Juan 1:1-51
-
Rimashca shutica aichayujmi tucurca (1-18)
-
Bautizaj Juan huillashcamanta (19-28)
-
Jesusca Diospaj Malta Ovejami (29-34)
-
Jesusta punta catijcunamanta (35-42)
-
Felipemanta, Natanaelmantapish (43-51)
1 Callaripica shuj Rimashca* shutimi tiyarca. Chai Rimashca shutica Dioshuanmi carca. Rimashca shutica Dios shinami* carca.
2 Paica callarimantami Dioshuan carca.
3 Tucui imalla tiyashcatami Diosca paihuan rurarca.
Pai illajllaca imapish mana tiyai callarircachu.
4 Paihuanmi causaica tiyai callarirca. Chai causaimi gentecunapaj luz carca.
5 Luzca amsapimi achijyachicun. Shinapish amsaca luztaca mana vinci tucunchu.
6 Dios cachashca shuj runami shamurca. Paica Juan shutimi carca.
7 Cai runaca pai huillajpi tucui laya gentecuna crichunmi chai luzmanta huillaj shamurca.
8 Juanca mana chai luzchu carca. Ashtahuanpish chai luzmanta gentecunaman huillangapajmi shamurca.
9 Tucui laya gentecunata achijyachijtaj luzca ñallami cai pachaman chayamugrirca.
10 Paica ñami cai pachapi carca. Diosca paihuanmi cai pachataca* rurarca. Shinapish gentecunaca paitaca mana rijsircacunachu.
11 Paipaj quiquin llajtamanmi shamurca. Shinapish paipaj llajta gentecunaca mana chasquircacunachu.
12 Chashnapish tucui paita chasquijcunamanca paipaj shutipi feta charishcata ricuchishpa catishcamantami Diospaj huahuacuna tucuchun ayudarca.
13 Paicunaca yahuarmanta, aicha munaimanta, shuj runapaj munaimantapish mana huacharircacunachu. Ashtahuanpish Diosmantami huacharircacuna.
14 Rimashca shutica aichayuj tucushpami ñucanchijpurapi causarca. Paitaca achijnicuj cajtami ricurcanchij. Shuj yaya paipaj shujlla churita alli nishca shinami achijnicurca. Dios yallitaj llaquij* cashcatami paica chasquirca. Shinallataj mana llullashpami yachachirca.
15 (Juanca paimantami huillarca. Caparishpaca: “¡Paimantami cashna huillarcani, ‘Ñucapaj qꞌuipa shamujca ñucata ñaupashpami shamurca. Paica ñucapaj ñaupami causarca’!” nircami).
16 Paica Diospaj yallitaj llaquij canahuan jundami. Chai llaquij canatami paimantaca tucuicuna jahuanpi jahuanpi chasquicunchij.
17 Diosca Leytaca Moisesmanmi huillachirca. Ashtahuanpish pai yallitaj llaquij cashcata, mana llullatapish Jesucristohuanmi ricuchirca.
18 Diostaca ni pi mana nunca ricushcachu. Yayapaj ladopi* caj Dios shina shujlla churimi* pai ima shina cashcataca yachachishca.
19 Juanca pai pi cashcataca cashnami huillarca. Jerusalenmanta judiocunami “¿Canca pitaj cangui?” nishpa Juanta tapuchun sacerdotecunata, levitacunatapish cacharca.
20 Chaimi Juanca upalla saquirinapaj randica paicunaman cutichishpaca: “Ñucaca mana Cristochu cani” nirca.
21 Chashna nijpimi paicunaca: “Shinashpaca ¿pitaj canguiyari? ¿Eliaschu cangui?” nishpa tapurcacuna. Chaimi Juan cutichishpaca: “Mana, mana Eliaschu cani” nirca. Shinashpaca: “¿Shamuna cashca Profetachu cangui?” nircacunami. Chaipimi Juanca: “¡Mana, chaipish mana canichu!” nishpa cutichirca.
22 Chashna cutichijpimi paicunaca: “¿Canca pi cashcatataj yuyangui? Ñucanchijta cachajcunaman huillangapaj can pi cashcata huillai” nircacuna.
23 Chashna nijpimi Juanca: “Profeta Isaías nishca shinaca ‘¡Jehová* Diospaj ñanta derechaichij!’ nishpa chaquishca pambapi caparishpa huillajmi cani” nirca.
24 Juanta tapunaman shamujcunataca fariseocunami cachashcacuna carca.
25 Paicunaca: “Canca Cristopish, Eliaspish, shamuna cashca Profetapish mana cashpaca, ¿imamantataj bautizanguiyari?”* nishpami tapurcacuna.
26 Chashna tapujpimi Juanca cashna cutichirca: “Ñucaca yacullahuanmi bautizani. Ashtahuanpish cancunapurapica shujmari tiyan. Paitaca mana rijsinguichijchu.
27 Paica ñucapaj qꞌuipami shamun. Ñucaca paipaj pargatecunapaj huatucunallatapish mana pascai tucunichu” nircami.
28 Jordán yacuta pasashpa Betania* uchilla pueblopimi tucui chaicunaca tucurca. Chaipimi Juanca bautizacurca.
29 Cayandij punllami Juanca Jesús paipajman shamucujta ricurca. Chaita ricushpami Juanca: “¡Ricuichij, paimari Diospaj Malta Oveja. Paimi cai pachamanta juchata anchuchinga!
