Хъуыддӕгтӕ 15:1—41
15 Уыцы рӕстӕг Иудейӕйӕ+ чидӕртӕ ӕрцыд ӕмӕ ӕфсымӕртӕн амонын райдыдтой, зӕгъгӕ, Моисейы закъонмӕ+ гӕсгӕ сунӕт куы не скӕнат+, уӕд нӕ фервӕздзыстут.
2 Фӕлӕ Павел ӕмӕ Варнавӕ семӕ не сразы сты, ӕмӕ быцӕу дӕр кодтой. Уӕд бауынаффӕ кодтой, цӕмӕй уыцы хъуыддаджы фӕдыл Павел, Варнавӕ ӕмӕ иннӕ ӕфсымӕртӕй цалдӕр ацӕуой Иерусалиммӕ+ апостолтӕм ӕмӕ хистӕр нӕлгоймӕгтӕм.
3 Ӕмбырд сӕ иуцасдӕр ахизын кодта+, ӕмӕ сӕ фӕндаг Финики ӕмӕ Самарийыл акодтой. Ӕмӕ ӕфсымӕртӕн дзырдтой, иннӕ адӕмтӕ+ Хуыцауы фӕндагыл куыд ӕрлӕууынц, уый тыххӕй ӕмӕ уымӕй се ’ппӕтӕн дӕр стыр цин хастой+.
4 Иерусалиммӕ куы ’рцыдысты, уӕд сыл ӕмбырд, апостолтӕ ӕмӕ хистӕр нӕлгоймӕгтӕ тынг бацин кодтой+. Павел ӕмӕ сын Варнавӕ радзырдтой, Хуыцау сӕ къухӕй цы бирӕ хъуыддӕгтӕ сарӕзта, уый тыххӕй+.
5 Фӕлӕ, фарисейты къордӕй* уырнджытӕ чи сси, уыдон сыстадысты ӕмӕ загътой: «Иннӕ адӕмтӕй уырнӕг чи сси, уыдонӕн сунӕт скӕнын хъӕуы+ ӕмӕ сын зӕгъын хъӕуы, цӕмӕй Моисейы закъон ӕххӕст кӕной»+.
6 Уӕд апостолтӕ ӕмӕ хистӕр нӕлгоймӕгтӕ уыцы хъуыддаджы фӕдыл ӕрӕмбырд сты+.
7 Ӕмӕ бирӕ куы фӕныхас кодтой*+, уӕд Петр сыстад ӕмӕ загъта: «Ӕфсымӕртӕ, сымах тынг хорз зонут, Хуыцау не ’хсӕнӕй фыццаг мӕн кӕй равзӕрста, цӕмӕй иннӕ адӕмтӕн хъусын кӕнон хорз хабар, ӕмӕ баууӕндой+.
8 Ӕмӕ зӕрдӕтӕ зонӕг Хуыцау+ уыдонмӕ дӕр кӕй ӕркаст, уый равдыста, махау сӕ йӕ сыгъдӕг тыхӕй кӕй схайджын кодта+, уымӕй.
9 Махмӕ дӕр ӕмӕ уыдонмӕ дӕр+ иухуызон цӕстӕй ракаст, уымӕн ӕмӕ сын сӕ зӕрдӕтӕ уырнындзинады фӕрцы ссыгъдӕг кодта+.
10 Уӕдӕ ма Хуыцауы цӕмӕн фӕлварут ӕмӕ, нӕдӕр нӕ фыдӕлты, нӕдӕр нӕхи бон ахӕссын кӕй не сси+, уыцы ӕфсондз+ ахуыргӕнинӕгтыл цӕмӕн ӕвӕрут?
11 Мах, дзуттӕгты, уырны, Хицау Йесойы стыр хорзӕхы+ фӕрцы кӕй фервӕздзыстӕм, ӕмӕ уыдоны дӕр уый уырны»+.
12 Уӕд иууылдӕр ӕрсабыр сты ӕмӕ се ’ргом аздӕхтой Варнавӕ ӕмӕ Павелмӕ. Уыдон радзырдтой, иннӕ адӕмты ’хсӕн Хуыцау сӕ къухӕй цы бирӕ нысӕнттӕ ӕмӕ диссӕгтӕ ӕвдыста, уый тыххӕй+.
