Матфейы 10:1—42
10 Уый фӕстӕ фӕдзырдта йӕ дыууадӕс ахуыргӕнинагмӕ ӕмӕ сын радта тых, сӕ бар куыд цӕуа дӕлимонтыл*+, цӕмӕй сӕ адӕмӕй сурой ӕмӕ дзӕбӕх кӕной алыхуызон низтӕй рынчынты ӕмӕ, нӕфӕразгӕ чи уыд, уыдоны.
2 Ӕмӕ мӕнӕ дыууадӕс апостолӕн сӕ нӕмттӕ+: фыццаг – Симон, хонынц ма йӕ Петр*+ дӕр, ӕмӕ йе ’фсымӕр Андрей+; Иаков ӕмӕ йе ’фсымӕр Иоанн – Зеведейы фырттӕ+;
3 Филипп ӕмӕ Варфоломей+; Фома+ ӕмӕ хъалонисӕг Матфей+; Алфейы фырт+ Иаков ӕмӕ Фаддей;
4 Симон Кананит*+ ӕмӕ Иудӕ Искариот – фӕстӕдӕр Йесойы чи ауӕй кодта+, уый.
5 Йесо ацы дыууадӕсы арвыста адӕммӕ ӕмӕ сын бафӕдзӕхста+: «Ма ацӕут ӕндӕр адӕмты бӕстӕм, стӕй самариаг горӕттӕй дӕр макӕцымӕ бацӕут+,
6 фӕлӕ ацӕут Израилы адӕммӕ – сӕфт фыстӕй уӕлдай чи нӕу, уыдонмӕ+.
7 Цӕут ӕмӕ адӕмӕн дзурут, уӕларвон паддзахад ӕрхӕстӕг+, зӕгъгӕ.
8 Дзӕбӕх кӕнут рынчынты+, ӕгас кӕнут мӕрдты, хъотырджынтӕн сафут сӕ низ ӕмӕ сурут хӕйрӕджыты. Лӕвар райстат – лӕвар дӕттут+.
9 Ма ахӕссут уемӕ сызгъӕрин, ӕвзист кӕнӕ ӕрхуы уӕ роны бастӕй+,
10 нӕдӕр хызын, нӕдӕр ивӕн хӕдон*, нӕдӕр дзабыртӕ, нӕдӕр лӕдзӕг, уымӕн ӕмӕ фыдӕбонгӕнӕг уый аккаг у, ӕмӕ йын къӕбӕр бахӕрын кӕной+.
11 Цыфӕнды горӕт кӕнӕ хъӕумӕ ма бацӕуат, ссарут-иу дзы аккаг адӕймаг ӕмӕ-иу уымӕ ӕрлӕуут, цалынмӕ уыцы ранӕй нӕ рацӕуат, уӕдмӕ+.
12 Хӕдзармӕ бацӕугӕйӕ та-иу хӕдзаронтӕн арфӕ ракӕнут, фарн ацы хӕдзары, зӕгъгӕ.
13 Ӕмӕ кӕд хӕдзар аккаг уа, уӕд ын уӕ зӕрдӕ цы фарн зӕгъы, уый йыл ӕрцӕуӕд+. Кӕд нӕ уа аккаг, уӕд та уӕ фарн уӕхимӕ раздӕхӕд.
14 Кӕм уӕ не суазӕг кӕной ӕмӕ уын уӕ ныхӕстӕм кӕм нӕ байхъусой, уыцы хӕдзарӕй кӕнӕ горӕтӕй рацӕугӕйӕ та-иу уӕ къӕхты рыг ӕрцӕгъдут+.
15 Ӕцӕг уын зӕгъын: Тӕрхоны бон Содом+ ӕмӕ Гоморрӕйы бӕстӕйӕн уыцы горӕтӕй ӕнцондӕр уыдзӕни+.
16 Хъусут, ӕз сымах ӕрвитын, фысты бирӕгъты ’хсӕнмӕ куыд ӕрвитай, уыйау+. Уӕдӕ кӕлмытау уӕхи хъахъхъӕнут+, бӕлӕттау ут ӕнӕхин+.
