Mateu 6:1-34
-
JIRKACHÖ JESUS YACHATSIKUNQAN (1-34)
6 Ama nunakuna rikäyäshunëkillapaq ima allitapis rurayankitsu,+ tsënö rurarqa, manam ciëluchö këkaq Teytëkikunapita ima bendiciontapis chaskiyankitsu.
2 Imatapis wanëkaqkunata* yanaparqa,* ama jukta jukta willar puritsu,* tsëtaqa ishkë cära nunakunallam rurayan. Pëkunaqa wakinkuna alabayänampaqmi, Diosta adorayänan wayikunachö y cällikunachö tsëkunata rurayan. Peru noqam qamkunata nï,* pëkunaqa llapan chaskiyänampaq kaqtanam chaskiyashqa.
3 Wanëkaqkunata* yanapaptikiqa, izquierda kaq makiki derëcha kaq makiki ruranqanta ama musyatsuntsu.
4 Tsënömi wanëkaqkunata yanapanqëkita ni pï musyanqatsu. Tsëqa, mana ni pï rikänampita* rikëkämoq Teytëkim bendicishunki.+
5 Tsënölla Teyta Diosman mañakurpis, ama ishkë cära nunakunanöqa rurayëtsu.+ Pëkunaqa wakinkuna rikäyänampaqmi, Diosta adorayänan wayikunachö y reqishqa cällikunapa esquïnankunachö shëkur* mañakuyta gustayan.+ Peru noqam qamkunata nï,* pëkunaqa llapan chaskiyänampaq kaqtanam chaskiyashqa.
6 Qam, Teyta Diosman mañakurqa, cuartuykiman yëkur punkuta wichqarkamur, ciëluchö këkaq Teytëkiman mañakuy.+ Tsënam, mana pï rikänampita rikëkämoq Teytëki bendicishunki.
7 Tsënölla Teyta Diosman mañakurqa, Diosta mana reqeq nunakunanöqa* ama kutin kutin tsëllata ninkitsu. Pëkunaqa mëtsika palabrakunata niyaptinraq, Teyta Dios wiyanampaq kaqtam pensayan.
8 Qamkunaqa ama pëkunanö kayëtsu, Teytëkikunaqa imata wanayanqëkitapis* manaraq mañakuyaptikim musyëkanna.+
9 Qamkunaqa kënömi Teyta Diosman mañakuyänëki:+
‘Ciëluchö këkaq Teytalläkuna, jutillëki+ respetashqa këkullätsun.*+
10 Gobiernuyki shamuykullätsun.+ Ciëluchö y patsachöpis+ rurëta munanqëkita rurëkullë.+
11 Kanan junaqpaq mikuylläkuna këkutsun;+
12 conträkuna jutsallakoqkunata* perdonayanqänölla, noqakunatapis jutsalläkunapita perdonëkayämë.+
13 Jutsaman* imapis mana ishkitsiyämänampaq yanapëkayämë,+ y Diablupita* salvëkayämë’.+
14 Mana allita rurayäshoqnikikunata perdonayaptikiqa, ciëluchö këkaq Teytëkikunapis perdonayäshunkim.+
15 Peru mana allita rurayäshoqnikikunata mana perdonayaptikiqa, manam Teytëkikunapis mana allikunata rurayanqëkipita perdonayäshunkitsu.+
16 Ayunarninqa,+ amana ishkë cära nunakunanöqa llakikuyëtsu. Pëkunaqa ayunëkäyanqanta nunakuna rikäyänanllapaqmi llakishqanö puriyan.+ Peru noqam qamkunata nï,* pëkunaqa llapan chaskiyänampaq kaqtanam chaskiyashqa.
17 Peru qam ayunarqa, perfümita peqëkiman o umëkiman jichakuy, y cärëkita shüpakuy,
18 ayunëkanqëkita nunakuna mana musyayänampaq, sinöqa ciëluchö këkaq Teytëkilla musyanampaq. Tsëqa, mana pï rikänampita rikëkämoq Teytëkim bendicishunki.
19 Amana kë patsachöqa imëka väleqkunata juntayëtsu,+ këchöqa puyur y ismurmi ushakan, y suwakoqkunam apakuyan.
20 Tsëpa rantinqa, imëka väleqkunata ciëluman juntayë,+ tsëchöqa manam puyuntsu ni ismur ushakantsu,+ y manam suwakoqkuna apakuyantsu.
21 Mëchömi imëka väleqnikikuna këkanqa, tsëmanmi shonquykikunapis yarparanqa.
22 Nawiqa cuerpupa aktsinmi.+ Tsëmi nawiki alli kaqllata rikaptinqa,* entëru cuerpuyki atsikyanqa.
23 Peru nawiki envidiösu* kaptinqa,+ entëru cuerpuykim ampiranqa o tsakanqa.* Rasun kaqchöqa, qamchö këkaq aktsi ampi o tsakë tikraptinqa, ¡alläpa yanaraqmi kanqa!
