Ɛzoanvolɛma Gyima 10:1-48
10 Ɛnee nrenyia bie wɔ Sizalia, bɛfɛlɛ ye Kɔnileɛse, ɔle sogya kpanyinli* wɔ ekpunli* ne mɔɔ bɛfɛlɛ ye Yetalea la anu.
2 Ɔsulo Nyamenle yɛɛ ɔ nee ye sua nu amra amuala sonle Nyamenle, ɔboa ehyiavolɛma na ɔbodo Nyamenle dahuu.
3 Kɛyɛ ewiazo dɔne nsa*+ ɔnwunle ye wienyi wɔ ɛnyelɛzodeɛnwunlɛ nu kɛ Nyamenle anwumabɔvolɛ ɛra ɔ nwo ɛkɛ ne na ɔse: “Kɔnileɛse!”
4 Kɔnileɛse nleanle ye koonwu, ɛzulolɛ hanle ye na ɔbizale kɛ: “Yɛmenle, duzu edwɛkɛ ɔ?” Ɔzele ye kɛ: “Nyamenle ɛde wɔ asɔneyɛlɛ na ɔkakye* ninyɛne mɔɔ ɛyɛ ɛboa ehyiavolɛma la.+
5 Yemɔti soa menli maa bɛhɔ Dwɔpa na bɛhɔvɛlɛ Saemɔn mɔɔ bɛfɛlɛ ye Pita la.
6 Nrenyia ɛhye ɛhɔzokoɛ Saemɔn mɔɔ yɛ nwoma nwo gyima na ye sua ne wɔ nyevile ne anloa la.”
7 Mɔɔ anwumabɔvolɛ ne mɔɔ nee ye dendɛle la hɔle ala la, ɔvɛlɛle ye ngɛkɛlɛ ne mɔ nwiɔ nee sogyanli bie mɔɔ sulo Nyamenle mɔɔ wɔ ye sonvolɛma ne anu la,
8 na ɔhanle debie biala ɔhilele bɛ na ɔzoanle bɛ wɔ Dwɔpa.
9 Aleɛ hyenle mɔɔ bɛlua adenle zo bɛlɛkɔ na ɔka ekyii bɛdwu suakpole ne azo la, Pita hɔle sua ne ati zo kɛyɛ ewiazo bulu nee nwiɔ* kɛ ɔkayɛ asɔne.
10 Noko ɛhɔne hunle ye kpole na ɛnee ɔkpondɛ debie yeali. Mekɛ mɔɔ bɛlɛto aleɛ ne la, ɔnwunle ɛnyelɛzodeɛnwunlɛ bie+
11 na ɔnwunle kɛ anwuma ɛbuke na bɛlɛdwula debie bie mɔɔ le kɛ lenen ɛdanlɛ kpole bie mɔɔ bɛsosɔ* ɔ nloa nna ne amuala anu la aze;
12 na nane ngakyile kɔsɔɔti nee azɛlɛ ye azo nane mɔɔ bɛtwenle bɛ nwo aze la yɛɛ anwomanyunlu nloma biala bie wɔ nu.
13 Akee ɛnelɛ bie zele ye kɛ: “Pita, dwazo ku bie di!”
14 Noko Pita zele kɛ: “Kyɛkyɛ Awulae, metɛdile debie mɔɔ nwolɛ ɛgua evinli na nwolɛ ɛnde la ɛlɛ.”+
15 Na ɛnelɛ ne dendɛle hilele ye fane nwiɔ ne azo kɛ: “Mmaka kɛ ninyɛne mɔɔ Nyamenle ɛde nwolɛ la anwo ɛgua evinli.”
16 Ɛhye zile fane nsa, na ɛkɛ ne ala bɛvale bɛhɔle anwuma.
17 Mekɛ mɔɔ ɛnee Pita ɛyɛ basaa wɔ mɔɔ ɛnyelɛzodeɛnwunlɛ ne mɔɔ ɔnwunle ye la kile anwo la, mekɛ ne anu ala a menli mɔɔ Kɔnileɛse zoanle bɛ la bizale ɛleka mɔɔ Saemɔn sua nu wɔ na bɛragyinlanle anlenkɛ ne anloa a.+
18 Bɛdeanle nu bɛbizale saa Saemɔn ne mɔɔ bɛfɛlɛ ye Pita la ɛrazokoɛ ɛkɛ a.
19 Mɔɔ Pita tɛdwenle ɛnyelɛzodeɛnwunlɛ ne anwo la, sunsum ne+ zele ye kɛ: “Nea! Menli nsa bie ɛlɛkpondɛ wɔ.
20 Ɔti siezie ɛ nwo na dwu aze na ɛ nee bɛ ɛhɔ, mmamaa wɔ adwenle nu yɛ wɔ kesee ɔluakɛ medame a mezoa bɛ a.”