17 Уӕхи адӕмӕй хъахъхъӕнут+, уымӕн ӕмӕ уӕ дӕтдзысты тӕрхондӕттӕм+ ӕмӕ уӕ се ’мбырдгӕнӕнты+ ехсӕй нӕмдзысты+.
18 Мӕн тыххӕй уӕ кӕндзысты хицӕуттӕм ӕмӕ паддзӕхтӕм+, цӕмӕй уыдон дӕр ӕмӕ иннӕ адӕмтӕ дӕр фехъусой хорз хабар+.
19 Фӕлӕ уӕ тӕрхонмӕ куы раттой, уӕд-иу, цы зӕгъат ӕмӕ куыд зӕгъат, ууыл ма тыхсут – уыцы сахат, цы зӕгъат, уый зондзыстут+,
20 уымӕн ӕмӕ ӕрмӕст сымах нӕ дзурдзыстут, фӕлӕ уӕ Фыды сыгъдӕг тых дзурдзӕн уӕ дзыхӕй+.
21 Ӕфсымӕр ӕфсымӕры+ ратдзӕн мӕлӕтмӕ, фыд та – йӕ хъӕбулы, ӕмӕ сывӕллӕттӕ дӕр суыдзысты сӕ ныййарджыты ныхмӕ ӕмӕ сӕ ратдзысты мӕлӕтмӕ+.
22 Ӕмӕ уӕ мӕ номы тыххӕй ӕппӕт адӕм дӕр се сӕфт уындзысты+. Фӕлӕ кӕронмӕ фидар чи фӕлӕууа, уый фервӕздзӕн+.
23 Иу горӕты уӕ фӕдыл куы зилой, уӕд лидзут иннӕмӕ+, уымӕн ӕмӕ уын ӕцӕг зӕгъын: Израилы ӕппӕт горӕттыл нӕма ӕрзилдзыстут+, афтӕ ӕрцӕудзӕн Адӕймаджы Фырт+.
24 Ахуыргӕнинаг йӕ ахуыргӕнӕгӕй уӕлдӕр нӕ вӕййы, цагъар та – йӕ хицауӕй+.
25 Ахуыргӕнинаг йӕ ахуыргӕнӕджы хуызӕн куы суа, цагъар та – йӕ хицауы хуызӕн+, уӕд уымӕй райгонд уӕд. Ӕмӕ хӕдзары хицауы Велзевул*+ кӕм схуыдтой, уым ын йӕ хӕдзаронты куыннӕ хондзысты афтӕ?
26 Уӕдӕ сӕ ма тӕрсут, уымӕн ӕмӕ ницы у афтӕ ӕмбӕхст, ӕмӕ ма раргом уа, ӕмӕ нӕй ахӕм сусӕгдзинад, ӕмӕ ма рахъӕр уа+.
27 Ӕхсӕвыгон уын цы дзурын, уый дзурут бонӕй, ӕмӕ уын сусӕгӕй цы уа загъд, уый хъусын кӕнут хӕдзӕртты сӕртӕй+.
28 Ӕмӕ ма тӕрсут+, уӕ амарын кӕй бон у, фӕлӕ уын уӕ фидӕны цард* байсын йӕ бон кӕмӕн нӕу, уыдонӕй. Тӕрсут, адӕймаджы гееннӕйы* фесафын кӕй бон у+, уымӕй+.
29 Дыууӕ сырддонцъиуы лыстӕг ӕхцайыл* нӕ уӕй кӕнынц?+ Фӕлӕ уыдонӕй иу дӕр зӕхмӕ, уӕ Фыд ӕй ма зона, афтӕмӕй не ’рхаудзӕн+.
30 Сымахӕн та уӕ сӕрыхъуынтӕ дӕр иууылдӕр нымад сты+.
31 Уӕдӕ ма тӕрсут: сымах бирӕ сырддонцъиутӕй дӕр зынаргъдӕр стут+.