13 Сӕ ныхас куы фесты, уӕд Иаков загъта: «Ӕфсымӕртӕ, байхъусут-ма мӕм+.
14 Симеон*+ радзырдта, Хуыцау иннӕ адӕмтӕм фыццаг хатт куыд ӕркаст, цӕмӕй уыдонӕй йӕхицӕн скӕна, йӕ ном ын чи хӕсса, ахӕм адӕм+.
15 Ууыл дзурӕг сты Пехуымпарты чингуыты фыст ныхӕстӕ дӕр:
16 „Уый фӕстӕ ӕз раздӕхдзынӕн ӕмӕ Давиды хӕлд хӕдзар ногӕй сараздзынӕн. Йӕ хӕлддзӕгтӕ йын ӕрӕмбырд кӕндзынӕн ӕмӕ та йӕ ногӕй сараздзынӕн+,
17 цӕмӕй ма ацы адӕмӕй чи баззайа, уыдон, ӕппӕт адӕмтӕй мын мӕ ном чи хӕссы, уыдонимӕ иумӕ Йегъовӕйы зӕрдиагӕй агурой,– зӕгъы Йегъовӕ, ацы хъуыддӕгтӕ чи аразы+
18 ӕмӕ адӕттӕ саразын тынг раджы чи сфӕнд кодта, уый“+.
19 Уымӕ гӕсгӕ мӕ хъуыды у ахӕм: иннӕ адӕмтӕй Хуыцаумӕ чи раздӕхт, уыдоны къуылымпы кӕнын нӕ хъӕуы,+
20 фӕлӕ сӕм ныффыссӕм, цӕмӕй сӕхи хизой, мӕнгхуыцӕуттӕн+ кувынимӕ баст цыдӕриддӕр у, уыдӕттӕй, хӕтындзинадӕй*+, хӕдмӕл фосы* дзидзайӕ+ ӕмӕ тугӕй+.
21 Раджы замантӕй фӕстӕмӕ Моисейы ныхӕстӕ хъусын кӕнынц алы горӕты дӕр, уымӕн ӕмӕ сӕ алы сабаты дӕр ӕмбырдгӕнӕнты хъӕрӕй фӕкӕсынц»+.
22 Уӕд апостолтӕ ӕмӕ хистӕр нӕлгоймӕгтӕ ӕгас ӕмбырдимӕ сфӕнд кодтой сӕхицӕй дыууӕ адӕймаджы равзарын ӕмӕ сӕ Павел ӕмӕ Варнавӕимӕ+ Антиохимӕ арвитын. Ӕмӕ равзӕрстой, Варсавӕ кӕй хуыдтой, уыцы Иудӕйы ӕмӕ Силӕйы – сӕ дыууӕ дӕр уыдысты, разамынд чи лӕвӕрдта, ахӕм ӕфсымӕртӕ.
23 Семӕ сын арвыстой ахӕм фыстӕг:
«Антиохи+, Сири ӕмӕ Киликийы+ ӕндӕр адӕмтӕй цы ӕфсымӕртӕ ис, уыдонмӕ фыссынц се ’фсымӕртӕ – апостолтӕ ӕмӕ хистӕр нӕлгоймӕгтӕ. Арфӕйаг ут!
24 Мах фехъуыстам, махӕй уӕ чидӕртӕ сӕ ныхӕстӕй кӕй къуылымпы кӕнынц+ ӕмӕ уын уӕ зонд кӕй дзӕгъӕл кӕнынц, фӕлӕ сын мах ахӕмӕй ницы загътам+.
25 Уымӕ гӕсгӕ ӕмвӕндӕй бауынаффӕ кодтам+ дыууӕ лӕджы равзарын ӕмӕ уӕм сӕ нӕ уарзон ӕфсымӕртӕ Варнавӕ ӕмӕ Павелимӕ+ арвитын –
26 уыдон дыууӕйӕ дӕр сӕ удтӕ* снывонд кодтой нӕ Хицау Йесо Чырыстийӕн*+.
