1 Pedro 2:1-25
-
Diospa palabranpi yachayta maskanamanta (1-3)
-
Kawsaq rumikuna hina pirqasqa kaspanku Diospa atiyninpa yanapakuyninwan hatarichisqa wasi kanankumanta (4-10)
-
Diosta mana riqsiq runakunapa kasqanpi forasterokuna hina kawsanamanta (11, 12)
-
Kasukunamanta (13-25)
-
Qatipakunanchikpaq Cristo kasqanmanta (21)
-
2 Chaynaqa saqiychikyá tukuy mana allin ruwaykunata,+ llullakuyta, iskay uya kayta, envidianakuyta, pitapas yanqamanta tumpakuqllaña kayta*.
2 Chayllaraq naceq wawakuna+ ñuñuta maskachkaq hinayá qamkunapas astawan yachayta munaychik Diospa chiqap palabranmanta, chaywan wiñaspa salvasqa kanaykichikpaq. Diospa palabranqariki mana imawanpas yapasqa leche hinam.+
3 Qamkunaqa yachankichikmi señorqa sumaq sunqu kasqanta.
4 Qamkunaqa señorninchikmanmi asuykurqankichik, payqa kawsaq rumi hinam,+ paytam runakuna wischupakurqaku, Diospaqmi ichaqa akllasqa ancha valorniyuq rumi hina.+
5 Señorman asuykuspaykichikmi kawsaq rumikuna hina pirqasqa kachkankichik. Pirqasqaqa kachkankichik Diospa atiyninwan hatarichisqa wasi hina kanaykichikpaqmi,+ chaynapi chuya sacerdotekuna* kanaykichikpaq hinaspa Diospa atiyninpa yanapakuyninwan Jesucristorayku+ munasqanman hina ofrendakunata Diosman qunaykichikpaq.+
6 Chayraykum Diospa qillqan nin: “¡Qawaychik! Akllasqa kaq rumitam Sion muqupi tiyachichkani, esquinanpim allinnin rumita churachkani allinta hapinanpaq. Pipas chay rumipi hapipakuqqa* manam haykapipas pinqaypiqa kanqachu”, nispa.+
7 Chaynaqa iñisqaykichikraykum chay rumiqa qamkunapaq ancha valorniyuq, mana iñiqkunapaqmi ichaqa kayna qillqasqa kachkan: “Pirqaqkunapa wischupakusqanku rumiqa+ wasi pirqapa esquinanpi hapiq rumiñam rikurirun”, niq.+
8 Qillqasqataqmi kachkan: “Paytaqmi urmananku rumipas kanqa, paymi purinanku ñanpi harkaq* rumi kanqa”, niqpas.+ Paykunaqa Diospa palabranta mana kasukusqankuraykum mitkanku, chaynam kananku karqa.
9 Qamkunam ichaqa kankichik akllasqa ayllukuna, sacerdote kachkaspa kamachiqkuna, chuya runankuna*+ hinaspa Diospaq sapaqchasqa runakuna,+ chaynapi Diosqa alli-allin kasqanmanta* tukuy hinastinpi willakunaykichikpaq,+ paymi tutayaypi hina kasqaykichikmanta qayasurqankichik suma-sumaq achkiyninpi kanaykichikpaq.+
10 Ñawpaqtaqa manam Diospa runankunachu karqankichik, kunanmi ichaqa Diospa runankunaña kachkankichik.+ Ñawpaqtaqa mana llakipayasqam karqankichik, kunanmi ichaqa llakipayasqaña kachkankichik.+
11 Kuyasqallaykuna, huklaw llaqtayuqta hinaspa forasterokunata hinam ruegakuykichik,+ aychaykichikpa mana allinkuna munasqantaqa amayá ruwaychikchu,+ chaykunaqa contraykichikpim peleachkan.+
12 Diosta mana riqsiq runakunapa qayllanpiyá qatipakunapaq hina allinta kawsakuychik,+ chaynapim hucha ruwaqmanta hina contraykichikpi rimachkaspankupas allinkuna ruwasqaykichikta qawaspanku+ Diosta yupaychanqaku cuenta mañaq hamusqan punchawpi.
13 Señorninchikraykuyá kasukuychik runapa churasqan lliw autoridadkunata.+ Kasukunaykichikmi reyta,+ paykunaqa aswan munayniyuqmi kanku.
14 Kasukunaykichiktaqmi kamachiqpa churasqan autoridadkunatapas, paykunaqa mana allin ruwaqkunata castiganankupaqmi hinaspa allin ruwaqkunata hatunchanankupaqmi churasqa kachkanku.+
15 Diosqa munan allin kaqta ruwaspa mana entiendeq runakunapa yanqakuna rimasqanta upallachinaykichiktam.+
16 Pipapas manaña munaychakusqan runakuna hinayá kawsakuychik,+ amataqyá chayna kasqaykichikraykuqa mana allinkunataqa ruwaychikchu,+ aswanqa Diosta serviq runakuna hinayá kawsakuychik.+
17 Llapallan runakunata respetaychik,+ llapallan iñiqmasikichikta kuyaychik,+ Diostapas manchakuychik,+ kamachikuq runatapas respetaychik.+
18 Sirvientekunapas patronninkuta respetaspayá tukuy imapi kasukuchunku,+ amayá llampu sunqullatachu nitaq allin patronkunallatachu, aswanqa kasukuchunkuyá imapas ruwasqankuwan mana contentakuq patronkunatapas.
19 Ancha allinmi Diospaq allin concienciayuq kayta munaspan pipapas sasachakuykunata* aguantasqanqa hinaspa yanqamanta ñakarichisqa kasqanqa.+
20 Ichaqa, ¿imapaqtaq valen huchallikusqaykichikrayku maqapasqa kasqaykichikta aguantasqaykichikqa?+ Allin ruwasqaykichikmanta sasachakuykunapi kaspa aguantasqaykichikmi ichaqa Diospaqqa allinpuni.+
21 Chaypaqmi qamkunaqa qayasqa karqankichik, Cristopas qamkunaraykum ñakarirqa,+ hinaspanmi qatipakunaykichikpaq hina kawsakurqa, chaynapi imayna kasqanta allintapuni qatipakunaykichikpaq*.+
22 Payqa manam ima huchatapas ruwarqachu,+ nitaqmi pitapas llullakurqachu.+
23 Waknataña kamiptinkupas+ manam kutipakurqachu,+ ñakarichiptinkupas+ manam amenazarqachu, aswanqa allin ruwayman hina juzgaq juezpa makinmanmi churakuykurqa.+
24 Paymi qirupi* warkusqa kaspan+ huchanchikta cuerponpi aparqa,+ chaynapi huchamanta librasqa kananchikpaq hinaspa allinkuna ruwanapaqña kawsananchikpaq. “Heridasqa kasqanraykum allinña kachkankichik”.+
25 Qamkunaqa chullaruq ovejakuna hinam purirqankichik,+ kunanmi ichaqa kutirunkichik michiqman+ hinaspa vidaykichik cuidaqman.
Willakuykuna
^ Utaq: “Nanay simi kayta”.
^ Qaway kay palabrapa ima ninan kasqanta.
^ Utaq: “Iñiqqa”.
^ Utaq: “Huklawman muyuchiq”.
^ Utaq: “Nacion”.
^ Utaq: “Allinkuna ruwasqanrayku alabasqa kasqanmanta”.
^ Utaq: “Nanaykunata”.
^ Griego rimaypiqa nichkan: “Yupinta, rastronta qatinaykichikpaq”, nispam.
^ Utaq: “Kaspipi”.