30 Paimantami cashna huillarcani. ‘Ñucapaj qꞌuipa shamujca ñucata ñaupashpami shamurca. Paica ñucapaj ñaupami causarca’.
31 Ñucapish paitaca mana rijsircanichu. Ashtahuanpish Israelpi causajcuna paita rijsichunmi yacupi bautizacuni” nirca.
32 Juanca cashnapishmi huillarca: “Jahua pachamanta Diospaj espíritu shuj paloma shina uriyamushpa paipaj jahuapi saquirijtami ricurcani.
33 Ñucapish paitaca mana rijsircanichu. Shinapish yacupi bautizanaman cachaj Diosmi: ‘Ñuca espíritu shamushpa maijanpaj jahuapi saquirijtami ricungui. Chashnami espíritu santohuan pi bautizaj cashcata yachangui’ nirca.
34 Ñucatajmi chaitaca ricurcani. Chaimi paica Diospaj Churi cashcata huillani” nircami.
35 Cayandij punllapish cutinllatajmi Juanca paita ishqui catijcunandij chaillapitaj carca.
36 Jesús chaita pasacujta ricushpami Juanca: “¡Ricuichij, paimari Diospaj Malta Oveja!” nirca.
37 Chashna nijta uyashpami Juanta catij ishqui runacunaca Jesusta catircacuna.
38 Jesús tigrarishpaca paicuna caticujtami ricurca. Chaimi paica: “¿Imatataj mashcacunguichij?” nishpa tapurca. Chashna tapujpimi chai runacunaca: “¿Rabí, maipitaj saquiricungui?” nircacuna. (Rabí shimica “yachachij” nisha ninmi).
39 Chashna nijpimi Jesusca: “Jacuchij ricuchisha” nirca. Chaimi paicunaca paihuan rishpa maipi saquiricushcata ricurcacuna. Chai ratoca ñami casi las cuatro de la tarde carca. Chai chishica Jesushuanmi paicunaca saquirircacuna.
40 Juan ima nishcata uyashpa, Jesusta catishpa rij ishqui runamantaca shujca Simón Pedropaj huauqui Andresmi carca.
41 Chai qꞌuipaca Andresca paipaj huauqui Simonhuan tupashpami: “Mesiastamari* rijsimunchij” nirca. (Mesías shimica Cristo* nisha ninmi).
42 Chashna nishpaca Jesuspajmanmi pusharca. Simonta ricushpami Jesusca: “Canca Juanpaj churi Simonmi cangui. Cunanmantapachaca Cefas shutimi cangui” nirca. (Cefas shutica Pedro nisha ninmi).
43 Cayandij punllaca Jesusca Galileamanmi risha nicurca. Chaipimi Felipehuan tupashpaca: “Shamui, ñucata cati” nirca.
44 Felipeca Betsaida llajtamantami carca. Andrespish, Pedropish chai llajtallamantatajmi carcacuna.
45 Shinallataj Felipeca Natanaelhuan tupashpaca: “Moisesman cushca leypi nishca shina, profetacuna quillcashcapi nishca shinamari Nazaretmanta Josepaj churi Jesushuan tupashcanchij” nircami.
46 Chashna nijpimi Natanaelca: “¿Nazaretmantaca ima alli runataj llujshingari?” nirca. Chaimi Felipeca: “Shamui, canllataj ricungui” nirca.
47 Jesusca Natanael paipajman shamucujta ricushpami: “Ricuichij, cai israelita runata, paipica ima umana yuyaica mana tiyanchu” nirca.
48 Chaipimi Natanaelca: “¿Ima shinataj ñucataca rijsinguiyari?” nirca. Chaimi Jesusca: “Felipe manaraj cayajpimi cantaca higo yura ucupi cajta ricurcani” nirca.
49 Shina nijpimi Natanaelca: “Yachachij,* canmari Diospaj Churi cangui. Israel llajtata Jatun Mandajmari cangui” nirca.
50 Chashna nijpimi Jesusca: “¿Higo yura ucupi cajtami ricurcani nishcallamantachu ñucapica cringui? Caitapish yalli ashtahuan jatun rurashcacunatami ricungui” nirca.
51 Chaita nishca qꞌuipami Jesusca: “Cancunamanca manataj llullanichu. Cancunaca jahua pacha pascarishcatami ricunguichij. Chaipica Diospaj angelcunapish Runapaj Churipajman uriyacujta, huichiyacujtami ricunguichij” nirca.
Notacuna
^ Cai capitulopica “Rimashca” nishpaca Jesusmantami parlacun.
^ Griego rimaipica: “diosmi” ninmi.
^ O “gentecunataca”.
^ “Yallitaj llaquij” shimita huasha diccionariopi ricui.
^ O “Yayapaj pechopi”. Chashna nishpaca ashtahuan cꞌuyashca cashcatami ricuchin.
^ Griego rimaipica: “shujlla diosmi” ninmi.
^ “Jehová” shutita huasha diccionariopi ricui.
^ “Bautizana” shimita huasha diccionariopi ricui.
^ Caica mana Jerusalén cꞌuchullapi saquirij Betania llajtachu carca. Ashtahuanpish Jordán yacuta pasashpa inti llujshin ladopi saquirij Betaniami carca.
^ “Mesías” shimita huasha diccionariopi ricui.
^ “Cristo” shimita huasha diccionariopi ricui.
^ O “Rabí”.
