Juan 17:1-26
17 Chaykunata rimayta tukuspan Jesusqa cielota qhawarispa nirqan: “Taytáy, ñan hora chayaramunña. Churiykita jatunchay paypas qanta jatunchanasuykipaq,+
2 chhaynapi lliu runata kamachinanpaq atiyta qosqaykiman jina,+ payman jap’ichisqayki lliu runakunaman wiñay kausayta qonanpaq.+
3 Paykuna wiñay kausayta+ chaskinankupaqqa qan sapallan cheqaq Diostan reqsinanku,*+ reqsinallankutaqmi kachamusqayki Jesucristotapas.+
4 Noqaqa ñan tukuniña qowasqayki llank’anataqa,+ chaywanmi kay pachapi jatunchaykiña.+
5 Taytáy, jatunchaway; imaynan manaraq kay pachapi runakuna kashaqtin jatunchawarqanki chhaynata ladoykipi kachispa jatunchaway.+
6 ”Kay pachamanta qowasqayki runakunamanmi sutiykita reqsichiniña.+ Paykunaqa qanpan karqan, ichaqa noqamanmi qopuwarqanki, paykunaqa kasukunkun simiykitapas.
7 Kunanqa yachankuñan tukuy imaymana rimasqaypas ruwasqaypas qanmanta jamusqanta;
8 chaytaqa yachanku lliu ima niwasqaykikunata paykunaman willasqayraykun,+ chaykunata chaskikuspan paykunaqa yachanku sutiykipi jamusqayta,+ creenkutaq qanpuni kachamuwasqaykitapas.+
9 Paykunapaqmi mañakamuyki, manan kay pachapaqchu, aswanpas qowasqayki runakunapaqmi, paykuna qanpa kasqankurayku.
10 Llapa kaqniykunaqa qanpan, qanpa kaqniykikunapas noqaqmi;+ qowasqaykikunaqa noqatan jatunchawanku.
11 ”Noqaqa qanmanmi jamushani, chaymi manaña kay pachapichu kasaq, paykunan ichaqa kay pachapi kashanku.+ Taytáy, qanqa ch’uyan kanki, qowasqayki sutiykirayku paykunata qhawariykuy,+ chhaynapi paykunapas noqanchis jina jujlla* kanankupaq.+
12 Paykunawan kashaspayqa qowasqayki sutiykiraykun noqaqa paykunata qhawariq kani,+ noqan cuidaqpas kani; manan mayqenninkupas chinkarqanchu,+ aswanmi jujlla, pichus ch’usaqyachisqa kanqa chaylla,+ chhaynapi simiyki qelqa junt’akunanpaq.+
13 Kunanmi ichaqa qanman jamushani, chaymi kaykunataqa kay pachallapiraq kashaspay rimashani, chhaynapi paykunapas noqa jina ancha kusisqa kanankupaq.+
14 Noqan simiykita paykunaman willarqani, kay pacha runakunan ichaqa paykunata cheqnikunku, mana kay pacha runakuna jinachu kasqankurayku,+ noqapas manallataqmi kay pacha runakuna jinachu kani.
15 ”Noqaqa mañakamushayki manan kay pachamanta paykunata orqonaykipaqchu, aswanpas Satanasmanta* waqaychanaykipaqmi.+
16 Imaynan noqapas mana kay pacha runakuna jinachu kani,+ chhaynallataqmi paykunapas mana kay pacha runakuna jinachu kanku.+
17 Cheqaq kaqwan paykunata ch’uyanchay;*+ simiykin cheqaq kaqqa.+
18 Imaynan qanpas kay pachaman kachamuwarqanki, chhaynatan noqapas paykunata kay pachaman kacharqani.+
19 Noqaqa paykunaraykun ch’uyalla kashani, chhaynapi paykunapas cheqaq kaqwan ch’uya kanankupaq.
20 ”Manan paykunallapaqchu noqaqa mañakamushayki, pikunachus paykunata uyarispa noqapi iñinqaku chaykunapaqwanmi mañakamushayki,
21 chhaynapi llapallanku jujlla kanankupaq;+ imaynan qanpas, Taytáy, noqawan jujlla kanki, noqapas qanwan jujlla kani,+ chhaynallataq paykunapas noqanchiswan jujlla kanankupaq, chhaynapi kay pacha runakuna qanpa kachamusqayki kasqayta creenankupaq.
22 Chaymantapas, noqaqa respetanin paykunataqa imaynan qanpas respetawanki jinata, chhaynapi paykunapas noqanchis jina jujlla kanankupaq.+
23 Noqaqa paykunawan jujllachasqan kashani, qantaq noqawan jujllachasqa kashanki, chhaynapi paykuna allin jujllachasqa kanankupaq.* Chhaynapin kay pacha runakunaqa yachanqaku qanpa kachamuwasqaykita, imaynan noqata munakuwanki chhaynata paykunatapas munakusqaykitawan.
24 Taytáy, qowasqayki runakunapaqmi mañakamuyki maypichus kasaq chaypi paykunapas noqawan kuska kanankupaq,+ chhaynapi qowasqayki qhapaq atiyta rikunankupaq. Munakuwasqaykiraykun chaytaqa qowarqanki manaraq runakuna kay pachapi mirayta* qallarishaqtinku.+
25 Chanin Taytáy, kay pacha runakunaqa manapunin reqsisunkikuchu,+ noqan ichaqa reqsiyki,+ kay qowasqayki runakunapas yachankuñan noqaqa qanpa kachamusqayki kasqayta.
26 Paykunamanmi noqaqa sutiykita reqsichini, reqsichishallasaqtaqmi kanpas,+ chhaynapi paykunapas munakuwasqayki munakuyta rikuchinankupaq, chhaynapin noqaqa paykunawan jujllachasqa kasaq”,+ nispa.
Uraypi willakuykuna
^ Chaypiqa “qanmantan yachashanallanku” nillanmantaqmi.
^ Chaypiqa “juj yuyaylla” nillanmantaqmi.
^ Griego rimaypiqa “millay kaqmanta” ninmi.
^ Chaypiqa “sapaqchay” otaq “ch’uyaman tukuchiy” nillanmantaqmi.
^ Chaypiqa “cheqaqtapuni juj yuyaylla kanankupaq” nillanmantaqmi.
^ Chaypiqa Adán Evaq wawankunamantan rimashan.
