Juan 13:1-38
13 Pascua Fiesta ñaupaqtaraqmi Jesusqa yacharqanña kay pachamanta ripuspa Taytanman kutipunan+ horaña kasqanta.+ Payqa anchatan munakurqan pikunachus paypa karqan chaykunata, tukukuykamapas munakushallarqanmi.+
2 Paykunaqa cenasharqankuñan, Saqrapas ñan Simonpa wawan Judas Iscarioteq+ sonqonpi yuyayta churasqaña Jesusta jap’ichinanpaq.+
3 Jesusqa yacharqanmi tukuy imatapas Taytan payman jap’ichisqanta, Diosmanta jamusqanta, Diosman kutipunanña kashasqantapas.+
4 Chaymi payqa mijushasqanmanta jatarispa jawa p’achanta ch’utikuspa juj ladoman churarqan, jinaspa juj toallawan cinturanta k’uyukurqan.+
5 Chaymantataq juj puruñaman unuta jich’aykuspa discipulonkunaq chakinta maqchiyta qallarirqan, jinaspa cinturanta k’uyukusqan toallawan ch’akichirqan.
6 Simón Pedroman qayllaykuqtinmi, Pedroqa nirqan: “Señor, ¿maypis chakiyta maqchiwankiman?”, nispa.
7 Jinan Jesusqa payta nirqan: “Imachus ruwasqaytaqa manan kunanqa entiendenkiraqchu, chaymantaqa entiendellankin”, nispa.
8 Pedrotaq ichaqa nirqan: “Qanqa manapunin chakiytaqa maqchiwankimanchu”, nispa. Chaymi Jesusqa nirqan: “Manachus maqchisayki chayqa,+ manañan noqawanchu purinki”,* nispa.
9 Jinan Simón Pedroqa nirqan: “Señor, chhaynaqa ama chakillaytachu maqchiway, aswanpas makiytawan umaytawan maqchiway”, nispa.
10 Jesustaq payta nirqan: “Allin bañasqa kaqqa llapan cuerponpin limpioña kashan, chakillantañan maqchikunan. Qankunaqa limpioñan kashankichis, ichaqa manan llapaykichischu”, nispa.
11 Payqa yacharqanñan pichus jap’ichinan karqan chayta,+ chaymi nirqan: “Manan llapaykichischu limpio kashankichis”, nispa.
12 Chakinkuta maqchiyta tukuspataq jawa p’achankunawan churakuspa wajmanta mesapi tiyaykurqan, jinaspa paykunata nirqan: “¿Entiendenkichischu imaraykuchus chay ruwasqayta?
13 Qankunaqa, yachachikuq, Señor niwankichismi ¿riki? Chaytaqa allintan ninkichis, chaypunin kani.+
14 Noqaqa Señorña yachachiqña kashaspapas maqchirqaykichistaq chakiykichista chayqa,+ qankunapas maqchinakunaykichismi chakiykichistaqa.+
15 Noqan ejemplota churashaykichis; chayrayku, imaynatachus ruwarqaykichis, chhaynallatataqmi qankunapas ruwanaykichis.+
16 Cheqaqtapunin niykichis: Kamachiqa manan patronninmantaqa kuraqchu, manallataqmi kachasqapas kachaqninmantaqa kuraqchu.
17 Yachankichistaq chaykunata chayqa, chayman jina ruwaspaykichisqa ancha kusisqan kankichis.+
18 Manan llapaykichismantachu rimashani; noqaqa reqsinin ajllasqaykunataqa. Aswanpas kaytaqa nishaykichis Diospa simin qelqapi nisqan junt’akunanpaqmi,+ chaypin nishan: T’antata mijuqmasiymi noqa contra jataripun,*+ nispa.
19 Manaraq chaykuna pasashaqtinmi kunan nishaykichis, chhaynapi chaykuna pasaqtinqa noqamanta rimashasqanta yachanaykichispaq.+
20 Cheqaqtapunin niykichis: Pipas kachasqayta chaskiqqa noqatawanmi chaskishawan,+ noqata chaskiwaqtaq kachamuwaqniytawan chaskishan”,+ nispa.
