IsAmbulo Esiya KuJwanisi 16:1-21
16 Ngezwa ilizwi elikhulu livela endaweni ecwengileko+ lithi eengilozini ezilikhomba: “Khambani, nithululele izitja ezilikhomba zelaka lakaZimu ephasini.”+
2 Yokuthoma yakhamba, yathululela isitja sayo ephasini.+ Iinlonda ezibuhlungu nezibhibhidlhako+ zehlela abantu abanetshwayo lesibandana+ nabalotjha umfanekiswaso.+
3 Yesibili yathululela isitja sayo elwandle.+ Laba njengeengazi+ zomuntu ofileko, zoke iimbunjwa* eziphilako elwandle+ zafa.
4 Yesithathu yathululela isitja sayo emilanjeni nemithonjeni yamanzi.+ Yaba ziingazi.+
5 Ngezwa ingilozi ebeyiphezu kwamanzi ithi: “Wena okhona nobekakhona,+ othembekileko,+ ulungile ngombana ukhuphe izahlulelwezi,+
6 ngebanga lokuthi bathulule iingazi zabacwengileko nabaphorofidi+ begodu ubaseze iingazi;+ lokho kubafanele.”+
7 Ngezwa i-aldara lithi: “Kwamambala, Jehova* Zimu, Mninimandla Woke,+ izahlulelo zakho ziliqiniso begodu zilungile.”+
8 Yesine yathululela isitja sayo elangeni,+ ilanga lanikelwa bona lirhabule abantu ngomlilo.
9 Abantu barhabulwa ngomtjhiso omkhulu kodwana bathuka igama lakaZimu, olawula iimbethwezi, akhenge batjhuguluke bamnikele iphazimulo.
10 Yesihlanu yathululela isitja sayo esihlalweni sobukhosi sesibandana. Umbuswaso waba mnyama,+ bathoma ukuluma amalimabo ngebanga leenhlungu
11 kodwana bathuka uZimu wezulwini ngebanga leenhlungu zabo neenlonda zabo, akhenge batjhuguluke emisebenzinabo.
12 Yesithandathu yathululela isitja sayo emlanjeni omkhulu iYufrathe,+ amanzawo oma+ bona kulungiselelwe amakhosi+ avela epumalanga indlela.
13 Ngabona amezwi amathathu aphefumulelweko* asilapheleko afana neenrhwarhwa aphuma emlonyeni wedragoni+ nemlonyeni wesibandana nemlonyeni wabaphorofidi bamala.
14 Eqinisweni, mamezwi aphefumulelwe madimoni, enza iimbonakaliso,+ ayaphuma atjhinge emakhosini wephasi loke bona awabuthelele ndawonye epini+ yelanga elikhulu lakaZimu uMninimandla Woke.+
15 “Qalani! Ngiza njengesela.+ Uyathaba ohlala aphapheme+ begodu ambethe izambatho zakhe zangaphandle bona angakhambi hlubule nabantu babone ihlazo lakhe.”+
16 Ababuthelela ndawonye endaweni ngesiHebheru ebizwa ngokuthi yi-Arimagedoni.*+
17 Yekhomba yathululela isitja sayo emoyeni. Khonokho kwazwakala ilizwi elikhulu endaweni ecwengileko+ livela esihlalweni sobukhosi, lithi: “Sekwenzekile!”
18 Kwaba nokuphazima kombani, amezwi nemidumo, kwaba nokusikinyeka kwephasi okukhulu okungakhenge khekwenzeke solo kwaba nomuntu ephasini,+ kwaba kusikinyeka kwephasi okunamandla nokukhulu khulu.
19 Idorobho elikhulu+ lahlukana laba ziingcenye ezintathu, kwawa amadorobho weentjhaba; iBhabhiloni eliKhulu+ lakhunjulwa phambi kwakaZimu bona alinikele ikapho yewayini yetukuthelo lelaka lakhe.+
20 Godu zoke iinhlengele zabaleka begodu iintaba akhenge zifumaneke.+
21 Nje-ke isinanja esikhulu, ngasinye esingalingana netalende,* sawela phezu kwabantu+ sivela ezulwini begodu abantu bathuka uZimu ngebanga lesibetho sesinanja+ ngombana isibethweso besisikhulu ngokurarako.
Imitlolo Ephasi
^ Namkha “imiphefumulo.”
^ NgesiGirigi, “imimoya esilapheleko.”
^ NgesiGirigi, yi-Har Ma·ge·don′. Igameli livela egameni lesiHebheru elitjho ukuthi “Intaba yeMegido.”
^ Italende lesiGirigi lilingana namakhilogremu ayi-20.4. Qala Isith. B14.
