Mateu 2:1-23
2 Tsëpitanam Herödis* gobernanqan witsan+ Judëa provinciachö këkaq Belenchö Jesus+ yurinqanta musyar, estrëllakunata rikëkur willakoq nunakuna Jerusalenman shayämurqan
2 kënö tapukur: “¿Mëchötan këkan judïukunata gobernanampaq yurishqa wamra?+ Inti o Rupay Yarqamunan Läduchö këkarmi estrëllanta rikäyarqö, tsëmi puntanman qonqurikoq shayämurqö”.
3 Tsëta musyëkurmi, gobernaq Herödis y Jerusalenchö llapan nunakunaqa alläpa yarpachakuyarqan.
4 Tsëmi Herödisqa, tsë markachö mandakoq sacerdötikunata y Ley qellqaqkunata qayëkatsir, Cristu* mëchö yurinampaq kaqta tapurqan.
5 Tsënam pëkunaqa niyarqan: “Judëachö këkaq Belen+ markachömi, tsënö kanampaqmi Diospa willakoqnin kënö qellqarqan:
6 ‘Qamtaqa, Judächö këkaq Belen marka, manam Judächö gobernaqkunaqa mana kaqlla markatanöqa rikäyäshunkitsu, qampitam juk gobernaq kanqa, pëmi Israel nunakunata cuidanqa’”.+
7 Tsënam Herödisqa estrëllakunata rikëkur willakoq nunakunata pakëllapa qayatsirqan, y yachëllapa tapuparmi imë witsanna tsë estrëlla yurishqa kanqanta musyaskirqan.
8 Tsëpitanam kënö nir Belenman mandarqan: “Ëwar tsë wamrata ashiyämuy. Tarirqa willayämänëkipaq kutiyämunki, noqapis ëwar puntanman qonqurikunäpaq”.
9 Gobernaq tsënö niptinmi, pëkunaqa viajar sïguiyarqan. Inti o Rupay Yarqamunan Läduchö rikäyanqan estrëllaqa puntankunatam ëwarqan,+ y wamra këkanqan sitiupa jananchömi quedarirqan.
10 Estrëlla quedariptinqa, alläpam kushikuyarqan.
11 Y wayiman yëkurirnam, wamrata rikäyarqan maman Marïawan këkaqta, tsënam respetar puntanman qonqurikuyarqan. Y cäjankunata kicharkurmi öruta, yuraq inciensuta y mïrrata* qarayarqan.
12 Peru Herödisman mana kutiyänampaq suëñunkunachö Teyta Dios nishqa kaptinmi, juk nänipana nacionninkunata kutikuyarqan.+
13 Ëwakuyashqanchönam, Teyta Jehoväpa* angelnin suëñunchö yuripur Josëta kënö nirqan:+ “Sharkuy, kanan höra wamratawan mamäninta pusharkur Egiptuta ëwakuy. Herödismi wamrata ashïkur wanutsinampaq këkan, tsëmi Egiptuchö quedakunëki imatapis yapë ninqaqyaq”.
14 Tsënam Josëqa paqas höra sharkur wamratawan mamäninta pusharkur Egiptuta ëwakurqan,
15 y tsëchömi Herödis wanunqanyaq o wañunqanyaq quedakurqan. Tsënömi willakoqninwan Teyta Jehovä* kënö musyatsikunqan cumplikarqan: “Egiptupita yarqamunampaqmi tsurïta qayarqä”.+
16 Tsënam, estrëllakunata rikëkur willakoq nunakuna engañayanqanta musyëkur, Herödisqa alläpa cölerarqan. Tsëmi tsë nunakunata tapupar musyanqanmannö, Belenchö y amänun markakunachö ishkë watapita qepaman llapan ollqu wamrakunata wanutsiyänampaq mandakurqan.+
17 Tsënömi Diospa willakoqnin Jeremïas kënö ninqan cumplikarqan:
18 “Ramä markachömi llakikur y nanatsikur waqanqan wiyakarqan. Awmi, Raquelmi+ wamrankunapaq waqëkarqan. Wamrankuna pëwan manana kayaptinmi shoqayänantapis munarqantsu”.+
19 Herödis wanuriptinnam, Egiptuchö këkaptin Josëta suëñuyninchö Teyta Jehoväpa* angelnin yuripur+
20 kënö nirqan: “Wamrata wanutsita munaqkunaqa ushakäyashqanam. Sharkuy, wamratawan mamäninta pusharkur Israelta ëwakuy”.
21 Tsënam sharkur wamratawan mamäninta pusharkur Israelta kutikurqan.
22 Peru Herödispa rantin Arquelau jutiyoq tsurinna Judëa provinciachö gobernëkanqanta musyarmi, Josëqa tsëman ëwëta mantsarqan. Y Teyta Dios suëñuyninchö nishqa kaptinmi,+ Galilëa provinciaman ëwakurqan.+
23 Y Diospa willakoqninkuna, “Nazaret markapita* nirmi reqishqa kanqa”+ nir willakuyanqan cumplikänampaqmi Nazaret niyanqan markachö täkurqan.*+
Nötakuna
^ Rikäri “Bibliachö palabrakunata entiendinapaq” neqta.
^ O “Mesïas; Akrashqa”.
^ Tsëqa karqan, shumaq pukutaq o mushkoq polvum.
^ Capazchi tsëqa hebreu idiömachö “tseqllipi” neqpita shamun.
^ Kënöpis niyanmi: tärarqan; pärarqan.