21 Chaykunata nisqan qhepamanmi Jesusqa sinchitapuni llakikurqan, jinaspa sut’inta paykunata nirqan: “Cheqaqtapunin niykichis: Qankunamanta jujniykichismi enemigoykunaman jap’ichiwanqa”,+ nispa.
22 Jinan discipulonkunaqa admirasqa qhawarinakurqanku, paykunaqa manan yacharqankuchu pimantachus rimasharqan chayta.+
23 Jesuspa munakusqan discipulonmi+ paypa ladonpi* kasharqan.
24 Paytan Simón Pedroqa umallanwan wajarispa nirqan: “¿Pimantan rimashan?”, nispa.
25 Jinan payqa Jesuspa qhasqonman* k’iraykuspa tapurqan: “Señor, ¿pitaqri?”,+ nispa.
26 Jinan Jesusqa nirqan: “Pimanchus t’anta phasmi challpusqayta qosaq chaymi”,+ nispa. Jinaspan t’antata challpuspa Simón Iscarioteq wawan Judasman qorqan.
27 Chay t’anta phasmita chaskikusqan qhepamanmi, Satanasqa Judaspa sonqonman jaykurqan.+ Chaymi Jesusqa Judasta nirqan: “Imachus ruwanaykita usqhaylla ruwamuy”, nispa.
28 Ichaqa mesapi kashaqkunamantaqa manan mayqenninkupas yacharqankuchu imaraykuchus chay nisqanta.
29 Wakinmi nisharqanku: “Fiestapaq imakunachus faltashawanchis chayta rantimuy, otaq, wajchakunaman imallatapas qomuy nispapaschá nishan”, nispanku; chaytaqa nisharqanku Judas qolqe churana cajata jap’isqanraykun.+
30 Jinan Judasqa t’antata chaskikuspa jina chaymanta lloqsirqan, chay ratuqa tutañan kasharqan.+
31 Pay lloqsiqtinmi Jesusqa nirqan: “Kunanmi runaq Churinqa jatunchasqa kanqa,+ payraykun Diospas jatunchasqa kanqa.
32 Dios kikinmi paytaqa jatunchanqa,+ usqhayllataqmi jatunchanqapas.
33 Wawallaykuna, juj chhikan tiempollatawanñan qankunawan kasaq. Qankunaqa maskhawankichismi, ichaqa imaynan wakin judiokunatapas nirqani, chhaynatan qankunatapas kunan niykichis: Maymanchus risaq chaymanqa manan jamuyta atiwaqchischu,+ nispa.
34 Juj mosoq kamachikuytan qoykichis: Jujkuna-jujkunawanmi munanakunkichis. Imaynan noqapas munakuykichis,+ chhaynallatataqmi qankunapas jujkuna-jujkunawan munanakunkichis.+
35 Qankunapura munanakusqaykichispin+ lliupas yachanqaku discipuloykuna kasqaykichista”, nispa.
36 Jinan Simón Pedroqa payta nirqan: “Señor, ¿maytataq rinkiri?”, nispa. Jesustaq nirqan: “Maymanchus risaq chaymanqa manan qhepayta jamuyta atiwaqraqchu, chaymantañan ichaqa jamunki”,+ nispa.
37 Pedrotaq nirqan: “Señor, ¿imanaqtintaq kunanri mana qhepaykita jamuyta atiymanchu? Noqaqa wañunayña kaqtinpas, wañuymanmi qanraykuqa”,+ nispa.
38 Jinan Jesusqa nirqan: “¿Cheqaqtachu noqarayku wañuwaq? Cheqaqtapunin niyki: Manapunin galloqa waqanqachu, kinsa kutita negawanaykikama”,+ nispa.
Uraypi willakuykuna
^ Chaypiqa “manan noqaqmanta jujninchu kanki” nillanmantaqmi.
^ Griego rimaypiqa “talonninta noqa contra oqarin” ninmi.
^ Griego rimaypiqa “qhasqonpi” ninmi. Qhasqotaqa “pecho” nillankutaqmi.
^ Qhasqotaqa “pecho” nillankutaqmi.