21 Pita akee dwule aze hɔle menli ne anwo ɛkɛ na ɔhanle kɛ: “Ahenle mɔɔ bɛlɛkpondɛ ye la a le medame. Duzu a ɛmaa bɛra ɛke a?”
22 Bɛhanle kɛ: “Sogya kpanyinli Kɔnileɛse+ le tenlenenli yɛɛ ɔsulo Nyamenle, Dwuuma amuala bɔ ye duma kpalɛ. Nyamenle ɛzoa ye anwumabɔvolɛ nwuanzanwuanza yemaa yeraha yehile ye kɛ ɔzoa ɔmaa bɛravɛlɛ wɔ bɛrɛla ye sua nu na ɔdie mɔɔ ɛlɛ ye ɛka la.”
23 Ɔti ɔmaanle bɛrale sua nu na ɔzokoɛle bɛ wɔ ɛkɛ.
Aleɛ hyenle la ɔdwazole ɔ nee bɛ hɔle, na mediema mɔɔ wɔ Dwɔpa la bie mɔ nee ye hɔle.
24 Ye alehyenlɛ nu ɔhɔle Sizalia. Na ɛnee Kɔnileɛse ɛlɛkendɛ bɛ yemɔti ɔvɛlɛvɛlɛle ye mbusuafoɔ nee ɔ gɔnwo mɔ ɔmaanle bɛrayiale.
25 Mɔɔ Pita wolole ɛkɛ ne la, Kɔnileɛse hɔyiale ye, ɔdule ɔdɔle ɔ gyakɛ anu ɔzonlenle ye.*
26 Noko Pita maanle ye zo na ɔhanle kɛ: “Dwazo; medame noko mele sonla.”+
27 Mɔɔ ɔ nee ye ɛlɛtendɛ la, ɔhɔle sua nu ɛkɛ na ɔnwunle kɛ menli dɔɔnwo ɛrayia.
28 Ɔzele bɛ kɛ: “Bɛdabɛ bɛze ye wienyi kɛ mɛla ɛmmaa adenle kɛ Dwuunli nee awie mɔɔ ɔnle Dwuunli la kɛdu anzɛɛ ɔkɛbikye ye,+ noko Nyamenle ɛmaa menwu ye kɛ ɔnle kɛ mebu awie biala kɛ ɔ nwo ɛgua evinli anzɛɛ ɔ nwo ɛnde.+
29 Yemɔti a mekɛ mɔɔ bɛvɛlɛle me la, meandwenlehwenle me bo aze na mera a. Ɔti mebiza bɛ deɛmɔti bɛzoanle kɛ bɛravɛlɛ me la.”
30 Akee Kɔnileɛse hanle kɛ: “Ye kenle nna ɛne, kɛyɛ mekɛ zɛhae ala, ɛnee melɛyɛ asɔne wɔ me sua ye anu kɛyɛ ewiazo dɔne nsa;* ɛkɛ ne ala nrenyia bie mɔɔ wula tɛladeɛ fufule la ragyinlanle me nyunlu
31 na ɔhanle kɛ: ‘Kɔnileɛse, Nyamenle ɛde wɔ asɔneyɛlɛ na yehakye* ninyɛne mɔɔ ɛyɛ ɛboa ehyiavolɛma la.
32 Ɛhye ati soa maa bɛhɔvɛlɛ Saemɔn mɔɔ bɛfɛlɛ ye Pita la wɔ Dwɔpa. Nrenyia ɛhye ɛrazokoɛ Saemɔn mɔɔ yɛ nwoma nwo gyima la sua nu wɔ nyevile ne anloa.’+
33 Ɛkɛ ne ala, akee menzoanle kɛ bɛravɛlɛ wɔ na ɔle kpalɛ kɛ wɔra la. Yemɔti kɛkala yɛ muala yɛyia nu wɔ Nyamenle anyunlu na yɛtie mɔɔ Gyihova* ɛva ɛmaa wɔ kɛ ɛha ɛhile yɛ la amuala.”
