Romanos 1:1-32
1 Nejua Pablo, niitakeual Cristo Jesús. Yejua nechijitak* para nikchiuas tekit kemej tatitanil uan nechixtalij maj nikteixmatilti ikuali tajtoluan Dios.
2 Ne uejkaujya, Dios kiteixmatiltij itech iTajkuilolamatsin nejin kuali tanauatilmej* inintechkopa itanauatijkauan.*
3 Nejin kuali tanauatilmej ika tajtouaj iKoneuj Dios, akin yoliko itechkopa David.
4 Moyekita ke yejua nejin iKoneuj Dios, porin Dios ika ichikaualis kichiuak maj oksepa nemi (kemaj, toTekotsin Jesucristo,
5 akin itechkopa tikselijkej tatiochiualis tein amo technamiki. Jesús nechijitak* maj nikchiua tekit kemej tatitanil para maj nikinpaleui akin nemij itech nochin altepemej maj takuaujtamatikan, maj tatakamatikan uan maj kiueyitalikan itokay.
6 Namejuan no nanpouij itech altepemej kampa kinyoleujkej maj kitojtokakan Jesucristo).
7 Nejin amatajkuilol para nochin akin Dios kintasojta akin yetokej Roma, akin yejua kinnotsak maj iaxkauan:*
Maj toTajtsin Dios uan toTekotsin Jesucristo namechmakakan tatiochiualis tein amo technamiki uan maj namechpaleuikan kuali ximouikakan iuan Dios.
8 Achto nikneki namechiluis ke niktasojkamatilia noDios itokaykopa Jesucristo porin nantakuaujtamatij, porin itech nochi taltikpak kimatij ke semi nantakuaujtamatij.
9 Nejua niktekitilia Dios ika nochi noyolo uan nikteixmatiltia kuali tanauatilmej tein ika tajtouaj iKoneuj. Uan Dios kimati ke nochipa namechelnamiki keman nikchiua netataujtil,
10 uan nimotataujtia maj axkan kemaj namechkalpanoti, komo ueli uan Dios kineki.
11 Semi nikneki namechitas uan namechpaleuis okachi kuali ximouikakan iuan Dios para namechyolchikauas,
12 oso para maj timosenyolchikauakan se iuan okse porin titakuaujtamatij.
13 Nokniuan, nikneki xikmatikan ke miakpa nikixtalij namechitatiuj, sayoj ke hasta axkan ayamo niuelini. Niknekia nikitas keniuj tapaleuiani totanojnotsalis ompa, ijkon kemej mochiujtok itech okseki altepemej.
14 Nikita ke moneki nikinpaleuis* griegos uan akin amo griegos, tamatinij uan akin amo taixmatij.
15 Yejua ika, niktelnektok no namechixmatiltis kuali tanauatilmej namejuan akin nanyetokej Roma.
16 Porin amo nimopinaujmati nikteixmatiltis kuali tanauatilmej. Tein melauj, ika nejon Dios kinextia ichikaualis para kinmakixtis nochin akin takuaujtamatij, achto judíos uan no griegos.
17 Dios kinnextilijtok akin takuaujtamatij tein yejua kijtoua ke kuali yetok, uan nejin kichiua maj okachi takuaujtamatikan, ijkon kemej kijtoua Tajkuilolamatsin: “Sayoj ke akin yolmelauak nemis porin takuaujtamati”.
18 Ne iluikak, Dios kinualnextilijtok iueyi kualanyo akin amo kitakamatij uan akin kichiuaj tein tel amo kuali. Yejuan kichiuaj maj amo moixmati tein melauak.
19 Yejuan monekiskia kiixmatiskejya Dios, porin yejua kinnextilianiya miak taman.
20 Porin maski Dios amo ueli se kiita, desde keman kichijchiuak taltikpak ueli se kimati ke ichikaualis amo tami uan ke yejua yekmelauj Dios, uan nejon ueli se kiajsikamati ika tein kichijchiuak. Yejua ika, akin kijtouaj ke amo kineltokaj Dios, nion teyi ika ueli motenpaleuiaj.
21 Maski kiixmatiaj Dios, amo kiueyitalijkej nion kitasojkamatilijkej, porin peujkej amo kuatamatij uan amo teyi kiajsikamatij.
22 Maski kijtouaj ke tamattokej, tein melauj amo tamatij.
23 Yejuan amo kiueyitaliaj Dios akin amo ueli miki, ta kiueyitaliaj tein tamati kemej takat akin kemaj miki uan tein tamatij kemej totomej, tapialmej tein kipiaj naui ininmetsuan uan tein moxoxolatsaj.
24 Yejua ika, Dios kikauak maj kichiuakan tein pitsotik tein kiyolnemiliayaj, para maj kichiuakan tein tepinaujtij ika ininnakayo.
25 Yejuan kiixpatakej tein melauak tein iaxka Dios uan kineltokakej xolopijyot. Kiueyichiujkej uan kitekitilijkej tein Dios kichijchiuak uan amo Dios akin tachijchiuak, akin nochin moneki kiueyitaliskej nochipaya. Maj ijkon mochiua.*
26 Dios kinsenkauak uan kinkauak maj pitsotik auilnemikan kemej kinejnekiaj, porin siuamej amo kinekkejok motekaskej iniuan takamej, ta sayoj iniuan ininsiuaikniuan, uan Dios amo ijkon kiixtalij.
27 No ijkon takamej amo kinekkejok motekaskej iniuan siuamej, ta tel senka kinejnekkej motekaskej iniuan inintakaikniuan uan iniuan kichiujkej miak taman tein pitsotik. Yejua ika kintatsakuiltiskej kemej kinnamiki.
28 Kemej kinemilijkej ke amo monekia kiixmatiskej Dios, Dios kinkauak maj kisentokakan kinemilikan tein amo kuali, para maj kichiuakan tein amo monekia kichiuaskej.
29 Semi kinchiuiliayaj tein amo kuali oksekin, kichiuayaj tein tel pitsotik, semi kiixnejnekiaj tein teaxka* uan amo yolkualmej katkaj; semi tenexikoluiayaj,* temiktiayaj, tateuiayaj, takajkayauayaj uan semi kinekiaj kintajyouiltiskej oksekin; kintenkuitinemiaj* oksekin
30 uan tetakajkayauiliayaj; kitauelitayaj Dios; teuijuikaltiayaj,* moueyimatiaj* uan moueyichiuayaj ininselti; kinenemilijtinemiaj keniuj kichiuaskej tein amo kuali, amo kintakamatiaj inintatuan,
31 amo teyi kiajsikamatiaj, amo kinekiaj kichiuaskej tein motenkauayaj, amo tetasojtayaj uan amo teikneliayaj.
32 Uan axkan no moajsij akin kichiuaj kemej yejuan. Maski kuali kimatij ke Dios kijtoua ke akin kichiuaj nejon kinnamiki mikiskej, amo sayoj kisentokaj kichiuaj, ta no kinyolpaktia kiitaskej ke oksekin no kichiujtokej.
Tajtolmelaualismej
^ Oso “nechixpejpenak”.
^ Oso “tajtolmej”.
^ Xikonita tanauatijkej.
^ Oso “nechixpejpenak”.
^ Oso “chipaujkej iixpan”.
^ Itech griego, “nikintauikilia”.
^ Oso “Amén”.
^ Oso “katkaj xijxikuimej”.
^ Oso “kinekiaj moaxkatiliskej tein teaxka”.
^ Oso “kinijijtojtinemiaj”.
^ Oso “amo tetakachiuayaj”, “tetejtelchiuayaj”.
^ Oso “moueyinekiaj”.