24 Manam pï nunapis ishkë patrontaqa sirwita puëdintsu; bienmi jukninta chikinqa y jukninta kuyanqa,+ o bienmi jukninta yachananqa, y jukninta desprecianqa. Tsënöllam qamkunapis Teyta Diospa y Imëkayoq Këpa* sirweqnin këta puëdiyankitsu.+
25 Tsëmi qamkunata nï:* amana kawayänëkipaq imata mikuyänëkipaq kaqman o imata upuyänëkipaq kaqman, o cuerpuykikunaman imata vistikuyänëkipaq kaqman+ yarpachakuyënatsu.+ ¿Manaku kawëqa mikuypitapis mas välin, y cuerpuna röpapitapis mas välin?+
26 Pishqukunata rikäyë;+ pëkunaqa manam murukuyantsu ni cosechayantsu, y manam gränukunata guardayantsu, tsënö kaptimpis, ciëluchö Teytankunaqa pacha juntatam katsin. ¿Manaku qamkunaqa pishqukunapitapis mas väliyanki?
27 ¿Mëqëkitan yarpachakuyanqëkirëkur ichik masllapis* kawarkuyta puëdiyankiman?+
28 Y, ¿imanirtan röpapaqpis alläpa yarpachakuyanki? Chakrakunachö liriu wëtakuna imanö winayanqampita yachakuyë, tsëkunaqa manam trabajayantsu ni putskakuyantsu;
29 peru noqam qamkunata nï,* manam ni Salomonpis+ imëkayoq këkar tsë wëtakunanöqa vistikurqantsu.
30 Tsëqa, hornuman jitayänan këkaptin chakrakunachö qorakunatapis* Teyta Dios tsënö vistikätsirqa, ¿manatsuraq qamkunatanäqa masraq vistitsiyäshunki markäkuynin o yärakuynin pisheq nunakuna?
31 Tsënö këkaptinqa, ‘¿imataraq mikushun?’, ‘¿imataraq upushun?’, o ‘¿imataraq vistikushun?’+ nir ama imëpis yarpachakuyëtsu.+
32 Teyta Diosta mana sirweq nunakunallam tsëkunataqa imëkanöpa ashiyan. Tsë llapanta wanayanqëkitaqa* ciëluchö këkaq Teytëkikuna musyanmi.
33 Tsënö këkaptinqa, Diospa Gobiernunta puntata ashir y pëpa rikëninchö alli kaqta rurar* sïguiyë, y wanayanqëkitaqa* manam Teyta Dios faltatsimunqatsu.+
34 Tsëqa, ama waränin junaqpaq imëpis yarpachakuyëtsu,+ waränin junaqqa juk yarpachakuykunanam kanqa. Cada junaqpaqmi problëmakunaqa kan.
Nötakuna
^ O “Pitapis llakipar yanaparqa”.
^ Griëgu idiömachöqa “ama trompëtata tocar puritsu” ninmi.
^ Kënöpis niyanmi: niyaq.
^ Kënöpis niyanmi: necesitëkaqkunata.
^ Kënöpis niyanmi: Necesitëkaqkunata.
^ O “pi mana rikänan sitiupita”.
^ Kënöpis niyanmi: niyaq.
^ Kënöpis niyanmi: ichïkur.
^ Griëgu idiömachöqa “juk nacion nunakunanöqa” ninmi.
^ Kënöpis niyanmi: necesitäyanqëkitapis.
^ O “jutillëkita sagrädutanö rikäyätsun”.
^ Kënöpis niyanmi: pecädu ruraqkunata.
^ Kënöpis niyanmi: Pecäduman.
^ Griëgu idiömachöqa “Mana Allita Ruraqpita” ninmi.
^ Kënöpis niyanmi: niyaq.
^ O “cläru rikaptinqa”.
^ Tsënö nirqa, imëkata munanqampaqmi parlëkan.
^ Kënöpis niyanmi: tutaparanqa.
^ Kënöpis niyanmi: Riquëzakunapa.
^ Kënöpis niyanmi: niyaq.
^ Griëgu idiömachöqa “1 cödu masllapis” ninmi. Tsënöqa niyaq cödupita dëdu puntanyaq mediyanqantam. Rikäri “Masllata musyanapaq” neqchö B14 kaqta.
^ Kënöpis niyanmi: niyaq.
^ Kënöpis niyanmi: jachakunatapis.
^ Kënöpis niyanmi: necesitäyanqëkitaqa.
^ Rikäri “Bibliachö palabrakunata entiendinapaq” neqta.
^ Kënöpis niyanmi: necesitäyanqëkitaqa.
