Kamakoq Jehoväqa noqantsikpitapis más yachaqmi. Jina kuyakoq y noqantsikpaq yarpachakoq Teytam. Manam pëpita rakikashqa kawanapaqtsu kamamashqantsik (Jeremías 10:23). Imanömi wamrakunapis teytankuna consejayänanta necesitäyan, tsënöllam noqantsikpis Diosnintsik consejamänata necesitantsik (Isaías 48:17, 18). Bibliapa musyatsikïninkunaqa Diosnintsikpa qarëninmi.​—Lei 2 Timoteu 3:16.

Jehoväpa leyninkuna y musyatsikïninkunaqa alli kawakunapaq y shamoq tiempochö mana ushakaq bendicionkunata imanöpis chaskinapaqmi yachatsimantsik. Kamamashqantsik karmi llapan consëjonkunata wiyakunata munan.​—Lei Salmo 19:7, 11 y Apocalipsis 4:11.

Bibliapa musyatsikïninkunaqa imatapis imanö ruranapaqmi yanapamantsik. Pero leykunaqa imatapis cumplinapaqmi claro mandamantsik (Deuteronomio 22:8). Bibliapa musyatsikïninkunaqa imapis alli o mana alli kanqanta cuentata qokunapaqmi yanapamantsik (Proverbios 2:10-12). Más tantearinapaq, kawënintsik Diospa qarënin kanqantam Bibliaqa yachatsimantsik. Kë musyatsikïmi yanapamäshun trabäjochö, wayichö y viäjechöpis kawënintsikta cuidanapaq.​—Lei Hechos 17:28.

Jesusmi ishkë kanqanta nirqan. Punta kaqmi rikätsikun Diosta kuyanapaq, reqinapaq y imëpis pëllata sirwinapaq. Kë musyatsikïtam yarpänantsik imata rurarpis (Proverbios 3:6). Tsë consëjota wiyakoqkunaqa Diospa amïgonmi tikrayanqa, y mana wanïpam kushishqa kawakuyanqa.​—Lei Mateo 22:36-38.

Ishkë kaqnam pï mëwampis shumaq kawakunapaq yanapamantsik (1 Corintios 13:4-7). Pï mëtapis shumaq tratarqa Diosnintsiknöllam noqantsikpis rurëkäshun.​—Lei Mateo 7:12 y 22:39, 40.

Familiachö kuyanakunapaq y juk shonqunölla kawanapaqmi (Colosenses 3:12-14). Juk kaqpis, casädokuna mana rakikarlla kawayänampaqmi yachatsikun.​—Lei Génesis 2:24.

Biblia ninqanta wiyakïqa yanapamäshunmi trabäjota tarinapaq y kushishqa kawanapaqpis. Wakinkunaqa trabajaqninkuna ashiyan Biblia ninqannö kawakoqta, mana suwakoqta y alli trabajaqtam (Proverbios 10:4, 26; Hebreus 13:18). Jina Diospa Palabranqa yanapamantsik kapamanqantsikllawan kushishqa kawanapaq y imëka kapamanqantsikpitapis Diosnintsikta más kuyanapaqmi.​—Lei Mateo 6:24, 25, 33 y 1 Timoteu 6:8-10.

Jina Bibliapa musyatsikïninkunaqa yanapamantsikmi saludnintsikta cuidanapaq. Borrachë mana alli kanqanta rikätsikurmi tsapämantsik qeshyakunapita y wanïpitapis (Proverbios 14:30; 22:24, 25; 23:20). Pero ichikllata upurinataqa Jehová permitinmi (Salmo 104:15; 1 Corintios 6:10). Jina yanapamantsikmi portakïnintsikta y pensënintsikta cuidanapaqpis (Salmo 119:97-100). Cristiänokunaqa manam kikintsik imatapis tarinantsikrëkurllatsu tsë consëjokunata wiyakuntsik, sinöqa ciëlochö Teytantsikta alabanantsikrëkurmi.​—Lei Mateo 5:14-16.