Mateo 28:1-20
28 Samarikuna pʼunchay pasayta, semanaj ñaupaj pʼunchaynin sutʼiyamushajtin, María Magdalenawan chay ujnin Mariawanqa sepulturata qhawaj rerqanku.+
2 Jallpʼaqa mayta kharkatisqa, Jehová* Diospa angelnin cielomanta uraykamusqanrayku. Angelqa chimpaykuspa sepulturaj punkunmanta rumita tanqarparisqa, chay rumi patapitaj tiyashasqa.+
3 Chay angelqa lliuj lliuj jina mayta kʼancharishasqa, ropantaj ritʼi jina yuraj kasqa.+
4 Soldadostaj payta rikuspa manchariywan kharkatitisqanku, pachanpitaj titiyarpasqanku.
5 Angeltajrí chay warmista nerqa: “Ama manchachikuychejchu. Yachani Jesusta maskʼashasqaykichejta, pitachus rakhu kʼaspipi* wañucherqanku chayta.+
6 Payqa mana kaypiñachu. Nisqanman jina kausarinpun.+ Jamuychej, qhawaykuychej maypichus kasharqa chayta.
7 Kunanqa usqhayta rispa discipulosninman willamuychej: ‘Wañusqas ukhumanta kausarinpun. Payqa ñaupaqeykichejta Galileaman rishan,+ chaypi paywan tinkunkichej’, nispa. Noqaqa chayta willasunaykichejpaj jamuni”.+
8 Ajinapi chay warmisqa sepulturamanta usqhayllata mancha manchalla, may kusisqa kachaykukorqanku discipulosninman willamoj.+
9 Ñanta rishajtinkutaj Jesusqa paykunawan tinkukuspa nerqa: “Imaynalla”, nispa. Paykunataj Jesusman chimpaykuytawan kʼumuykukorqanku, chakisninmantataj japʼiykukorqanku.
10 Jesustaj paykunata nerqa: “Ama manchachikuychejchu. Rispa hermanosniyman willamuychej Galileaman rinankuta. Chaypi noqawan tinkukonqanku”, nispa.
11 Warmis rishajtinkutaj, wakin soldadosqa+ llajtaman rispa kuraj sacerdotesman willamorqanku chay tukuy imasta.
12 Kuraj sacerdotestaj kurajkunawan tantakuspa imatachus ruwanankuta parlarqanku. Chantá soldadosman ashkha qolqeta* pagaykorqanku.
13 Nerqankutaj: “Qankunaqa ninaykichej tiyan: ‘Discipulosnin tuta jamuspa ayanta* suwasqanku, puñunaykukama’,+ nispa.
14 Pilato chayta yachajtenqa noqayku paywan parlasqayku,* manataj chaymanta llakikunaykichejchu kanqa”, nispa.
15 Soldadostaj chay qolqeta japʼispa, yachachisqa kasqankuman jina parlarqanku. Chay llullakusqankutaj kunankama judíos ukhupi parlakushallanpuni.
16 Chantá 11 discipulosnenqa Galileaman rerqanku,+ maymanchus Jesús rinankuta nerqa chay orqoman, paywan tinkukamunankupaj.+
17 Jesusta rikuspataj ñaupaqenman kʼumuykukorqanku, wakintajrí iskayrayarqanku.
18 Jesustaj paykunaman qayllaykuspa nerqa: “Diosqa tukuy atiyta qowan cielopi, jinallataj kay jallpʼapipis.+
19 Chayrayku riychej, tukuy nacionesmanta runasta discipulosniyman tukuchimuychej.+ Paykunata bautizamuychej+ Tata Diospa sutinpi, Wawanpa sutinpi, espíritu santoj sutinpiwan.
20 Paykunaman kasukuyta yachachimuychej imastachus noqa kamacherqaykichej chay tukuy imasta.+ Ama qonqaychejchu, qankunawan tuta pʼunchay kasaj, kay mundoj imasnin* tukukunankama”,+ nispa.
Sutʼinchaykunasnin
^ Chayri “postepi”.
^ Chay qolqesqa qolqe metalmanta ruwasqa karqa.
^ Chayri “cuerponta”.
^ Parlasqayku: waj lugarespi ninku parlasajku.
^ Glosariopi kay mundoj imasnin nisqata leeriy.
