Juan 1:1-51
1 Qallananchömi Palabra niyanqanqa kawarqan.*+ Palabraqa Dioswanmi këkarqan,+ y tsë Palabraqa juk diosmi karqan.+
2 Qallananchömi pëqa Dioswan këkarqan.
3 Pëwanmi llapan imëkatapis Teyta Dios kamarqan,+ y mana pëwanqa manam imatapis rurarqantsu.
Llapan rurashqa kaqmi
4 pë yanapakuptin kawëyoq kayan,* y tsë kawëmi nunakunapaq aktsinö karqan.+
5 Aktsiqa ampichömi o tsakëchömi* atsikyan,+ peru ampiqa manam vencita puëdishqatsu.
6 Juk nunam Teyta Diospa jutinchö shamurqan. Pëpa jutinqa Juanmi karqan.+
7 Tsë nunaqa, përëkur tukuyläya nunakuna creiyänampaqmi,+ aktsipita musyatsikunampaq shamurqan.
8 Juanqa manam tsë aktsitsu karqan,+ sinöqa tsë aktsipita musyatsikunampaqmi shamurqan.
9 Tukuyläya nunakunata aktseq rasumpa aktsiqa, kë munduchö nunakunaman shamunampaqnam këkarqan.+
10 Rasumpa kaqchöqa, pëqa nunakunachönam këkarqan,+ y nunakunaqa pëwanmi* rurashqa kayarqan, tsënö kaptimpis,+ pëkunaqa manam reqiyarqantsu.
11 Kikimpa wayinman shamuykaptimpis, pëkunaqa manam chaskiyarqantsu.
12 Tsënö kaptimpis, llapan chaskeqninkunaqa, jutinman markäkurmi o yärakurmi,+ Diospa tsurinkuna kayänampaq derëchuta chaskiyarqan.+
13 Pëkunaqa manam nunapitatsu ni nuna munaptintsu yuriyarqan, sinöqa Teyta Dios munaptinmi.+
14 Palabra niyanqanqa nunanö yurirmi noqantsikchö kawarqan,+ y papänimpita alläpa puëdeq këta chaskeq japallan tsurinö kanqantam rikarqantsik.+ Teyta Diospa rikëninchömi alli këkarqan, y rasumpa kaqtam yachatsikurqan.
15 Juanmi pëpita musyatsikur fuertipa kënö nirqan: “¡Pëpaqmi, ‘qepäta shamoqmi puntäta chämushqa, pëqa noqa manaraq kaptïmi karqanna’ nirqä!”.+
16 Alläpa alli kar noqantsikwan alläpa alli kanqantam pëchöqa imëpis rikarquntsik.
17 Teyta Diosqa Moiseswanmi Leyta entregatsirqan,+ peru alläpa alli kanqanta+ y rasumpa kaqtaqa Jesucristuwanmi musyatsimarquntsik.+
18 Teyta Diostaqa manam ni imëpis ni pï rikashqatsu.+ Teyta imanö kanqantaqa musyatsimarquntsik,+ Pëpa lädunchö këkaq*+ japallan tsuri kaq diosllam.+
19 “Qamqa, ¿pitan kanki?” nir tapuyänampaq sacerdötikunata y levïtakunata judïukuna Jerusalenpita mandayaptinmi Juanqa pï kanqanta cläru willakurqan.+
20 Pëqa manam upällatsu kakurqan, tsëpa rantinqa clärum kënö nirqan: “Noqaqa manam Cristutsu kä”.
21 Tsënam, “tsëqa, ¿pitan kanki? ¿Elïasku?”+ nir tapuyarqan. Pënam, “manam pëtsu kä” nirqan. Tsëqa “¿shamoqpaq kaq Diospa Willakoqninku kanki?”+ niyaptinnam, “manam” nir contestarqan.
22 Tsënam kënö niyarqan: “Tsëqa, mandamaqnïkunata willayänäpaq pï kanqëkita niyämë. ¿Pï kanqëkitataq ninki?”.
23 Pënam nirqan: “Noqaqa Diospa willakoqnin Isaïas ninqannömi, ‘Teyta Jehoväpaq* derëchu nänita rurayë’+ nirnin tsunyaq sitiuchö fuertipa willakoq kä”.+
24 Tsë nunakunataqa fariseukunam mandashqa kayarqan.
25 Y pëkunaqa kënömi tapuyarqan: “Cristu, Elïas ni shamoqpaq kaq Diospa Willakoqnin mana këkarqa, ¿imanirtan bautizar këkanki?”.