32 Уӕдӕ, мемӕ иудзинады кӕй ис, уый адӕмы раз ӕргом чи дзура, уый тыххӕй ӕз дӕр ӕргом зӕгъдзынӕн мӕ уӕларвон Фыды раз, ӕз йемӕ иудзинады+ дӕн, зӕгъгӕ.
33 Фӕлӕ адӕмы раз мӕнӕй афтӕ чи зӕгъа, ӕз ӕй нӕ зонын, зӕгъгӕ, уымӕй ӕз дӕр мӕ уӕларвон Фыды раз зӕгъдзынӕн, нӕ йӕ зонын+, зӕгъгӕ.
34 Афтӕ ӕнхъӕл ма ут, ӕмӕ ӕз зӕхмӕ фарн ӕрхӕссынмӕ ӕрцыдтӕн. Фарн ӕрхӕссынмӕ не ’рцыдтӕн+, фӕлӕ хъама.
35 Ӕз ӕрцыдтӕн, цӕмӕй фырты скӕнон йӕ фыды ныхмӕ, чызджы йӕ мады ныхмӕ, ӕмӕ чындзы та йе ’фсины ныхмӕ+.
36 О, адӕймагӕн йе знӕгтӕ уыдзысты йӕхи бинонтӕ.
37 Йӕ фыды кӕнӕ йӕ мады мӕнӕй фылдӕр чи уарзы, уый мӕн аккаг нӕу, стӕй йӕ фырты кӕнӕ йӕ чызджы дӕр мӕнӕй фылдӕр чи уарзы, уый дӕр мӕн аккаг нӕу+.
38 Ӕмӕ йӕ хъизӕмӕртты хъӕд чи нӕ райса ӕмӕ мӕ фӕдыл чи нӕ цӕуа, уый мӕн аккаг нӕу+.
39 Йӕ цард* чи бахъахъхъӕна, уый йӕ фесафдзӕн, йӕ цард мӕн тыххӕй чи ратта, уый та йӕ бахъахъхъӕндзӕн+.
40 Сымах чи суазӕг кӕны, уый суазӕг кӕны мӕн дӕр, мӕн чи суазӕг кӕны, уый та суазӕг кӕны, чи мӕ рарвыста, уый дӕр+.
41 Пехуымпары, пехуымпар кӕй у, уый тыххӕй чи суазӕг кӕна, уымӕн уыдзӕн пехуымпары аккаг хӕрзиуӕг+. Рӕстгӕнӕджы, рӕстгӕнӕг кӕй у, уый тыххӕй чи суазӕг кӕна, уымӕн та уыдзӕн рӕстгӕнӕджы аккаг хӕрзиуӕг+.
42 Ӕмӕ ацы гыццылтӕй иуӕн дӕр, мӕ ахуыргӕнинаг кӕй у, уый тыххӕй уазал доны къус дӕр чи бадара, уый дӕр, ӕцӕг уын зӕгъын, ӕнӕ хӕрзиуӕгӕй нӕ баззайдзӕн»+.
Фиппаинӕгтӕ
^ Грекъ. пне́вма. Кӕс Уӕлӕмх. 7.
^ «Симон, хонынц ма йӕ Петр дӕр» – арӕхдӕр у «Петр», зӕгъӕм, Мф 14:28; Мф 16:16 у «Симон Петр»; Хъд 15:14 у «Симеон»; Ин 1:42 у «Кифӕ».
^ Комк. «дыууӕ хӕдоны».
^ «Велзевул» – хӕйрӕджыты ӕлдары нӕмттӕй иу.
^ Кӕс Уӕлӕмх. 9.
^ Комк. «уӕ уд»; «уд» – грекъ. психе́. Кӕс Уӕлӕмх. 6.
^ Комк. «ассарийыл». Кӕс Уӕлӕмх. 18.
^ Комк. «уд» – грекъ. психе́. Кӕс Уӕлӕмх. 6.
