1 Pedro 4:1-19
4 Cristoqa runa kachkaspanmi ñakarirqa,+ hinaptinqa qamkunapas pay hina piensanaykichikpaqyá kallpanchakuychik*, pipas ñakariqqa hucha ruwaytam saqirunña,+
2 chaynapi kawsanankama manaña runakunapa munasqanta ruwananpaq,+ aswanqa Diospa munaynintaña ruwananpaq.+
3 Ñam qamkunaqa runakunapa munasqanta ruwarunkichikña,+ qamkunaqa mana pinqakuspam mana allinkunata ruwarqankichik*, sunquykichikpa mana allinkuna munapayasqankunatam ruwarqankichik, sinkakuyllapim purirqankichik, pinqakuypaq fiestakunapim* purirqankichik, huñunakuruspa tomaykunapim purirqankichik hinaspapas taytacha-mamachakunatam yupaycharqankichik, chayqa millakuypaqmi.+
4 Runakunaqa manam entiendenkuchu paykuna hina mana allinkunata imanasqa manaña ruwasqaykichiktaqa, chaymi qamkunamanta mana allinkunata rimanku.+
5 Paykunaqa Cristomanmi cuentata qunqaku, Cristoqa juzganqam wañuqkunatapas kawsaqkunatapas.+
6 Chaymi sumaq willakuykunaqa wañusqa kaqkunamanpas* willasqa karqa,+ chaynapi runakunapa juzgasqan kaspankupas Diospa atiyninpa yanapakuyninman hinaña kawsanankupaq.
7 Tukuy imapa tukupayninmi hichpallapiña kachkan. Chayraykuyá allin yuyayniyuq kaychik,+ tukuy tiempo Dios mañakuytapas amayá qunqaychikchu.+
8 Astawanqa tukuy sunqumantayá llapallaykichik kuyanakuychik,+ kuyakuq runaqa maynaña huchatapas pampachanmi.+
9 Ama rimapakuspayá llapallaykichik samaykachinakuq kaychik.+
10 Imapas ruway yachasqaykichikqa Diosmantam, chayman hina ruwaspayá llapallaykichik yanapanakuychik, chaytaqa ruwaychik Diospa ancha kuyakuyninta* chaskiq allin sirviente* hinayá. Diospa ancha kuyakuyninqa tukuy imapim qawakun.+
11 Pipas rimaspanqa Diosmanta kaq willakuykunatayá rimachun, pipas hukkunata yanapaspanqa Diospa kallpa qusqanwan yanapasqantayá riqsikuchun.+ Chaynapi Dios tukuy imapipas Jesucristowan hatunchasqa kananpaq.+ Diosqa wiña-wiñaypaq ancha respetanapaq hinaspa atiyniyuq Diosmi. Chaynayá kachun*.
12 Kuyasqallaykuna, amayá hukmanyaychikchu llumpa-llumpay sasachakuykunapi kasqaykichikwanqa,+ llapallanchikmiki chayna sasachakuykunapiqa kananchik.
13 Aswanqa kusikuychikyá+ Cristopa ñakarisqankunawan ñakarispaykichikqa,+ chaynapi sutilla kancharisqan tiempopipas ancha-anchata kusikunaykichikpaq.+
14 Cristopa qatiqnin kasqaykichikrayku insultasqa kaspaykichikqa kusisqayá kaychik,+ suma-sumaq kanchariq hinaspa chuyay-chuyay Diospa atiynin qamkunapi kasqanrayku.
15 Ichaqa amayá mayqinnikichikpas ñakarichunchu runa wañuchiq kasqanraykuqa, suwakuq kasqanraykuqa, mana allinkuna ruwaq kasqanraykuqa nitaq hukkunapa vidanpi chapukuq kasqanraykuqa.+
16 Pipas Cristota qatisqanrayku ñakarispanmi ichaqa mana pinqakunanchu,+ aswanqa hinallam Diosta hatunchanan Cristo hina kawsakuspan.
17 Ñam akllasqa tiempo chayaramunña Diospa runankunawan juicio qallarinanpaq,+ ñuqanchikwan juicio qallariptinqa,+ ¡imaraq kanqa Diospa sumaq willakuynin mana kasukuqkunawanqa!+
18 “Allin ruwaq runapas ñakayta salvakuchkaptinqa, ¡imaynaraq kanqa mana allin runakunaqa hinaspa huchasapa runakunaqa!”.+
19 Chaynaqa, Diospa munasqanta ruwasqankurayku ñakariqkunaqa allin kaqkunata ruwaspayá vidankuta unanchaq Diospa makinman churachunku, payqa nisqanman hina ruwaq Diosmi.+
Willakuykuna
^ Utaq: “Tantiakuychik”.
^ Qaway “mana pinqakuspa mana allin ruway” niqpa ima ninan kasqanta.
^ Utaq: “Chaqwallaña fiestakunapim”.
^ Kaypiqa rimachkan huchankurayku wañusqa hina kaqkunamantam.
^ Kaypiqa rimachkan mana kuyana kachkaspa kuyasqa kaymantam.
^ Utaq: “Wasipi allin nanachikuq”.
^ Utaq: “Amen”.
