Mateo 19:1-30
19 Jesusqa chay imasta parlayta tukuytawan, Galileamanta puririspa Judeaj lindesninman* chayarqa, Jordán mayoj chimpanman.+
2 May chhika runastaj qhepanta rerqanku, chaypitaj onqosqasta sanoyacherqa.
3 Fariseostaj Jesusman qayllaykorqanku pantachiyta munaspa, taporqankutaj: “¿Uj runa atillanchu warminmanta divorciakuyta imallamantapis?”,+ nispa.
4 Jesustaj kuticherqa: “¿Manachu leerqankichej Diosqa runata qallariypi qharitawan warmitawan ruwasqanta?+
5 Nerqataj: ‘Chayrayku qhareqa tatanta, mamantawan saqespa warminman ujchaykukonqa,* iskayninkutaj ujllaña kanqanku’,*+ nispa.
6 Ajinapeqa manaña iskaychu kanku, manachayqa ujllaña. Chayrayku Diospa ujchasqantaqa* ama pipis tʼaqachunchu”,+ nispa.
7 Fariseostaj nerqanku: “Chanta, ¿imaraykutaj Moisés kamacherqa uj qhari divorcio papelta warminman qospa kachapunantari?”,+ nispa.
8 Jesustaj kuticherqa: “Moisesqa rumi sonqo kasqaykichejrayku saqesorqachej warmiykichejmanta divorciakunaykichejta.+ Chaywanpis qallariypeqa mana ajinachu karqa.+
9 Noqatajrí niykichej: Pillapis warminmanta divorciakuspa wajwan casaraykun chayqa, qhenchachakun. Warmin khuchichakuy juchaman urmajtillan* divorciakuyta atin”,+ nispa.
10 Discipulosnintaj nerqanku: “Casado kausay ajina kajtenqa, casarakoyqa mana allinchu”, nispa.
11 Jesustaj nerqa: “Mana tukuychu kay nisqataqa juntʼayta atinku, pikunamanchus Dios chay atiyta regalota jina qon chaykunalla.+
12 Wakin qharisqa nacekusqankumantapacha mana casarakunankupajchu kanku, wakintataj runas capanku. Wakintajrí paykunapuni mana casarakunkuchu cielopi kaj Gobiernorayku. Pichus mana casarakuspalla kakuyta atejqa kakullachun”,+ nispa.
13 Chantá wawasta Jesusman pusamorqanku, makisninta paykunaman churaykuspa* Diosmanta mañapunanpaj. Discipulosnintajrí chay pusamojkunata kʼamerqanku.+
14 Jesustaj nerqa: “Saqeychej wawasta noqaman jamunankuta, ama jarkʼaychejchu. Cielopi kaj Gobiernoqa paykuna jina kajkunajta”,+ nispa.
15 Wawasman makisninta churaykuytawantaj riporqa.
16 Chaypacha uj runa Jesusman qayllaykuspa taporqa: “Yachachejníy, ¿ima kʼacha ruwaykunatataj ruwanay tiyan wiñay kausayta japʼinaypajri?”,+ nispa.
17 Jesustaj chay runata nerqa: “¿Imaraykutaj kʼacha kajmanta noqata tapuwanki? Dioslla kʼachaqa.+ Wiñay kausayta japʼiyta munanki chayqa, Diospa kamachiykunasninta kasunallaykipuni tiyan”,+ nispa.
18 Chay runataj taporqa: “¿Mayqenkunata?”, nispa. Jesustaj kuticherqa: “Ama runata wañuchinkichu,+ ama qhenchachakunkichu,+ ama suwakunkichu,+ ama llulla testigomanta sayankichu,+
19 tataykita, mamaykitawan respetanki,+ runa masiykitapis munakunki qan kikiykita jina”,+ nispa.
20 Chay joventaj nerqa: “Tukuy chaykunataqa kasukuniñapuni. ¿Imatawan ruwanay tiyan?”, nispa.
21 Jesustaj kuticherqa: “Sichus Diosta allintapuni yupaychayta munanki chayqa,* tukuy imasniykita vendemuspa wajchasman chay qolqeta qopuy. Ajinamanta cielopi may kapuyniyoj kanki,+ chantá qhepayta jamuy”,+ nispa.
22 Chay jovenqa chayta uyarispa llakisqa riporqa, manchay qhapaj kasqanrayku.+
23 Chantá Jesusqa discipulosninta nerqa: “Cheqatapuni niykichej, uj qhapaj runaqa cielopi kaj Gobiernoman mana yaykuyta atillanqachu.+
24 Ujtawan niykichej: Uj camelloraj agujaj ninrinta pasayta atinman, uj qhapaj runa Diospa Gobiernonman yaykunanmantaqa”,+ nispa.
25 Chayta uyarispa discipulosnenqa, maytapuni tʼukorqanku, nerqankutaj: “Ajina kajtin, ¿pitaj salvakuyta atinmanri?”,+ nispa.
26 Jesustaj paykunata allinta qhawarispa nerqa: “Runaspaj chayqa mana atikunchu, Diospajrí tukuy imapis atikullan”,+ nispa.
27 Pedrotaj kuticherqa: “Noqaykoqa tukuy imata saqespa qhepaykita jamuyku. ¿Imataj noqaykupaj kanqari?”,+ nispa.
28 Jesustaj paykunata nerqa: “Cheqatapuni niykichej: Noqa* jatun kamachina tiyanaypi tiyaykukojtiy, Diosqa tukuy imata mosojyachenqa. Chaypacha qankunapis, qhepayta jamusqaykichejrayku 12 kamachina tiyanaspi tiyaykukullankichejtaj, Israelpa 12 ayllusninta* juzganaykichejpaj.+
29 Pichus wasisninta, hermanosninta, hermanasninta, tatanta, mamanta, wawasninta chayri jallpʼasninta sutiyrayku saqejqa, pachaj jinastawanraj japʼenqa, wiñay kausaytapis japʼillanqataj.+
30 ”Chaywanpis ñaupajpi kajkunamanta ashkhasqa qhepapi kanqanku, qhepapi kajkunamanta ashkhastaj ñaupajpi kanqanku.+
Sutʼinchaykunasnin
^ Linde: waj lugarespi ninku lindero.
^ Griego parlaypeqa niyta munan sumajta kʼaskaykukuy, machʼawan jina.
^ Chayri “iskayninkutaj uj runa jinallaña kanqanku”.
^ Chayri “Dios uj yugollaman churasqantaqa”.
^ Chayri “Warmin wajwan puriykojtillan”. Griego parlaypeqa nin, pornéia. Glosariopi khuchichakuy jucha nisqata leeriy.
^ Makisninta paykunaman churaykuspa nispaqa bendecinanta nishan.
^ Chayri “tukuy imata allintapuni juntʼayta munanki chayqa”.
^ Griego parlaypeqa nin, “Runaj Wawan”. Glosariopi Runaj Wawan nisqata leeriy.
^ Uj aylloqa uj familiamanta miraj ashkha familias kanku.