27 Гъемӕ уӕм ӕрвитӕм Иудӕ ӕмӕ Силӕйы+, цӕмӕй уын, ацы фыстӕджы цы фыст ис, уыдӕттӕ дзургӕ дӕр ракӕной+.
28 Хуыцауы сыгъдӕг тыхы+ ӕххуысӕй мах ахӕм уынаффӕ рахастам, цӕмӕй уыл мӕнӕ ацы ӕнӕмӕнг хъуыддӕгтӕй уӕлдай ӕндӕр уаргъ+ мауал ӕвӕрӕм. Уынаффӕ рахастам, цӕмӕй
29 уӕхи хизат, мӕнгхуыцӕуттӕн+ цы снывонд кӕнынц, уыдӕттӕй, тугӕй+, хӕдмӕл фосы* дзидзайӕ+ ӕмӕ хӕтындзинадӕй+. Адӕттӕй уӕхи куы хъахъхъӕнат+, уӕд уыдзыстут фӕрнӕйдзаг. Дзӕбӕх ут!»
30 Уыйадыл сӕ арвыстой. Ӕмӕ Антиохимӕ куы ’рцыдысты, уӕд ахуыргӕнинӕгты се ’ппӕты дӕр ӕрӕмбырд кодтой ӕмӕ сӕм фыстӕг радтой+.
31 Фыстӕг куы бакастысты, уӕд бафидар сты ӕмӕ фӕцин кодтой+.
32 Иудӕ ӕмӕ Силӕ сӕхӕдӕг пехуымпартӕ+ уыдысты, ӕмӕ бирӕ раныхӕстӕй ӕфсымӕрты ныфсыл ныфс ӕфтыдтой ӕмӕ сӕ фидар кодтой+.
33 Уым иуцасдӕр фесты, стӕй сын ӕфсымӕртӕ фӕндараст загътой+, ӕмӕ уыдон фӕстӕмӕ Иерусалиммӕ аздӕхтысты.
34 * – –
35 Павел ӕмӕ Варнавӕ та баззадысты Антиохийы+ ӕмӕ адӕмы ахуыр кодтой ӕмӕ иннӕтимӕ хъусын кодтой хорз хабар, Йегъовӕйы ныхас+.
36 Цалдӕр боны фӕстӕ Павел Варнавӕйӕн загъта: «Цӕй, аздӕхӕм ӕмӕ, Йегъовӕйы ныхас цы горӕтты хъусын кодтам, уым ӕфсымӕрты бабӕрӕг кӕнӕм ӕмӕ, куыд сты, уый фенӕм»+.
37 Варнавӕ сфӕнд кодта, Марк+ кӕй хуыдтой, уыцы Иоанны дӕр акӕнын.
38 Фӕлӕ Павел разы нӕ уыд, цӕмӕй Марчы семӕ акодтаиккой, уымӕн ӕмӕ сӕ Марк Памфилийы+ ныууагъта ӕмӕ, цы хъуыддаджы фӕдыл ӕрвыст уыдысты, уый бакӕнынмӕ семӕ нӕ ацыди.
39 Гъемӕ афтӕ тынг фӕбыцӕу сты, ӕмӕ кӕрӕдзийӕ фӕхицӕн сты. Ӕмӕ Варнавӕ+ йемӕ Марчы акодта ӕмӕ науыл ацыди Кипрмӕ+.
40 Павел та равзӕрста Силӕйы+, ӕмӕ, ӕфсымӕртӕ Павелы Йегъовӕйы стыр хорзӕхыл куы бафӕдзӕхстой+, уӕд йӕ фӕндагыл араст.
41 Павел зылди Сири ӕмӕ Киликийы ӕмбырдтыл ӕмӕ сӕ фидар кодта+.
Фиппаинӕгтӕ
^ Кӕнӕ «сектӕйӕ».
^ Кӕнӕ «фӕбыцӕу кодтой».
^ Ома, йӕ туг, куыд ӕмбӕлы, афтӕ кӕмӕн нӕ рауагътой, ахӕм фос.
^ Кӕс Уӕлӕмх. 11.
^ Комк. «Чырыстийы номӕн».
^ Грекъ. психе́. Кӕс Уӕлӕмх. 6.
^ Кӕс 20 ст., фип.