Colosenses 1:1-29
-
Pablo saludashcamanta (1, 2)
-
Colosas llajtamanta huauquicuna feta charijpi Diosta pagui nishcamanta (3-8)
-
Colosas llajtamanta huauquicuna ñaupajman catichun Diosta mañashcamanta (9-12)
-
Diospaj munai pajtarichunca Cristopaj ruraicunaca valishcami can (13-23)
-
Pabloca congregacionmantami sinchita trabajan (24-29)
1 Dios munashcamanta Cristo Jesuspaj apóstol Pablomi cani. Ñucanchij huauqui Timoteondijmi
2 Colosas llajtapi caj jucha illaj huauquicunaman cai cartata cachanchij. Cancunaca tucui shunguhuanmi Cristota caticunguichij:
Ñucanchij Yaya Diosca yallitaj llaquij cashcata ricuchichun. Sumaj causaitapish cancunaman cuchun.
3 Cancunamanta mañashpaca ñucanchij Amito Jesucristopaj Yaya Diostami siempre pagui ninchij.
4 Cristo Jesuspi cancuna feta churashcata, jucha illaj huauquicunamanpish cꞌuyaita ricuchicujtami uyashcanchij.
5 Jahua pachapi cancunapaj huaquichishca bendicionta shuyacushcamantami cancunaca chashna ruracunguichij. Mana llulla, alli huillaicunata uyashpami cancunaca chai bendicionmanta yacharcanguichij.
6 Chai alli huillaicunaca grano pꞌucucuj shinami tucui cai muyundij allpapi mirarishpa caticun. Chashnallatajmi cancunapurapipish cai alli huillaicunaca mirarishpa caticun. Dios yallitaj llaquij cashcata cancuna alli yachashca punllamantami cancunapi chashna mirashpa caticun.
7 Dios yallitaj llaquij cashcataca ñucanchij cꞌuyashca huauqui Epafrasmi cancunamanca yachachirca. Paica sirvij runa shina Cristota tucui shunguhuan sirvijmi. Ñucanchijpaj randi cancunata ayudajpishmi.
8 Paica espíritu santo cancunata ayudajpi cꞌuyaita ricuchicushcatapishmi parlarca.
9 Chaimantami caicunata uyashca punllamanta cancunamanta Diosta mañanataca manataj saquishcanchij. Shinallataj paipaj munaita yachachun, tucui alli yachaitapish charichun, espíritu santo cancunata intindichichunpishmi mañacunchij.
10 Jehová* Dios munashca shina causashpa paita cushichichun, shinallataj alli ruraicunata rurachun, Diosmantapish ashtahuan alli yachashpa catichunmi mañacunchij.
11 Shinallataj paipaj jatun poderhuan cancunata sinchiyachichunmi Diostaca mañacunchij. Chai jatun podermi cancunataca pacienciahuan, cushicushpa tucuita ahuantachun ayudanga.
12 Shinaca Yaya Diosta pagui nichij. Paimi cancunataca shuj herenciata japichun ayudashca. Chai herenciaca luzpi caj jucha illajcunapajmi can.
13 Diosmi ñucanchijtaca amsapaj podermanta cacharichishpa paipaj cꞌuyashca Churi mandacuj gobiernoman pusharca.
14 Diosca paipaj Churimantami ñucanchijta randishpa cacharichirca. Chashnami ñucanchij juchacunata perdonarca.
15 Churica mana ricuipaj Diosman rijchajmi. Paica Dios tucui imalla rurashcacunamanta punta churimi.
16 Diosca jahua pachapi, cai pachapi tucui imalla tiyajta, ricuicunapajta, mana ricuicunapajtapish paipaj Churihuanmi rurarca. Mandajcunata, pushajcunata, gobiernocunata, autoridadcunatapishmi rurarca. Tucui ima shujtaj tiyashcacunatapish paipaj Churipaj cachunmi paillahuantaj rurarca.
17 Diospaj Churica manaraj ima tiyajpimi ña tiyarca. Tucui imalla tiyajtami Diosca paihuan rurarca.
18 Paimi cuerpopaj umaca. Chai cuerpoca congregacionmi can. Paihuanmi tucui imapish callarirca. Tucuipi punta cangapajmi paica huañushcacunapaj chaupimanta punta causarirca.
19 Diosca paipaj Churi tucuipi alli cachunmi munarca.
20 Shinallataj Diosca Cristomantami jahua pachapi cajcunahuanpish, cai pachapi cajcunahuanpish tucuicunahuan alli tucun. Chashna alli tucuchunmi Cristoca llaquichina caspipi* paipaj yahuarta jicharca.
21 Ñaupaca millai ruraicunallapimi yuyarcanguichij. Chaimantami Diosmanta carupi carcanguichij. Shinallataj paipaj enemigomi carcanguichij.
22 Shinapish Diospaj Churi paipaj cuerpota cushpa huañushcamantami cunanca Diosca cancunahuan alli tucushca. Chashnami paipaj ñaupajpica jucha illajcuna, tucuipi alli nishca, imapi mana juchachipaj tucushcanguichij.
23 Chashnapish cancunaca Diospi feta churashca shinallatajmi causashpa catina canguichij. Cimiento jahuapi alli huasichishca shinami sinchi catina canguichij. Alli huillaicunata uyashcamanta, imata shuyacushcamantapish amataj caruyaichijchu. Cai alli huillaicunami tucui muyundij allpapi huillashca cashca. Ñucaca cai alli huillaicunata huillangapaj agllashca Pablomi cani.
24 Cancunamanta llaquita apacushcamantami ñucaca cushicuni. Cristo shinallatajmi llaquicunata apacuni. Shinapish llaquicunata apanarajmi cani. Chai llaquicunaca Cristopaj cuerpotami ayudanga. Cristopaj cuerpoca congregacionmi can.
25 Dios mingashca trabajota pajtachingapajmi ñucataca cai congregacionta sirvichun paillataj agllarca. Chaimantami cancunapaj allipaj Diospaj shimitaca tucui shunguhuan huillarcani.
26 Diosca pi mana yachai tucushcataca* ñaupa punllacunapipish,* ñaupa tiempopi causaj gentecunamanpish mana ricuchircachu. Shinapish cunanca paita sirvij jucha illajcunamanmi ricuchishca.
27 Diosca paicunamanmi pi mana yachai tucushca sumaj allicunataca ricuchinata munarca. Caitami shujtaj llajta gentecunapurapipish ricuchicun. Pi mana yachai tucushcaca Cristo cancunahuan shuj shinalla canami. Cristohuan shuj shinalla cashcamantami paihuan jatunyachishca canata shuyacunguichij.
28 Ñucanchijca Cristomantami huillacunchij. Shinallataj ima tucunamantapish tucuicunamanmi huillacunchij. Cristota rijsichunmi tucui alli yachaihuan gentecunamanca yachachicunchij. Chashnami Jesusta catijcunata shina, sinchi runacunata shina Diospaj ñaupajpica tucuicunata ricuchishun.
29 Caita pajtachingapajmi sinchita trabajacuni. Dios paipaj fuerzahuan ayudajpimi, paipaj podermantaca sinchita esforzarishpa caticuni.
Notacuna
^ “Jehová” shutita huasha diccionariopi ricui.
^ “Llaquichina caspi” shimita huasha diccionariopi ricui.
^ Griego rimaipica: “Dios pacashcataca” ninmi. “Dios pacashca” shimita huasha diccionariopi ricui.
^ Griego rimaipica: “aión” ninmi. “Ñaupa punlla” shimita huasha diccionariopi ricui.