26 Tsënam Juanqa kënö nirqan: “Noqaqa yakuchömi nunakunata bautizä. Peru mana reqiyanqëki nunam qamkunachö këkan.
27 Pëmi qepäta shamoq kaq, y noqalläqa manam llanqinkunapa watunllatapis paskapuyta puëdïtsu”.+
28 Tsëkunaqa Jordan mayupa wak tsimpan Betaniachömi pasakurqan, tsëchömi Juan bautizar këkarqan.+
29 Waränin junaqnam Jesus pëman ëwëkaqta rikar kënö nirqan: “¡Rikäyë, taqëmi nunakunapa+ jutsanta* ushakätsinampaq+ Teyta Dios mandamunqan Orqu* Üsha!+
30 Pëpaqmi, ‘qepäta shamoq nunam puntäta chämushqa, pëqa noqa manaraq kaptïmi karqanna’+ nirqä.
31 Noqapis manam reqirqätsu, peru Israelchö pë reqishqa kanampaqmi noqaqa yakuchö bautizar këkarqö”.+
32 Juanqa kënö nirpis willakurqanmi: “Santu espïritu paluma niraq ciëlupita urämur jananman churakanqantam rikarqä.+
33 Noqapis manam reqirqätsu, peru yakuchö bautizanäpaq mandamaqmi kënö nimarqan: ‘Santu espïritu urämur jananman churakaptinmi,+ santu espïrituwan bautizaq kanqanta musyanki’.+
34 Tsëta rikashqa karmi noqaqa pë Diospa Tsurin kanqanta musyatsikurqö”.+
35 Waränin junaqqa yapëmi Juanqa ishkë qateqninkunawan tsëchö këkarqan,
36 y Jesusta purikaqta rikarmi, “¡rikäyë, taqëmi Teyta Dios mandamunqan Orqu* Üsha!”+ nirqan.
37 Tsëta wiyëkurnam, ishkan qateqninkunaqa Jesuspa qepanta ëwakuyarqan.
38 Tsënam Jesusqa tumëkur qepanta ëwëkäyanqanta rikëkur, “¿imatataq ashiyanki?” nir tapurqan. Pëkunanam, “Rabï (tsëqa, ‘Maestru’ ninanmi), ¿mëchötan posadakurqunki?” niyarqan.
39 Tsënam pëqa, “shamur kikikikuna rikäyë” nirqan. Tsëmi ëwar mëchö posadakunqanta rikäyarqan, y tsë junaqqa pëwanmi quedakuyarqan. Tsë höraqa las cuatru de la tardinönam* karqan.
40 Simon Pëdrupa wawqin Andresmi,+ Juan ninqanta wiyar Jesuspa qepanta ëwaqkunapita juknin kaq karqan.
41 Puntataqa wawqin Simonta tarïkurmi kënö nirqan: “Diospa Akrashqantam*+ reqiyarqö” (tsëqa, “Cristu” ninanmi),
42 tsëpitanam Jesusman pusharqan. Pëta rikëkurnam Jesusqa kënö nirqan: “Qamqa Juanpa tsurin Simonmi+ kanki, kanampitaqa Cëfasmi jutiki kanqa” (tsëqa, “Pëdru” ninanmi).+
43 Waränin junaqnam Jesusqa Galilëa provinciata ëwëta munarqan. Tsënam Felïpita+ tarïkur, “qatimaqnï kë” nirqan.
44 Felïpiqa Betsaida markapitam karqan, Andrespa y Pëdrupa markampita.
45 Felïpim Natanaelta+ tarïkur kënö nirqan: “Moises qellqanqan Leychö y Diospa willakoqninkuna qellqayanqanchö parlanqan nunatam reqiyarqö: Josëpa+ tsurin Nazaretpita Jesusta”.
46 Peru Natanaelqa, “¿ima allillapis Nazaretpita yarqunmantsuraq?” nirmi tapurqan. Tsënam Felïpiqa, “shamur kikiki rikë” nirqan.
47 Natanael pëman ëwëkanqanta rikarnam Jesusqa, “rikäyë, pëqa Israelchö leykunata cäsukoq y rasumpa kaqllata parlaq israelïta nunam”+ nirqan.
48 Tsënam Natanaelqa, “¿imanöpatan reqimanki?” nirqan. Jesusnam, “Felïpi manaraq qayashuptikim, hïgus planta chakinchö këkaqta rikarqoq” nirqan.
49 Tsënam Natanaelqa, “Maestru, qammi Diospa Tsurin kanki, qammi Israelpa Gobernaqnin kanki”+ nirqan.
50 Jesusnam nirqan: “¿Hïgus planta chakinchö rikanqaqta ninqaqpitaku noqaman creinki? Tsëkunapitapis mas espantëpaqkunatam rikanki”.
51 Y kënöpis nirqanmi: “Rasumpam qamkunata nï:* ciëlu kicharëkaqta, y Nunapa Tsurinman witsëkaqta y urëkämoqtam Diospa angelninkunata rikäyanki”.+
Nötakuna
^ O “karqan”.
^ O “kawëta chaskiyan”.
^ Kënöpis niyanmi: tutapëchömi.
^ Tsënö nirqa, Palabra niyanqan nunapaqmi parlëkan.
^ O “Teytapa pëchunchö këkaq”. Tsënö nirqa, alläpa väleqpaq churashqa kanqampaqmi parlëkan.
^ Kënöpis niyanmi: pecädunta.
^ Kënöpis niyanmi: Mächu.
^ Kënöpis niyanmi: Mächu.
^ Griëgu idiömachöqa “10 kaq höranö” ninmi. Tsëtaqa patsa waranqampitam yupayaq.
^ O “Mesïastam”.
^ Kënöpis niyanmi: niyaq.
