Diosllam llapanta kamaqqa. Imëpis kashqam y imëyaqpis kakunqam (Salmo 90:2). Bibliachö alli willakïkunaqa pëpitam shamun (1 Timoteu 1:11). Pëmi kawëta qomashqantsik, tsëmi pëllata sirwishwan y adorashwampis.​—Lei Apocalipsis 4:11.

Espíritu kaptinmi pëtaqa ni pipis rikashqatsu, y noqantsikwanqa manam igualantsu (Juan 1:18; 4:24). Kamanqankunata rikarmi musyashun Diosnintsik imanö kanqanta. Más tantearinapaq, tukï color y tukï niraq frütakunata y wëtakunata ruranqanmi rikätsikun kuyamanqantsikta y alläpa yachaq kanqanta. Jina ciëlochö y Patsachö imatsikanta imëkatapis kamanqanmi rikätsimantsik Llapanta Puëdeq kanqanta.​—Lei Romanos 1:20.

Bibliata leirninmi Diostaqa más reqishun. Tsëchömi yachatsikun kuyamanqantsikta, imakuna kushitsinqanta, imakuna llakitsinqanta, y jutsallakushqapis imanö sientekunqanta.​—Lei Salmo 103:7-10.

Jesusmi kënö nirqan: “Sielucho quecaq Dios Yayalläcuna, jutillequi allapa respetuwan alabashqa catsun” (Mateo 6:9). Tsëmi, Teyta, Kamakoq Yaya, Señor nishqapis jutinqa kan. Cada idiömachömi parlayanqanmannö tsë jutitaqa niyan. Quechuachöqa Jehová o Yavé nintsikmi.​—Lei Salmo 83:18 (wakin Bibliakunachönam 82:19).

Wakin Bibliachöqa jutinta mana churashpam, Dios o Señor nirlla churayashqa. Pero unë qellqayanqanchöqa  7.000 kutipitapis masmi Diospa jutin yurirqan pï mëta Jesus yachatsirpis, Teytampa jutintaqa parlarqanmi.​—Lei Juan 17:26.

Rikäri ¿Diospa jutin kanku? neq videuta

Kuyëkämashqaqa, ¿imanirtaq sufrintsik? Wakinkunaqa pensayan probamänantsikrëkur tsëkunata Dios permitinqantam. Pero tsëqa manam rasumpatsu.​—Lei Santiagu 1:13.

Imanöpis kawënintsik akranapaqmi Jehoväqa kamamashqantsik. Y más alliqa kanman Diosta sirwinapaq akranqantsikmi (Josué 24:15). Y wakinkunaqa mana alli rurëkunatam akrayan, tsënöpam tukï llakikïkuna kan. Y tsëkunaqa Jehoväta alläpam llakitsin.​—Lei Génesis 6:5, 6.

Kuyamarnintsik y shumaq kawanata munarmi Jehoväqa ichikllachöna llapan mana allikunata ushakäratsimunqa. Pero musyanmi tukï mana allikunata imanir permitinqanta. 8 kaq yachatsikïchömi tsëtaqa yachakunki.​—Lei 2 Pedru 2:9 y 3:7, 13.

Jehoväqa mañakur pëman witinatam munan (Salmo 65:2; 145:18). Jina perdonamänapaq listom këkan y musyanmi sirwinantsikrëkur imëkata ruranqantsiktapis. Tsëmi jutsasapa karnimpis amïgon këta puëdentsik.​—Lei Salmo 103:12-14 y Santiagu 4:8.

Kawënintsik qomashqantsik kaptinmi pipitapis más Diosllata kuyanantsik (Marcos 12:30). Y tsëtaqa rikätsikuntsik pëpita yachakur y mandamientonkunata wiyakurmi. Tsënöpam más reqishun.​—Lei 1 Timoteu 2:4 y 1 Juan 5:3.