan pi runapas jayk’aqpas rikurqanchu;+ Tayta Diospa ladonpi kaq+ Dios jina sapallan Churin+ paytaqa reqsichiwarqanchis.+
19 Judiokunan Jerusalén llaqtamantapacha sacerdotekunata Leví runakunatawan Juanman kacharqanku: “¿Pin kanki?”,+ nispa tapumunankupaq.
20 Tapuqtinkun payqa sut’inta nirqan: “Manan noqachu Cristoqa* kani”, nispa.
21 Jinan paykunaqa tapurqanku: “Chhaynaqa, ¿pitaq kankiri? ¿Eliaschu kanki?”,+ nispa. Paytaq “manan paychu kani” nirqan. Jinaqtinmi tapullarqankutaq: “¿Jamunan karqan chay profetachu kanki?”,+ nispa. Paytaq “manan” nillarqantaq.
22 Jinan paykunaqa wajmanta tapullarqankutaq: “¿Pipunitaq kankiri? Niwayku, chhaynapi kachamuwaqniyku runakunaman willanaykupaq. ¿Imaninkin qan kikiykimanta?”, nispa.
23 Jinan payqa nirqan: “Noqaqa profeta Isaiaspa nisqan jina,+ Jehová* Diospa ñanninta allichaychis,+ nispa ch’inneqpi wajakuqmi kani”, nispa.
24 Chay runakunaqa fariseokunaq* kachamusqanmi karqanku.
25 Chaymi paykunaqa tapurqanku: “Manataq Cristochu ni Eliaschu ni profetapaschu kanki chayqa, ¿imanaqtintaq bautizankiri?”, nispa.
26 Juantaq paykunata nirqan: “Noqaqa unuwanmi bautizani, ichaqa qankuna ukhupin kashan juj mana reqsisqaykichis runa,
27 qhepayta jamuq runa; noqaqa manan usut’anpa watullantapas paskanaypaq jinachu kani”,+ nispa.
28 Chaykunaqa pasarqan Betaniapin,* chayqa kasharqan Juanpa bautizasqan Jordán mayu chimpapin.+
29 Qhepantin p’unchaytaq Juanqa Jesusta rikurqan payman jamushaqta, jinan nirqan: “¡Qhawariychis, paymi Diospa corderonqa,+ paymi kay pachamanta juchata chinkachinqa!+
30 Paymantan noqaqa nirqani: Qhepaytan juj runa jamushan, paymi ñauparamuwan noqamanta ñaupaqta kausasqanrayku,+ nispa.
31 Manan ni noqapas paytaqa reqsirqanichu, ichaqa Israelpi reqsisqa kananpaqmi unupi bautizaspa jamurqani”,+ nispa.
32 Juanqa nillarqantaqmi: “Santo espiritutan* rikuni cielomanta paloma jina uraykamushaqta, pay patapi tiyaykuqtawan.+
33 Manan ni noqapas paytaqa reqsirqanichu, unupi bautizanaypaq kachamuwaqniymi ichaqa niwarqan: Pimanchus santo espíritu uraykamuspa pay patapi tiyaykuqta rikunki,+ chaymi santo espirituwan bautizaqqa kanqa,+ nispa.
34 Noqaqa rikunipunin chayta, chaymi willani payqa Diospa Churin kasqanta”,+ nispa.
35 Qhepantin p’unchaymi Juanqa chaypi sayashallarqantaq iskay discipulonkunapiwan,
36 jinan Jesusta chayninta pasashaqta rikuspa nirqan: “¡Qhawariychis, paymi Diospa corderonqa!”,+ nispa.
37 Chayta uyarispan chay iskaynin discipulonkunaqa Jesuspa qhepanta rirqanku.
38 Jesustaq kutirispa paykunata rikurqan qhepan rishaqta, jinan paykunata tapurqan: “¿Imatan munashankichis?”, nispa. Jinan paykunaqa nirqanku: “Rabí,* ¿maypitaq alojakushankiri?”, nispa (rabí simiqa “yachachikuq” ninantan nin).
