TAMACHTILIS 2
¿Akoni Dios?
1. ¿Keyej moneki tikueyichiuaskej Dios?
Dios kichijchiuak nochi tein onkak. Yejuatsin nochipa nemi uan amo keman momikilis (Salmo 90:2). Yejuatsin kitemaka kuali tanauatilmej tein moajsij itech Biblia (1 Timoteo 1:11). Kemej Dios techmakak tonemilis, moneki tikueyichiuaskej sayoj yejuatsin. Xikonixtajtolti Apocalipsis 4:11.
2. ¿Keniuj tamati Dios?
Nion se taltikpaknenkej kiitani Dios porin yejuatsin se espíritu, nejin kijtosneki ke yejuatsin okachi ueyi uan amo kipia inakayo kemej taltikpakneminij (Juan 1:18; 4:24). Maski ijkon, keman tikitaj tein kichijchiuak ueli tikmatij keniuj tanemilia uan tein kimachilia. Kemej neskayot, tataman takilomej uan xochimej kinextiaj ke techtasojta uan tel tamatkej. Kemej chijchiujtok iluikak uan taltikpak kinextia iueyi chikaualis uan uelilis. Xikonixtajtolti Romanos 1:20.
No ueli okachi tikixmatij Dios ijkuak tikixtajtoltiaj Biblia. Nejin techiluia toni kiuelita uan toni amo kiuelita, keniuj mouika iniuan taltikpakneminij, uan toni kichiua keman yejuan kuali monejnemiltiaj oso keman kichiuaj tein amo kuali. Xikonixtajtolti Salmo 103:7-10.
3. ¿Kipia Dios se tokayit?
Jesús kijtoj: “ToTajtsin akin tiyetok iluikak, maj moueyitali motokay” (Mateo 6:9, Traducción del Nuevo Mundo de las Santas Escrituras [TNM]). Maski Dios moixmati ika miak tokaymej, kipia sayoj se tokayit tein iaxka. Itech sejse tajtol, moijtoua tataman. Ika náhuatl moijtoua Jiova. Sayoj ke oksekin kiixmatij kemej Yavé. Xikonixtajtolti Salmo 83:18.
Itech miak Biblias, kipatakej itokay Dios ika okseki tokaymej kemej toTajtsin oso Dios. Sayoj ke ijkuak moijkuiloj Biblia, miakpa ixnesia itokay Dios, kemej siete mil. Ijkuak Jesús kinmachtiaya taltikpakneminij akoni Dios, no kinixmatiltiaya itokay yejuatsin. Xikonixtajtolti Juan 17:26.
Xikonita video ¿Kipia Dios se tokayit?
4. ¿Toka motekipachoua Dios?
Ijkon kemej nejin tepopaj tetasojtakej, Dios kichiujtok miak taman tein satepan techualkuilis tein kuali
Axkan tel miakej tajyouiaj. ¿Kijtosneki nejon ke Jiova se Dios akin amo toka motekipachoua? Sekin kijtouaj ke techtajyouiltia porin ika techyejyekoua. Sayoj ke nejon amo melauak. Xikonixtajtolti Santiago 1:13, TNM.
Jiova techkaua maj tikixpejpenakan tein tikchiuaskej itech tonemilis. Yejua ika, okachi kuali maj tikixpejpenakan tiktekitiliskej, ta ijkon tiknextiskej ke iuan timotasojkamatij (Josué 24:15). Sayoj ke sekin kiixpejpenaj kinchiuiliskej oksekin tein amo kuali, yejua ika miakej tajyouiaj. Jiova kiyolkokoua kiitas ke mochiua tein amo kuali. Xikonixtajtolti Génesis 6:5, 6.
Jiova se Dios akin toka motekipachoua uan kineki maj tiyolpakikan itech tonemilis. Yejua ika, amo uejkaua kitamis tajyouilis uan akin tetajyouiltiaj. Axkan, onkak keyej yejuatsin kikaujtokok seki tonalmej maj onka tajyouilis. Itech tamachtilis 8 momelaua keyej. Xikonixtajtolti 2 Pedro 2:9, TNM, uan 3:7, 13.
5. ¿Keniuj uelis timotokiskej iuan Dios?
Jiova techyoleua maj iuan timotokikan ika netataujtil. Yejuatsin motekipachoua ika tisejsemej (1 Juan 5:14). Ika miak pakilis techtapojpoluia uan kiita ke timochikauaj tikyolpaktiskej maski kemansa timopolouaj. Maski titajtakouanij yekmelauj uelis kuali timouikaskej iuan. Xikonixtajtolti Salmo 103:12-14 uan Santiago 4:8.
Kemej Jiova techmaka tonemilis, moneki sayoj yejuatsin okachi tiktasojtaskej (Marcos 12:30). Tiknextiaj ke tiktasojtaj Dios keman timomachtiaj akoni yejuatsin uan tiktakamatij itanauatiluan. Komo ijkon tikchiuaj, okachi kuali timouikaskej iuan. Xikonixtajtolti 1 Timoteo 2:4 uan 1 Juan 5:3.
