Pa nos por percura pa nos famia, nos mester di placa. (Proverbionan 30:8) Al fin y al cabo, Bijbel ta bisa cu ‘placa ta un proteccion.’ (Eclesiastes 7:12) Kisas no ta facil pa papia tocante placa, pero no laga placa causa problema den boso matrimonio. (Efesionan 4:32) Como pareha, boso mester confia otro y dicidi hunto con boso ta uza boso placa.

LOKE BIJBEL TA BISA: “Cua di boso cu kier traha un toren no ta sinta calcula e gasto prome pa wak si e tin suficiente pa cab’e?” (Lucas 14:28) Ta masha importante pa boso plania hunto con boso lo uza boso placa. (Amos 3:3) Dicidi kico ta e cosnan cu boso mester cumpra y cuanto placa boso por gasta. (Proverbionan 31:16) No ta pasobra bo tin placa pa cumpra un cos, bo mester cumpr’e. Evita debe. Cumpra cos ora boso tin placa.—Proverbionan 21:5; 22:7.

LOKE BOSO POR HACI:

• Si boso resta placa fin di luna, dicidi hunto kico boso ta bay haci cu ne

• Si fin di luna boso placa no ta yega, plania specificamente con boso por baha gasto. Por ehempel, boso lo por cushina na cas en bes di come afo

LOKE BIJBEL TA BISA: “Atende tur cos honestamente, no solamente den bista di Jehova, sino tambe den bista di hende.” (2 Corintionan 8:21) Sea honesto cu bo casa; lag’e sa cuanto bo ta gana y cuanto bo ta gasta.

Semper papia cu bo casa prome cu bo tuma un decision pa cumpra algo cu ta envolve hopi placa. (Proverbionan 13:10) Ora un pareha ta honesto cu otro tocante placa, nan ta contribui na paz den nan matrimonio. Mira e placa cu bo ta gana como placa di e famia, y no como bo placa.—1 Timoteo 5:8.

LOKE BOSO POR HACI:

• Dicidi hunto cuanto placa cada un di boso por gasta pa luna sin cu boso tin cu puntra otro prome

• No warda te ora boso haya problema economico pa papia tocante placa