SECCION 3
Con pa Resolve Problema
“Stima otro intensamente, pasobra amor ta tapa un multitud di pica.”—1 Pedro 4:8
Den bida matrimonial semper por surgi problema. Esaki no ta nada straño pasobra boso ningun di dos ta pensa ni sinti mescos. Ademas, e forma cu boso a lanta tampoco no ta mescos. Tin factor pafo di e matrimonio y cosnan inespera cu tambe por causa problema.
Tin biaha hende kier cera wowo pa realidad, pero Bijbel ta conseha nos pa enfrenta nos problemanan. (Mateo 5:23, 24) Y e mihor manera pa resolve problema ta door di aplica principionan di Bijbel.
1 PAPIA TOCANTE E PROBLEMA
LOKE BIJBEL TA BISA: “Tin ... un tempo pa papia.” (Eclesiastes 3:1, 7) Pues, si boso tin un problema, tuma tempo pa papia tocante dje. Sea franco cu bo casa, y lag’e sa con bo ta sinti y con bo ta mira e asunto. Semper “papia berdad” cu otro. (Efesionan 4:25) Hasta si boso ta hopi rabia, domina boso emocionnan pa boso no cuminsa pleita. Door di reacciona trankil, bo ta evita di pusha palo bou di candela.—Proverbionan 15:4; 26:20.
Hasta si boso no ta di acuerdo cu otro, keda amabel cu otro, y nunca lubida di mustra amor y respet pa otro. (Colosensenan 4:6) Purba di resolve e problema mas pronto posibel y no keda sin papia cu otro.—Efesionan 4:26.
LOKE BO POR HACI:
-
Palabra un ora apropia pa boso papia tocante e asunto
-
Ora bo casa ta papia, scuch’e cu atencion y no interumpie. Ora e caba di papia, bo tambe por duna bo opinion
2 SCUCHA Y PURBA DI COMPRONDE OTRO
LOKE BIJBEL TA BISA: “Tene tierno cariño pa otro. Pa loke ta mustra honor na otro, tuma e iniciativa.” (Romanonan 12:10) E manera cu boso ta scucha ta masha importante. Mustra “sintimento pa otro”, sea humilde y purba di compronde otro su punto di bista. (1 Pedro 3:8; Santiago 1:19) No haci comosifuera bo ta scucha. Si ta posibel, stop cu loke boso ta haciendo anto presta atencion na otro, of palabra pa papia riba e asunto mas laat. Si boso ta mira otro como compañero di team y no como contrincante, boso lo no “rabia” lihe cu otro.—Eclesiastes 7:9.
LOKE BO POR HACI:
-
Maske bo no ta di acuerdo cu loke bo casa ta bisa, keda scuch’e prome cu bo saca conclusion
-
Purba di compronde kico tin tras di loke bo casa ta bisa. Presta atencion na su body language y tono di bos
3 CUMPLI CU BOSO DECISION
LOKE BIJBEL TA BISA: “Den tur trabou tin ganashi, ma djis papia cu boca so ta conduci na pobreza.” (Proverbionan 14:23) Pues, e echo cu boso ta yega na un bon manera pa resolve un problema no ta suficiente. Boso tin cu cumpli tambe cu loke boso dos a dicidi. Kisas boso tin cu haci hopi esfuerso, pero e sacrificio ey ta bale la pena. (Proverbionan 10:4) Si boso traha hunto como team, boso lo “tin un bon pago” pa boso esfuerso.—Eclesiastes 4:9.
LOKE BOSO POR HACI:
-
Dicidi ki medidanan practico boso lo tuma pa resolve boso problema
-
Evalua de bes en cuando con ta bayendo