Santiago 4:1-17
4 ¿Toni kichiua ximoteuikan uan ximopejpeualtikan? Tein kinejneki namonakayo uan kiixnamiki tein kuali tein nankinekij nankichiuaskej.
2 Namejuan nankinekij miak taman, sayoj ke amo nankipiaj. Nankisentokaj nantemiktiaj uan semi nankiixnejnekij tein teaxka,* sayoj ke amo ueli nankipiaj tein nankinekij. Nankisentokaj namopejpeualtiaj uan namoteuiaj. Amo nankipiaj porin amo nantajtanij.
3 Ijkuak kemaj nantajtanij, amo nankiseliaj, porin nantajtanij para nankichiuaskej tein amo kuali uan tein kinejneki namonakayo.
4 Namejuan akin nankikaujkej Dios,* ¿amo nankimatij ke komo nankiuelitaj* tein amo kuali tein oksekin kichiuaj nankiixnamiktokej Dios? Yejua ika, akin kineki kichiuas tein amo kuali kiixnamiktok Dios.
5 ¿Oso nankinemiliaj ke nenkaj kijtoua Tajkuilolamatsin: “Toyolo* kichiua maj titenexikoluikan* uan maj semi tiknejnekikan miak taman”?
6 Sayoj ke, tatiochiualis tein amo technamiki tein Dios technextilia okachi ueyi ke tein tiknejnekij. Yejua ika Tajkuilolamatsin kijtoua: “Dios kinixtopeua akin moueyimatij,* sayoj ke kinmaka itatiochiualis tein amo technamiki akin yolyemankej”.
7 Yejua ika, ximokauakan maj Dios namechixyekana, sayoj ke xikixnamikikan in Amokuali uan yejua namechcholuis.
8 Ximotokikan iuan Dios uan yejua motokis namouan. Ximomachipauakan namejuan akin nantajtakolchiuaj, uan ximoyolchipauakan namejuan akin amo nankimatij toni nankichiuaskej.
9 Ximotayokoltikan uan xichokakan. Amo xiueuetskakanok ta ximoyolkokokan uan amo xiyolpakikanok ta ximoteltekipachokan.
10 Ximoyolyemanikan iixpan Jehová* uan yejua namechueyitalis.
11 Nokniuan, amo xiksentokakan ximoijijtokan se iuan okse. Akin kijijtoua se tokniuj oso kijtouilia tein amo kuali iikniuj, kijijtoua tanauatil uan kijtoua ke amo kuali yetok tein kijtoua nejon tanauatil. Sayoj ke, komo tikijtoua ke amo kuali yetok tein kijtoua tanauatil, timochiujtok tijuez uan amo se akin kitakamati tanauatil.
12 Sayoj Dios kiixtalia tanauatilmej uan sayoj yejua Juez, akin ueli temakixtia uan teixpoloua. Sayoj ke, ¿toni tichiujkej tejua para tikijijtos mokniuj?
13 Axkan xikakikan namejuan akin nankijtouaj “Axkan oso mosta tiaskej itech ne ueyi xolal uan ompa timokauaskej se xiuit, titanamakaskej uan tiktaniskej tomin”,
14 sayoj ke nion nankimatij toni namechpanos mosta. Porin namejuan kemej yeskia se mixti tein tepitsin monextia uan niman ixpoliui.
15 Okachi kuali monekiskia nankijtoskej “Komo Jehová* kineki, tiyoltoskej uan tikchiuaskej nejin oso ne okse taman”.
16 Sayoj ke axkan namejuan namoueyimatij* uan namoselti namoueyitaliaj. Nejon semi amo kuali yetok.
17 Yejua ika, komo aksa* kimati kichiuas tein kuali sayoj ke amo kichiua, motajtakolmakatok.
Tajtolmelaualismej
^ Oso “nanxijxikuimej”.
^ Oso “Auilneminij”.
^ Oso “nankitasojtaj”.
^ Oso “Totanemilil”.
^ Oso “tiknekikan timoaxkatiliskej tein teaxka”.
^ Oso “moueyinekij”.
^ Oso “namoueyinekij”.
^ Oso “akin”, “akaj”.