39 Chaymi Jesusqa nirqan: “Jaku rikuchimusaykichis”, nispa. Paykunataq rispa rikurqanku maypichus alojakusharqan chayta, chay ratuqa las cuatro tarden jinan* kasharqan, jinaspa paywan chay p’unchaypi qhepakurqanku.
40 Juanpa nisqanta uyarispa Jesuspa qhepanta iskay riqkunamanta jujninqa Simón Pedroq wayqen Andresmi+ karqan.
41 Payqa manaraq imatapas ruwashaspan wayqen Simonta maskharqan, jinaspa nirqan: “Mesiastan tariramuyku”,+ nispa (Mesías simiqa “Cristo” ninantan nin).
42 Jinaspa Jesuspa kasqanman pusarqan. Jesustaq payta qhawaykuspa nirqan: “Juanpa wawan Simón,+ kunanmantan sutiyki Cefas kanqa”, nispa (chay sutiqa “Pedro”+ ninantan nin).
43 Qhepantin p’unchaymi Jesusqa Galileaman riyta munasharqan. Felipeta+ rikuspataq nirqan: “Qatikamuway”,* nispa.
44 Felipeqa Bejsaida llaqtamantan karqan, chay llaqtamantan kallarqankutaq Andreswan Pedrowanpas.
45 Felipen Natanaelta+ tariruspa nirqan: “Pimantachus Moisesqa kamachikuy simipi qelqarqan, jinallataq profetakunapas qelqarqanku chaytan tarimuyku, Josepa+ wawan Nazaret llaqtayoq Jesusta”, nispa.
46 Natanaelmi ichaqa nirqan: “¿Kanmanchu Nazaret llaqtamanta ima allinpas?”, nispa. Chaymi Felipeqa nirqan: “Jakuyá, rikuchimusayki”, nispa.
47 Natanael payman jamushaqta rikuspan Jesusqa nirqan: “Qhawariychis kay Israel runata, paypiqa manapunin engaño kanchu”,+ nispa.
48 Jinan Natanaelqa nirqan: “¿Imaynapitaq reqsiwankiri?”, nispa. Jesustaq nirqan: “Manaraq Felipe wajamushasuqtiykin noqaqa rikumuyki higos sach’a k’uchupi kashaqta”, nispa.
49 Jinan Natanaelqa nirqan: “Rabí,* qanqa Diospa Churinmi kasqanki, Israelpa reyninmi kasqanki”,+ nispa.
50 Jesustaq nirqan: “¿Higos sach’a k’uchupin rikumuyki, niqtiychu creenki? Chaykunamanta aswan admiranapaq kaqkunataraqmi rikunki”, nispa.
51 Jesusqa nillarqantaqmi: “Cheqaqtapunin niykichis: Cielotan kicharayashaqta rikunkichis, rikullankichistaqmi Diospa angelninkunatapas runaq Churinman uraykamushaqta wichashaqtawan”,+ nispa.
Uraypi willakuykuna
^ Griego rimaypiqa “diosmi karqan” ninmi.
^ Chaypiqa “Diospa ancha sumaq sonqo kayninwan” nillanmantaqmi.
^ Qhaway “Astawan yachanapaq A5” nisqata.
^ Qhaway Explicasqa simikuna nisqapi “Fariseokuna” nisqata.
^ Chayqa manan Jerusalenpa qayllanpi kaq Betania llaqtachachu karqan, aswanpas Jordán mayuq inti lloqsimuy ladonpi kaq Betanian karqan.
^ Chaypiqa “Diospa atiynintan” nillanmantaqmi. Qhaway Explicasqa simikuna nisqapi “Santo espíritu” nisqata.
^ Qhaway Explicasqa simikuna nisqapi “Rabí, raboni” nisqata.
^ Griego rimaypiqa “chunka kaq hora jinan” ninmi, chaytaqa yupaqku intiq lloqsimusqanmantapachan.
^ “Qatikamuway” nispaqa Jesuspa discipulon kapuymantan rimashan.
^ Qhaway Explicasqa simikuna nisqapi “Rabí, raboni” nisqata.