34 Na Pita bɔle ɔ bo dendɛle na ɔhanle kɛ: “Akee mede ɔ bo bɔkɔɔ kɛ Nyamenle ɛnnea sonla nyunlu,+
35 na wɔ maanle biala anu awie biala mɔɔ sulo ye na ɔyɛ mɔɔ ɔle tenlene la, ɔdie ye ɔto nu.+
36 Ɔvale edwɛkɛ ne ɔhɔmaanle Yizilayɛma na ɔluale Gyisɛse Kelaese anwo zo ɔbɔle anzodwolɛ edwɛkpa ne nolo ɔhilele bɛ—yemɔ a ɔle menli kɔsɔɔti Awulae a.+
37 Bɛze mɔɔ bɛbɔle ɔ bo wɔ Galeli+ bɛhanle nwolɛ edwɛkɛ wɔ Dwudiya amuala wɔ mekɛ mɔɔ Dwɔn bɔle ɛzɔnenlɛ* nwo nolo wiele la:
38 ɔfale Gyisɛse mɔɔ vi Nazalɛte la anwo, Nyamenle vale sunsum nwuanzanwuanza kpokpale ye+ na ɔmaanle ye tumi, yemɔti ɔkpɔsale ɔyɛle ninyɛne mgbalɛ na ɔyɛle menli mɔɔ wɔ Abɔnsam tumi bo na bɛlɛnwu amaneɛ+ la kɔsɔɔti ayile, ɔluakɛ ɛnee Nyamenle nee ye lua.+
39 Na yɛdi ninyɛne mɔɔ ɔyɛle ye wɔ Dwuuma maanle ne anu nee Gyɛlusalɛm la kɔsɔɔti anwo daselɛ; noko bɛhendanle ye baka zo bɛhunle ye.
40 Nyamenle dwazole ye wɔ ye kenle nsa ne azo+ na ɔmaanle ɔyele ɔ nwo ɔhilele,*
41 yeammaa awie biala annwu ye kɛ yɛdayɛ mɔɔ yɛ nee ye lile, nlonle wɔ mekɛ mɔɔ ɔdwazole ɔvile mowuamra anu la.+ Nyamenle limoale kpale yɛ kɛ yɛnwu ye na yɛli ɔ nwo daselɛ.
42 Eza ɔhanle kɛ yɛha edwɛkɛ ne yɛhile menli ne na yɛli ɔ nwo daselɛ bɔkɔɔ+ kɛ yemɔ a Nyamenle ɛye ye kɛ ɔbua anyewɔzoamra nee mowuamra ndɛne a.+
43 Ngapezoma ne mɔ amuala di ɔ nwo daselɛ+ kɛ awie biala mɔɔ kɛlie ye kɛli la bɛbalua ye duma nu bɛava ye ɛtane bɛahyɛ ye.”+
44 Mɔɔ Pita anloa wɔ zo ɔlɛtendɛ la, sunsum nwuanzanwuanza ne rale menli mɔɔ ɛlɛtie ye la kɔsɔɔti anwo zo.+
45 Na ɔzinle diedima* mɔɔ bɛpɛ bɛ mrenyiazo mɔɔ bɛ nee Pita rale la anwo, ɔluakɛ bɛwolale sunsum nwuanzanwuanza ahyɛlɛdeɛ ne mɔɔ bɛfa bɛmaa mgbane la bɛguale maanle maanle ne anu amra noko anwo zo.
46 Ɔluakɛ bɛdele kɛ bɛlɛka aneɛ ngakyile na bɛlɛye Nyamenle ayɛlɛ.+ Na Pita hanle kɛ:
47 “Menli ɛhye mɔ ɛnyia sunsum nwuanzanwuanza kɛ yɛdayɛ la, asoo awie bahola aha kɛ ɔnle kɛ yɛfa nzule yɛsɔne bɛ ɔ?”+
48 Yemɔti ɔhanle kɛ bɛzɔne bɛ wɔ Gyisɛse Kelaese duma nu.+ Akee bɛzɛlɛle ye kɛ ɔdɛnla bɛ nwo ɛkɛ ne mekɛ ekyi.
Ɔbodwɛkɛ
^ Awie mɔɔ nea sogyama 100 anwo zo la.
^ Sogyama 600 a wɔ Wulomuma sogya ekpunli ko biala anu a.
^ Giliki aneɛ nu, kɛyɛ dɔnehwele ngɔnla ne azo.
^ Anzɛɛ “ɔnwu.”
^ Giliki aneɛ nu, kɛyɛ dɔnehwele nsia ne azo.
^ Anzɛɛ “bɛdedɛ.”
^ Anzɛɛ “ɔhotole ye.”
^ Giliki aneɛ nu, kɛyɛ dɔnehwele ngɔnla ne azo.
^ Anzɛɛ “yenwu.”
^ Anzɛɛ “ɛnlomanlɛ.”
^ Anzɛɛ “ɔmaanle bɛnwunle ye.”
^ Anzɛɛ “nɔhavoma.”
