Diosqa tukï cläsi nunakuna pëman mañakuyänantam munan (Salmo 65:⁠2). Pero tsënö kaptimpis, manam llapan mañakïkunatatsu wiyan. Jina Bibliaqa willakun juk ollqu warminta mana allipa trataptinqa mañakïninta Dios ‘mana wiyanqantam’ (1 Pedru 3:7). Israelïtakuna mana allikunata imëpis rurayaptinmi, Diosqa mañakïninkunata wiyarqannatsu. Tsënö kaptimpis jutsata rurar arrepentikoqkunapa mañakïninkunataqa wiyanmi.​—Lei Isaías 1:​15 y 55:⁠7.

Rikäri ¿Llapan nunakuna mañakuyanqantatsuraq Diosqa wiyan? neq videuta

Mañakurqa Diostam adorëkantsik, tsëmi pëllaman imëpis mañakunantsik (Mateo 4:10; 6:9). Jina jutsasapa karmi Jesuspa jutinchö mañakunantsik, pëmi salvamänapaq wanurqan (Juan 14:6). Jehoväqa manam munantsu kaqllata o qellqashqallapita yapë yapë mañakunata, sinöqa shonquntsikpita mañakunatam munan.​—Lei Mateo 6:7 y Filipenses 4:6, 7.

Kamakoq Teytantsikqa shonquntsikllachö mañakushqapis wiyanmi (1 Samuel 1:12, 13). Pëqa imë hörapis mañakunatam munan, mikunantsik hora o imëka mana allikunapa pasarpis.​—Lei Salmo 55:22 y Mateo 15:36.

Diosman mana creeq nunakunapa o runakunapa chowpinchömi kawantsik y pëkunaqa burlakuyanmi Dios awnikunqankunapitapis. Tsëqa Diosman witinapaq procurëkanqantsiktapis ushakäratsinmanmi (2 Timoteu 3:1, 4;  2 Pedru 3:3, 13). Tsëmi, yanapanakunapaq cristiano mayintsikkunawan juntakänantsik alläpa precisan. Pëkunapis yanapanata munayanmi.​—Lei Hebreus 10:24, 25.

Diosta kuyaqkunawan juntakarqa, más nöpanchömi sientekushun. Jehoväpa testïgonkunapa reunionninkunaqa yanapamantsik wakinkuna alli rurayanqampita yachakunapaqmi.​—Lei Romanos 1:11, 12.

Bibliachö pëpita yachakunqëkiman yarpachakurmi tsëtaqa ruranki. Rurashqankunaman, consëjonkunaman y awnikunqankunaman pensë. Yachakunqantsikman yarpachakunqantsik y mañakunqantsikmi yanapamäshun Dios alläpa kuyakoq y yachaq kanqanta entiendenapaq.​—Lei Josué 1:8 y Salmo 1:1-3.

Diosmanqa witita puëdenki pëman markäkur o yärakurllam. Pero markäkïnintsikqa kawëkaq cuentam, tsëmi imëka alimentaq cuenta imëpis yachakïkänantsik, tsëtaqa rurashun creinqantsikkunata ima yanapanqanman yarpachakurmi.​—Lei Mateo 4:4 y Hebreus 11:1, 6.

Jehoväqa sirweqninkunata kuyanmi. Tsëmi markäkïninkuna o yarakuyninkuna y shamoq tiempochö mana wanushpa kawakïninkuna peligroman churakaptinqa, imëkanöpapis yanapanqa (Salmo 91:1, 2, 7-10). Mana alli rurëkunaman mana ishkinapaq, y imanöpis más kushishqa kawanapaqmi yachatsimantsik.​—Lei Salmo 73:27, 28 y Santiagu 4:4, 8.