Apocalipsis 5:1-14
-
Shuj rolloca canchis sellocunahuanmi carca (1-5)
-
Malta Oveja rollota japishcamanta (6-8)
-
Sellocunata pascangapajmi derechota charin (9-14)
5 Jatun tiyarinapi tiyacujpaj alli lado maquipica ishqui ladoman* quillcashca rollotami ricurcani. Chai rolloca canchis sellocunahuan alli sellashcami carca.
2 Shinallataj achca poderta charij shuj angeltami ricurcani. Paica sinchita caparishpami: “¿Pitaj rollota pascangapaj, sellocunata pascangapajpish derechota charinyari?” nirca.
3 Shinapish jahua pachapipish, cai allpapipish, allpa ucupipish rollotaca ni pi mana pascai tucurcachu. Chaipi ima quillcashcatapish mana ricui tucurcachu.
4 Rollota pascangapaj, chaipi quillcashcata ricungapaj derechota ni pi mana charijta ricushpami yallitaj llaquirishpa huacarcani.
5 Shinapish shuj ancianoca: “Ama ashtahuan huacaichu. Ricui, Judapaj familiamanta caj León, Davidpaj sapimi mishashca. Paimi rollotapish, canchis sellocunatapish pascai tucun” nircami.
6 Jatun tiyarina chaupipi, chuscu querubincunapaj chaupipi, ancianocunapaj chaupipica huañuchishca shina caj shuj malta oveja shayacujtami ricurcani. Chai ovejaca canchis gachucunata, canchis ñahuicunatami charirca. (Ñahuicunaca Diospaj canchis espiritucunatami ricuchin. Chai espiritucunatami Diosca tucui allpa pachata cachashca).
7 Malta Ovejaca chai rato cꞌuchuyashpami jatun tiyarinapi tiyacujpaj alli lado maquimanta rollota japirca.
8 Rollota japijpica chuscu querubincunapish, 24 ancianocunapishmi Malta Ovejapaj ñaupajpi cungurircacuna. Cada unomi shuj arpata, inciensohuan junda oro tazoncunatapish charicurcacuna. (Inciensoca jucha illajcunapaj mañaicunatami ricuchin).
9 Shinallataj shuj mushuj cantotami cashna nishpa cantancuna: “Canmi rollota japingapaj, sellocunata pascangapajpish derechota charingui. Canca huañuchishcami carcangui. Cambaj yahuarhuanmi tucui familiacunamanta, rimaicunamanta, pueblocunamanta, llajtacunamanta gentecunata Diospajlla cachun randircangui.
10 Canmi ñucanchij Yaya Diosta sirvichun mandajcunata, sacerdotecunata rurarcangui. Paicunami tucui cai allpa pachata mandanga” nincunami.
11 Jatun tiyarina muyundijpi, querubincunapaj muyundijpi, ancianocunapaj muyundijpipish achca angelcunatami ricurcani. Paicuna rimashcatapishmi uyarcani. Paicunaca mana yupaipaj huaranga huaranga, achca huarangacunami carca.
12 Paicunaca sinchita caparishpami: “Huañuchishca Malta Ovejami poderta, charinacunata, alli yachaita, fuerzata, alli nishca canata, jatunyachishca canata, bendiciontapish chasquina derechota charin” nicurcacuna.
13 Shinallataj tucui rurashcacuna jahua pachapi cajcunapish, cai allpapi cajcunapish, allpa ucupi cajcunapish, mama cuchapi cajcunapish, chaicunapi tucui tiyajcunaca: “Jatun tiyarinapi tiyacujpish, Malta Ovejapish bendicionta, alli nishca canata, jatunyachishca canata, poderta huiñai huiñaita chasquichun” nicujtami uyarcani.
14 Chuscu querubincunaca: “¡Chashna cachun!”* nicurcacunami. Ancianocunapish cungurishpami Diosta adorarcacuna.
