Bibliaqa ñuqanchikpaq Diospa chuya siminmi, chaymi payta riqsinapaqqa bibliata estudiananchik (Juan 17:3; 2 Timoteo 3:16). Chaypim Jehova Diosqa willakuchkan runakunapaq hinaspa kay pachapaq ima munaynin kasqanmanta (Genesis 3:15; Apocalipsis 21:3, 4).

Biblia hinaqa manam ima libropas runataqa yanapanmanchu. Bibliam yanapawanchik Jehova Dios hina kuyakuq hinaspa llakipayakuq kanapaq. Llumpay llakipi tarikuptinchikpas sunqullanchiktam tiyaykachin Diosman sunqu hinalla kanapaq. Biblia willawasqanchikraykutaqmi yachanchik kay pachapi runakunaqa Diospa munasqanman hina mana kawsasqankuta (Salmos 119:105; Hebreos 4:12; 1 Juan 2:15-17).

Bibliataqa hebreo, arameo hinaspa griego rimaypim qallariypiqa qillqarqaku, kunanñataqmi 3.000 masnin rimaykunapiña kachkan. Bibliallam achka rimaykunapiqa hinaspa maypiñapas kachkan. Chayna kananmantam bibliapi aswan riqsisqa willakuy nin: “Diospa gobiernonmanta kay sumaq willakuymi willakusqa kanqa enterollan kay pachapi llapallan nacionpi runakuna yachanankupaq, chayñam kay tiempoqa tukunqa”, nispa (Mateo 24:14).

Bibliamanta runamasinchikkunaman yachachina kasqanta yachaspam ancha-ancha respetowan revisaramuniku. Ñuqaykuqa munaniku bibliapi willakuykuna chaylla entiendekuq kanantam. Chaypaqmi yanapawarqaku sumaq ruwasqa Musuq allpa pachapi kawsaqkunapaq biblia sutiyuq ñawpaq biblianchik, chayqa ingles rimaypim 60 wata ñawpaqtaraq ruwasqa karqa. Chaywanpas kunanqa ñawpaqta hina manaña rimasqanchikraykum Musuq allpa pachapi kawsaqkunapaq bibliata ruwaqkuna llapanta revisamurqaniku. Munanikum bibliaqa qallariypi qillqasqa kasqanman hina kananta chaynataq chaylla entiendenapaq hinaspa mana sasachakuspalla leenapaq kanantapas. Allinta revisamusqaykutam sumaqta willakuchkan “Imakunata yuyarispa biblia ruwanamanta”, “Kay bibliapa imayna ruwasqa kasqan” hinaspa “Imaynata biblia kunankama hinalla kasqanmanta” niq yachachikuykunapi.

Jehova Diosta kuyaqkunaqa hinaspa payta yupaychaqkunaqa munankum bibliaqa mana pantayniyuq hinaspa chaylla entiendekuq kananta (1 Timoteo 2:4). Chayraykum inglespi revisamurqaniku achka rimaykunaman ruwakunanpaq. Diosta maskaq runamasilláy, Diostam mañakullaniku kay bibliata leespa Diosta tarinaykipaq (Hechos 17:27).