Marcus 12:1-44
-
Chakrata arrendaq asesïnukunapaq igualatsikuy (1-12)
-
Teyta Diospa y Römata gobernaqpa kaq (13-17)
-
Wanushqakuna kawariyämunqampaq tapuyan (18-27)
-
Ishkë mas väleq kaq mandamientukuna (28-34)
-
¿Cristuqa Davidpa tsurinku? (35-37a)
-
Ley qellqaqkunapita cuidakuyänampaq nin (37b-40)
-
Waktsa viudapa ishkë ichikllan qellënin (41-44)
12 Tsëpitanam igualatsikuykunawan yachatsikur kënö nirqan: “Juk nunam chakranman üvaskunata plantëkur+ entëru lädumpa cercarqan, y tsëchömi vïnuta rurayänan pözuta y törrita rurarqan.+ Tsëpitanam üvas chakranta arrendakuykur juk nacionta ëwakurqan.+
2 Cosëcha witsannam, pëpa kaqta chaskinampaq üvas chakranta arrendaqkunaman sirweqninta mandarqan.
3 Peru pëkunaqa, maqar usharmi sirweqninta jinëllata qarquskiyarqan.
4 Tsënam tsë nunaqa juk mas sirweqninta pëkunaman yapë mandarqan, y pëtapis peqanchö o umanchö maqarmi insultayarqan.+
5 Y juk mastam mandarqan, y pëtaqa wanutsiyarqanmi o wañutsiyarqanmi. Tsëpitanam mas sirweqninkunata mandaptin wakinta maqayarqan, y wakintana wanutsiyarqan.
6 Y tsë nunapaqa juk kuyë tsurinmi kapurqan.+ Tsëmi llapampa ultimunta, ‘tsurïtaqa respetayanqam’ nir pëkunaman mandarqan.
7 Peru üvas chakrata arrendaqkunaqa kënömi ninakuyarqan: ‘Pëmi herenciata chaskinqa.+ ¡Aku, herencianwan quedakunapaq wanuratsishun o wañuskatsishun!’.
8 Tsënö nirmi wanuykatsir üvas chakrapita waqtaman jitariyarqan.+
9 Tsëqa, ¿imataraq üvas chakrayoq nuna ruranqa? Shamurmi üvas chakranta arrendaqkunata wanutsinqa, y jukkunatanam üvas chakranta arrendëkunqa.+
10 ¿Manaku imëpis leyiyashqanki Diospa Palabranchö, ‘albañilkuna mana väleqtanö rikar jitariyanqan rumim, esquïnachö ëwaq maestra rumi* tikrashqa’ ninqanta?+
11 ¿Y manaku leyiyashqanki, ‘tsëqa Teyta Jehoväpitam* shamushqa, y noqantsikpaqqa alläpa shumaqmi’ ninqanta?”.+
12 Tsë igualatsikuykunawan pëkunapaq parlëkanqanta cuentata qokurnam chikeqninkunaqa prësutsita munayarqan, peru nunakunata mantsarmi dejëkur ëwakuyarqan.+
13 Tsëmi parlanqanchö Jesusta mana alliman chätsiyänampaq, fariseukunapa qateqninkunata y Herödista yanapaqkunata pëman mandayarqan.+
14 Chëkurnam pëkunaqa kënö niyarqan: “Maestru, musyayämi qamqa rasumpa kaqllata parlanqëkita. Qamqa manam nunakunapa rikëninchö alli këtatsu ashinki, ni nunakunata jananllapatsu rikanki, sinöqa Diospitam rasumpa kaqllata yachatsikunki. ¿Alliku Röma gobernaqta* impuestuta* paguë o manaku?
15 ¿Pagashwanku o manaku?”. Pëkuna allish tukoq kayanqanta cuentata qokurnam pëqa kënö nirqan: “¿Imanirtan pruëbaman churamëta munar tsëta tapuyämanki? Mä rikänäpaq juk denariuta* apayämuy”.
16 Y pëman juk denariuta apayaptinnam, “¿pipa cärantan këchö këkan y pipa jutintan qellqarëkan?” nir tapurqan. Pëkunanam, “Römata gobernaqpam”* nir contestayarqan.
17 Tsënam Jesusqa nirqan: “Römata gobernaqtaqa* pëpa kaqta pagayë,+ peru Diospa kaqtaqa Diosta pagayë”.+ Y tsënö ninqampitam pëkunaqa alläpa espantakuyarqan.
18 Tsënam wanushqakuna mana kawariyämunqanta neq+ saduceukuna pëman shamur kënö tapuyarqan:+
19 “Maestru, juk nunapa wawqin manaraq tsurin kaptin wanukur warminta dejaptinqa, tsë viudawan wawqin casakunampaqmi Moisesqa qellqarqan, tsënöpa pëkunapa wamrankuna wanushqa wawqimpa tsurinkunanö kayänampaq.+
20 Noqakunachömi qanchis wawqikuna kayarqan, y punta kaqmi juk warmiwan casakurqan, peru manaraq tsurin kaptinmi wanukurqan.
21 Qateqnin kaqpis tsë viuda warmiwanmi casakurqan, peru manaraq tsurin kaptinmi wanukurqan, y tsënöllam kima kaqwampis pasarqan.
22 Tsë qanchis wawqikunaqa manaraq tsurinkuna kaptinmi wanukuyarqan. Llapankuna ushakäyanqanchönam tsë warmipis wanukurqan.
