Bibliapica huaquin cutinmi Jesustaca “Diospaj Churimi” can nishpa yachachin (Juan 1:49). Diospaj Churi nishpaca Yaya Diosca causaita cuj cashcamantami Jesustaca pai rurashcata intindichin (Salmo 36:9; Apocalipsis 4:11). Bibliapica Yaya Diosca gentecuna laya huahuacunata charishcataca mana yachachinchu.

 Bibliapica angelcunapish Yaya Diospaj churicuna cashcatami yachachin (Job 1:6). Punta cꞌari Adanpish Diospaj churi cashcatami yachachin (Lucas 3:38). Pero Bibliapica Yaya Diosllataj paipaj maquihuan punta churita rurashcamantami Jesusca ashtahuan valishca can.

•  ¿Jesús cai Allpaman manaraj shamushpaca maipitaj causarca?

•  ¿Jesusca imatataj jahua pachapica ruraj carca?

 Paica jahua pachapimi causaj carca, shuj espiritumi carca. Jesusllatajmi: ‘Ñucaca jahua pachamantami shamurcani’ nirca (Juan 6:38; 8:23).

 Jehová Diosca imata manaraj rurashpami Jesustaca puntata rurarca. Jesusmanta parlashpaca:

•   Colosenses 1:15-pica: “Paica cai pachata manaraj rurajpi ña tiyajmi” can ninmi.

•   Apocalipsis 3:14-pica: ‘Paica Dios tucuita ruranapaj ña tiyajmi can’ ninmi.

 Jesusca ñaupa tiempomantami ña tiyashca. Paica Bibliapi nishcacunatami tucuita pajtachirca (Miqueas 5:2; Mateo 2:4-6).

 Jesusca Yaya Diospaj ladopimi carca. Paica paipaj Yayata mañacushpaca: “Yayitu, cai pacha manaraj tiyajpi, ima shinami ishquindij sumaj, tucuita rurai tucuj carcanchij, chashnallataj cunanpish quiquinpaj cꞌuchupi tucuita rurai tucuj cashcata ñucataca ricuchihuai” nircami (Juan 17:5).

 Jesusca paipaj Yayataca tucui imalla tiyashcacunatami rurashpa ayudarca. Paica paipaj Yayahuan ishqui tucushpami allichishpa trabajarca (Proverbios 8:30). Bibliapica Jesusmantaca: ‘Taita Diosca paihuanmari jahua pachapi, cai pachapi tucui imalla tiyajtaca rurarca’ ninmi (Colosenses 1:16).

 Yaya Diosca paipaj Churihuanmi tucui imalla tiyashcacunataca rurarca. Angelcunamanta callarishpami rurashpa ayudarca (Apocalipsis 5:11). Caipi yuyashun: Shuj runaca huasicunata ima shina ruranatami dibujan. Cutin shujtaj runaca chai dibujocunata ricushpami huasicunata shayachin. Chashnallatajmi Jehová Diosca huasicunata dibujaj runa shina can. Cutin Jesusca huasicunata shayachij runa shinami tucuita rurashpa ayudarca.

 Jesusca Rimashca shutipishmi carca. Paica cai Allpaman manaraj shamujpica ‘Rimashca shutimi’ carca (Juan 1:1). Rimashca shutica Yaya Dios paipaj Churihuan shujtaj angelcunaman paipaj mandashcacunata huillanaman cachashcatami nisha nin.

 Jesusca Yaya Diospaj mandashcacunatami gentecunaman huillashca canga. Shinallataj Edén huertapipish Adán Evaman Yaya Dios imalla mandashcatami huillashca canga (Génesis 2:16, 17). Yaya Dios cusha nishca llajtaman israelitacuna ricujpipish Jesusllatajmi pushashca canga. Israelitacunaca Jesús nishcacunata uyashpami cazushcacuna canga (Éxodo 23:20-23). a