Mateo 20:1-34
20 ”Cielopi kaj Gobiernoqa uva huertayoj runaman rijchʼakun, pichus tutamanta uva huertanpaj peonesta minkʼaj llojsisqa.+
2 Payqa peoneswan parlasqa uj denario* qolqeta diantinmanta pagananpaj. Chantá uva huertanman kachasqa.
3 Ujtawan las nueveta jina llojsispa, mercado plazapi mana llankʼanayoj runasta sayashajta rikullasqataj.
4 Paykunatataj nisqa: ‘Qankunapis uva huertaypi llankʼamuychej, maychus kajta pagapusqaykichej’, nispa.
5 Paykunataj risqanku. Uva huertayojqa ujtawan chaupi pʼunchay qayllata, chantá tarden las tres chayta llojsispa peonesta minkʼamullasqataj.
6 Tarden las cinco chayta llojsispa wajkunata sayashajta tarillasqataj, nisqataj: ‘¿Imaraykutaj diantinta kaypi mana llankʼaspa kashankichejri?’, nispa.
7 Paykunataj nisqanku: ‘Mana pipis minkʼakuwaykuchu’, nispa. Paytaj nisqa: ‘Qankunapis uva huertaypi llankʼamuychej’, nispa.
8 ”Chʼisiyaykuyta uva huertayojqa kuraj kamachinta nisqa: ‘Peonesta wajyaspa pagapuy,+ qhepata jamojkunamanta qallarispa, ñaupajta jamojkunapi tukuchaspa’, nispa.
9 Tardenpi las cincomanta llankʼajkunamanqa, sapa ujman uj denario* qolqeta pagapusqa.
10 Chayrayku diantinta llankʼajkunaqa, yuyasqanku aswan ashkhata japʼinankuta. Chaywanpis paykunamanqa uj denario* qolqellatataj pagapusqa.
11 Pagonkuta japʼiytawantaj uva huertayojpaj rimayta qallarisqanku.
12 Nisqankutaj: ‘Kay qhepata jamojkunaqa uj horallata llankʼanku, qantaj noqaykuman jinallataj paganki. Noqaykoqa diantinta ruphaypi mayta llankʼayku’, nispa.
13 Huertayojtaj ujninman kutichisqa: ‘Qantaqa mana ima sajratapis ruwashaykichu. ¿Manachu uj denario* qolqeta pagasunaypaj parlarqanchej?+
14 Pagoykita japʼispa ripuy. Qhepata jamojkunamanpis qanman jinallataj pagayta munani.
15 ¿Manachu qolqeywanqa munasqayta ruwayta atini? ¿Paykunawan kʼacha kajtiychu sajra ñawiwan qhawawanki?’,*+ nispa.
16 Ajina ari, qhepapi kajkunaqa ñaupajpi kanqanku, ñaupajpi kajkunataj qhepapi kanqanku”.+
17 Jerusalenman wicharishaspa, Jesusqa 12 discipulosninta wajnejman pusaspa sapallankupi nerqa:+
18 “Uyariwaychej, Jerusalenman wicharishanchej, chaypitaj noqataqa* kuraj sacerdotesman, leymanta yachachejkunaman jaywaykuwanqanku. Paykunataj wañuchisqa kanayta nenqanku,+
19 nacionesmanta runasmantaj jaywaykuwanqanku burlakunawankupaj, jasutʼinawankupaj, rakhu kʼaspipitaj* wañuchinawankupaj.+ Kinsa pʼunchayninmantaj kausarichisqa kasaj”,+ nispa.
20 Chantá Zebedeoj+ warmenqa iskay wawasninwan Jesusman qayllaykuspa qonqoriykukorqa, uj imata mañakunanpaj.+
21 Jesustaj taporqa: “¿Imatataj munankiri?”, nispa. Paytaj kuticherqa: “Niy ari kay iskay wawasniy Gobiernoykipi tiyaykukunankuta, ujnin pañaykipi, ujnintaj lloqʼeykipi”,+ nispa.
22 Jesustaj kuticherqa: “Qankunaqa mana yachankichejchu imatachus mañakushasqaykichejta. ¿Atiwajchejchu ujyayta, ujyanaypajña kashani chay copamanta?”,+ nispa. Paykunataj kuticherqanku: “Arí, atiykuman”, nispa.
23 Paytaj nerqa: “Copaymantaqa ujyankichejpuni.+ Chaywanpis pikunachus pañaypi, lloqʼeypiwan tiyaykukunankoqa, mana noqamantachu kashan, manachayqa Tataymanta. Pay ajllanqa pikunachus chaypi tiyaykukunankuta”,+ nispa.
24 Chunka discipulosnintaj chayta yachaspa, chay iskay hermanospaj phiñakorqanku.+
25 Jesustajrí tukuyninkuta tantaykuspa nerqa: “Qankunaqa yachankichej nacionesta kamachejkunaqa munayninkuman jina runasta kamachisqankuta, autoridadespis runasta atiyninkupi japʼisqankuta.+
26 Qankuna ukhupeqa mana ajinachu kanan tiyan.+ Pichus qankunamanta kuraj kayta munajqa, wajkunata sirvinan tiyan.+
27 Pichus qankunamanta ñaupajpi kayta munajqa, esclavoykichej kanan tiyan.+
28 Noqapis* mana sirvichikojchu jamuni, manachayqa wajkunata sirvej,+ kausayniytapis qosaj ashkha runasta kacharichinaypaj”,+ nispa.
29 Jericomanta llojsishajtinku, ashkha runas Jesuspa qhepanta rerqanku.
30 Ñan patapitaj iskay ciegos tiyashasqanku. Jesús chayninta pasashasqanta uyarispataj qhaparerqanku: “¡Señor, Davidpa Wawan, khuyarikuwayku ari!”,+ nispa.
31 Runastaj chay ciegosta chʼinyachiyta munaspa kʼamerqanku. Paykunatajrí aswan kallpawanraj qhaparerqanku: “¡Señor, Davidpa Wawan, khuyarikuwayku ari!”, nispa.
32 Jinapi Jesusqa sayaspa ciegosta wajyarqa, taporqataj: “¿Imatataj munankichej qankunapaj ruwanayta?”, nispa.
33 Paykunataj kuticherqanku: “Señor, ñawisniyku rikunanta munayku”, nispa.
34 Jesustaj mayta khuyakuspa ñawisninkuta llankharerqa.+ Chay ratopachataj watejmanta rikuyta aterqanku, Jesuspa qhepantataj rerqanku.
Sutʼinchaykunasnin
^ Yanapa B14 nisqata leeriy.
^ Yanapa B14 nisqata leeriy.
^ Yanapa B14 nisqata leeriy.
^ Yanapa B14 nisqata leeriy.
^ Chayri “envidiakuwanki”.
^ Griego parlaypeqa nin, “Runaj Wawan”. Glosariopi Runaj Wawan nisqata leeriy.
^ Chayri “postepitaj”.
^ Griego parlaypeqa nin, “Runaj Wawan”. Glosariopi Runaj Wawan nisqata leeriy.
