Juan 15:1-27
15 Noqam rasumpa kaq üvas planta kä, y Teytämi üvas plantata cuidar trabajaq.
2 Noqachö këkaq mana wayoq rämataqa llapantam wallurin, y wayoq kaq rämatanam mas wayunampaq limpiapan.+
3 Qamkunaqa ninqäkunata wiyakushqa karmi limpiuna këkäyanki.+
4 Noqawan juknölla imëpis kayë, y noqapis qamkunawan juknöllam imëpis kashaq. Imanömi rämapis üvas plantachö mana karqa kikinllapita wayuntsu, tsënöllam qamkunapis noqawan imëpis juknölla mana karqa wayuyankitsu.+
5 Noqam üvas planta kä y qamkunam rämakuna kayanki. Pï nunapis noqawan imëpis juknölla karqa, y noqa pëwan juknölla kaptïqa, mëtsikatam wayunqa.+ Noqapita rakikarqa, manam ima rurëtapis puëdiyankitsu.
6 Pï nunapis noqawan juknölla imëpis mana karqa, rämatanö wallur jitariyaptinmi tsakirinqa. Tsë rämakunataqa juntëkurmi ninaman jitar ushakätsiyan.
7 Noqawan juknölla imëpis kayaptiki y ninqäkunata shonquykikunachö imëpis katsiyaptikiqa, imata mañakuyaptikipis mañakuyanqëkinömi rurakanqa.+
8 Mëtsikata imëpis wayuyaptiki y qatimaqnïkuna kayanqëkita rikätsikuyaptikim Teytäta alabayan.+
9 Teyta kuyamanqannöllam noqapis qamkunata kuyarqö;*+ noqa kuyanqä nunakunanölla imëpis portakuyë.
10 Mandakunqäkunata cäsukurqa, kuyanqä nunakunam imëpis kayanki. Noqapis Teyta mandakunqankunata cäsukushqa karmi, pë kuyanqan nuna kä.
11 Tsëkunataqa qamkunata nirqö,* noqanölla kushishqa kayänëkipaqmi.+
12 Këtam qamkunata mandä:* qamkunata kuyanqänölla qamkunapis jukniki juknikikuna kuyanakuyanki.+
13 Amïgunkunarëkur wanunampaq o wañunampaq listu këkaq* nunanöqa, manam ni pï kuyakuntsu.+
14 Mandakunqäkunata cäsukurqa amïgükunam kayanki.+
15 Sirwipakoqqa manam patronnin imata ruranqanta musyantsu, tsëmi sirwipakoqkuna nirnatsu qamkunata reqiyashqëki. Teytäpita llapan wiyanqäta qamkunata musyatsishqa karmi, qamkunataqa amïgükuna nirna reqï.*
16 Manam qamkunatsu noqata akrayämarqunki, sinöqa noqam qamkunata akrarqö,* y mana imëpis ushakaqta wayur sïguiyänëkipaqmi qamkunata churarqö.* Tsëta rurayaptikim, Teytaqa imatapis jutïchö mañakuyanqëkinölla ruramunqa.+
17 Këkunataqa qamkunata nikä,* jukniki juknikikuna kuyanakuyänëkipaqmi.+
18 Kë munduchö nunakuna chikiyäshuptikiqa, musyayankinam mas puntata noqata chikimashqa kayanqanta.+
19 Kë munduchö nunakunanö kayaptikiqa, pëkunapa kayaptikim kuyayäshunkiman. Peru kë munduchö nunakunanö mana kayaptiki+ y pëkunapita qamkunata akrashqa kaptïmi,* kë munduchö nunakunaqa chikiyäshunki.+
20 Qamkunata kënö ninqäta* imëpis yarpäyë: sirwipakoqqa manam patronnimpita mastsu. Imëkata rurar noqata sufritsiyämashqa këkarqa, qamkunatapis imëkata rurarmi sufritsiyäshunki;+ ninqäkunata cäsukushqa karqa, qamkuna niyanqëkitapis cäsukuyanqam.
21 Mandamaqnïta mana reqirmi, pëkunaqa qatimaqnïkuna kayaptiki tsë llapanta rurayäshunki.+
22 Noqa shamur pëkunata mana parlapashqa kaptïqa, manam jutsayoqtsu* kayanman karqan.+ Peru kananqa manam jutsankunapita tsapäkuyta puëdiyantsu.+
23 Noqata chikimaqqa, Teytätapis chikinmi.+
24 Mana ni pï ruranqanta pëkunapa rikëninchö mana rurashqa kaptïqa, manam jutsayoqtsu* kayanman karqan;+ peru kananqa rikäyämashqa këkarmi chikiyämashqa, y Teytätapis chikiyashqam.
25 Tsëqa pasashqa pëkuna katsiyanqan Leychö kënö qellqarëkanqan cumplikänampaqmi: ‘Mana imanëkaptïmi chikiyämashqa’.+
26 Mandamunäpaq kaq yanapakoq santu espïritu shamurmi pï kanqäta musyatsiyäshunki;+ tsë santu espïritum rasumpa kaqta musyatsikun, y Teytapitam shamun.+
27 Y qamkunapis yachatsikur qallanqäpita noqawan kashqa karmi+ noqapita willakuyänëki.
Nötakuna
^ Kënöpis niyanmi: kuyayarqoq.
^ Kënöpis niyanmi: niyarqoq.
^ Kënöpis niyanmi: mandayaq.
^ O “vïdanta entregaq”.
^ Kënöpis niyanmi: reqiyaq.
^ Kënöpis niyanmi: churayarqoq.
^ Kënöpis niyanmi: akrayarqoq.
^ Kënöpis niyanmi: nikäyaq.
^ Kënöpis niyanmi: kayapteqmi.
^ Kënöpis niyanmi: niyanqaqta.
^ Kënöpis niyanmi: pecäduyoqtsu.
^ Kënöpis niyanmi: pecäduyoqtsu.