23 Llapanwan casakushqa këkarqa, wanushqakuna kawariyämuptinqa, ¿tsë qanchis wawqikunapita mëqampa warmintan kanqa?”.
24 Tsënam Jesusqa nirqan: “Qamkunaqa Diospa Palabranta y Diospa poderninta mana reqirmi pantashqa këkäyanki.+
25 Wanushqakuna kawariyämuptinqa, manam ollqukuna casakuyantsu ni warmikunapis casatsishqatsu kayan, sinöqa ciëluchö angelkunanömi kayan.+
26 Peru wanushqakuna kawariyämunampaq parlashqaqa, ¿manaku leyiyashqanki rawrëkaq o lunyëkaq kashapaq Moises qellqanqanchö Teyta Dios kënö ninqanta: ‘Noqam Abrahanpa Diosnin, Isaacpa Diosnin y Jacobpa Diosnin kä’?+
27 Pëqa manam wanushqakunapa Diosnintsu, sinöqa kawëkaqkunapa Diosninmi. Qamkunaqa pantashqam këkäyanki”.+
28 Tsëchö këkaq Ley qellqaqkunapita jukninmi discutiyanqanta wiyëkarqan, y Jesus alli contestanqanta rikarmi, “¿mëqan mandamientutan mas punta kaq?”* nir tapurqan.+
29 Tsënam Jesusqa kënö contestarqan: “Punta kaqqa këmi: ‘Israel nunakuna wiyayämë, Jehovämi* Diosnintsik, y Jehovänöqa* manam jukqa kantsu.
30 Jehovä* Diostam llapan shonquykikunawan, llapan kawënikikunawan, llapan pensënikikunawan y llapan kallpëkikunawan kuyayänëki’.+
31 Y kënam ishkë kaq: ‘Qamkuna kuyakuyanqëkinömi nuna mayikikunatapis kuyayänëki’.+ Tsëkunapita mas väleq mandamientuqa manam kantsu”.
32 Ley qellqaqnam nirqan: “Maestru, allitam parlamurqunki. Rasumpa kaqchöqa: ‘Pëqa jukllëllam, y pënöqa manam ni pï kantsu’.+
33 Y llapan shonquntsikwan, llapan pensënintsikwan* y llapan kallpantsikwan pëta kuyanqantsik, y nuna mayintsikta kikintsiktanö kuyanqantsikmi, rupatsina qarëkunapita y pishtashqa qarëkunapitapis masqa välin”.+
34 Alli pensëkur contestanqanta cuentata qokurnam Jesusqa kënö nirqan: “Teyta Diospa Gobiernunman yëkunëkipaqnönam këkanki”. Tsëpitaqa manam ni pï tapupëta valurarqannatsu.+
35 Templullachöraq yachatsikuykarmi Jesusqa kënö tapukurqan: “¿Imanirtan Ley qellqaqkunaqa niyan Cristuqa Davidpa tsurin kanqanta?+
36 Santu espïritu yanapaptinmi kikin David kënö nirqan:+ ‘Jehovä* Diosmi Mandakoq Teytalläta kënö nirqan: “Derëcha lädüman jamakamuy, llapan chikiyäshoqnikikunata chakiki jawanman* churamunqäyaq”’.+
37 Kikin David pëpaq Mandakoq Teytallä nikaptinqa, ¿imanötan tsurin kanman?”.+
Tsëchö këkaq mëtsika nunakunaqa kushishqam wiyakuyaq.
38 Yachatsikuykarmi pëkunata kënö nirqan: “Cuidakuyë Ley qellqaqkunapita, pëkunaqa chakinkunayaq largu röpashqam wakpa këpa purita gustayan, rantikuyänan pampakunachöpis shumaq saludayänantam munayan,+
39 y Diosta adorayänan wayikunachö punta puntaman* jamakuyta y cenë hörapis mas alli sitiukunaman jamakuytam gustayan.+
40 Pëkunaqa viudakunapa imëkankunatam apakuyan, y nunakuna alabayänanllapaqmi atska tiempupa Teyta Diosman mañakuyan. Tsëmi pëkunaqa mas feyupa castigashqa kayanqa”.
41 Jesusqa qellë winayänan cäjakunapa amänunman tëkurmi+ rikarqan tsë cäjakunaman qellëninkunata nunakuna winayaqta, y mëtsikaq rïcu nunakunam atska qellëta winëkäyarqan.+
42 Y juk waktsa viuda chëkurnam ishkë ichikllan y mana alläpa väleq qellëta* winarqan.+
43 Tsënam Jesusqa qateqninkunata qayëkur kënö nirqan: “Noqam qamkunata nï,* kë waktsa viudaqa qellë winayänan cäjakunaman llapan winaqkunapitapis mastam winashqa.+
44 Llapan winaqkunaqa sobrayäpunqantam winayashqa, peru pëqa, waktsa këkarpis, kawanampaq llapan kapunqantam llapanta winashqa”.+
Nötakuna
^ Tsë rumitaqa ishkë perqakuna tinkoqmanmi churayaq.
^ Tsënö nirqa, cada nuna pagakunqan impuestupaqmi parlëkan.
^ Griëgu idiömachöqa “Cësarta” ninmi. Röma nacionchö wakin gobernaqkunatam tsënö reqiyaq.
^ Griëgu idiömachöqa “Cësarpam” ninmi. Röma nacionchö wakin gobernaqkunatam tsënö reqiyaq.
^ Griëgu idiömachöqa “Cësartaqa” ninmi. Röma nacionchö wakin gobernaqkunatam tsënö reqiyaq.
^ O “mas väleq kaq”.
^ O “entiendita puëdinqantsikwan”.
^ Kënöpis niyanmi: qopinman.
^ O “mas alli kaq asientukunaman”.
^ Griëgu idiömachöqa “2 leptonkunata o 1 cuadrantita” ninmi. Rikäri “Masllata musyanapaq” neqchö B14 kaqta.
^ Kënöpis niyanmi: niyaq.
