Marcos 12:1-44
-
Tekitinij akin temiktiaj (1-12)
-
Dios uan Tekiuaj (13-17)
-
Kitajtaniaj tein panos keman mikemej oksepa nemiskej (18-27)
-
Ome tanauatilmej tein okachi tayekantokej (28-34)
-
¿Cristo ikoneuj David? (35-37a)
-
Kiniluia maj amo kichiuakan kemej tajkuilouanij (37b-40)
-
Ome centavitos tein kipantalij se siuatsin (41-44)
12 Uan no peuak kintapouia miak taman. Kiniluij: “Se takat kitokak uvas uan kiyoualoj ika se tepamit. Uan no, tachkuak kampa kipatskaskiaj uvas, uan kichijchiuak se uejkapan kali. Satepan kinkauilij ika renta seki tekitinij uan yajki okse altepet.
2 Keman uvas yoksikajya, kititanik se itakeual kampa yetoyaj tekitinij maj kikuiti uvas tein monekia kimakaskej.
3 Sayoj ke yejuan kikitskijkej, kimagakej,* kitokakej uan amo teyi kimakakej.
4 Uan akin iaxka tal kintitanilij okse itakeual, uan yejua kikuakojkokojkej uan kiuijuikaltijkej.*
5 Satepan kititanik okse, uan kimiktijkej. Uan kintitanik miakejok; sekin kinmagakej* uan oksekin kinmiktijkej.
6 Sayoj poliuia kititanis seok: itasojkonetsin. Yejua ika kititanik, porin kijtouaya: ‘Kitakachiuaskej* nokoneuj’.
7 Sayoj ke tekitinij moiluijkej: ‘Yejua nejin akin kimakaskej nochin tal. Maj tikmiktikan; ijkon timokuiliskej nochi tein kimakaskiaj’.
8 Yejua ika kikitskijkej, kimiktijkej uan kikalantamotkej.
9 ¿Toni kichiuas akin iaxka tal? Ualas, kinmiktis tekitinij uan kinmakas italpan oksekin.
10 ¿Xe amo keman nankiitakej kampa ijkuiliujtok nejin: ‘Tet tein kalchiuanij kiixtopeujkej, yejua tein mochiuako ueyi tet tein kichikaua ome tepamit’?*
11 ¿Uan amo no nankiitakej ke ijkuiliujtok: ‘Nejin ualeuak imako Jehová* uan tejuan tikitaj ke semi kualtsin’?”.
12 Uan kemej akin kitauelitayaj kimatkej ke ininka tajtojtoya, kinekkej kikitskiskej, sayoj ke kinmouiliayaj akin ompa yetoyaj. Yejua ika kikaujkej uan yajkej.
13 Uan kititanilijkej seki fariseos uan seki itatojtokakauan Herodes maj kichiuatij maj kijto teisa tein amo kuali.
14 Keman ajsikej, yejuan kiluijkej: “Tamachtijkej, tikmatij ke nochipa tikijtoua tein melauak uan ke amo tiktemoua maj kuali mitsitakan oksekin, porin amo titechikoita, uan amo titakajkayaua keman titamachtia tein Dios kineki. ¿Kuali yetok maj se kiixtauili impuesto Tekiuaj,* oso amo?
15 ¿Moneki tikixtauaskej, oso amo moneki tikixtauaskej?”. Sayoj ke keman kiitak ke amo yekmelauj kinekiaj kimatiskej, kinnankilij: “¿Keyej nanechyejyekouaj? Xinechualkuilikan se denario* para maj nikita”.
16 Yejua ika kiualkuilijkej uan yejua kintajtanij:* “¿Akoni iixko nejin uan akoni itokay nikan ijkuiliujtok?”. Yejuan kinankilijkej: “Tekiuaj”.*
17 Uan Jesús kijtoj: “Xikmakakan Tekiuaj tein iaxka Tekiuaj, sayoj ke xikmakakan Dios tein iaxka Dios”. Uan yejuan semi kimojkakakkej tein kijtoj.
18 Uan ualajkej saduceos, akin kijtouaj ke mikemej amo oksepa nemiskej, uan kitajtanijkej:
19 “Tamachtijkej, Moisés techijkuilouilij ke komo se takat momikilia uan amo kinpiak ipiluan, iikniuj moneki monamiktis iuan icuñada, uan konemej tein kinpiaskej kinitaskej kemej ikoneuan akin momikilij.
20 Moajsiaj chikome iknimej. Akin tayekanaya monamiktij, sayoj ke momikilij uan amo kinpiak ipiluan.
21 Uan ojpatika monamiktij iuan icuñada, sayoj ke no momikilij uan amo kinpiak ipiluan; uan expatika no ijkon kipanok.
22 Uan nion semej nejon chikome iknimej kinpiak ipiluan. Satepan ke nochin momikilijkej, no momikilij siuatsin.
23 Keman mikemej oksepa nemiskej, ¿akoni yeski isiuatsin? Porin nochin chikome iuan monamiktijkaj”.
24 Jesús kinnankilij: “Namejuan namopolojtokej porin amo nankiixmatij Tajkuilolamatsin nion keniuj tekiti ichikaualis Dios.
25 Porin keman mikemej oksepa nemiskej,* takamej uan siuamej amo monamiktiskej, ta yeskij kemej ángeles.
26 Uan nankiitanij kampa ijkuiliujtok ke mikemej oksepa nemiskej. ¿Amo nankiitakej itech iamatajkuilol Moisés tein Dios kiluij itech kouit tein uitsyoj: ‘Nejua niiDios Abrahán, niiDios Isaac uan niiDios Jacob’?
27 Yejua amo ininDios mikemej, ta ininDios akin yoltokej. Namejuan semi namopolojtokej”.
28 Semej tajkuilouanij ompa yetoya uan kikakik tein ika tajtojtoyaj. Yejua ika, keman kikakik ke Jesús kuali kinnankilijka nejon takamej, kitajtanij: “¿Katiyejua tanauatil okachi tayekantok?”.
29 Jesús tanankilij: “Tein okachi tayekantok yejua nejin: ‘Xikakikan israelitas. Jehová* toDios sayoj se Jehová.*
30 Xiktasojta moDios Jehová* ika nochi moyolo, ika nochi monemilis, ika nochi motanemilil uan ika nochi mochikaualis’.
31 Uan ojpatika yejua nejin: ‘Xiktasojta moknitsin kemej tejua timotasojta’. Amo onkak nion se tanauatil tein okachi tayekantok ke nejin ome”.
32 Uan tajkuilojkej kiluij: “Tamachtijkej, kuali titanankilij, tikijtoj tein melauak: ‘Yejua sayoj setsin uan amo onkak okse’.
33 Uan se kitasojtas Dios ika nochi se iyolo, ika nochi se itanemilil* uan ika nochi se ichikaualis, uan se kitasojtas se iiknitsin kemej se motasojta, okachi tayekantok ke tein yeski taman tein se kimaktilia Dios”.*
34 Keman Jesús kiitak ke kuali tanankilijka, kiluij: “Amo uejka tietok para tikalakis itech iTaixyekanalis Dios”. Uan amo akinok moixeuij kitajtanis teisa.
35 Sayoj ke Jesús kisentokak tamachtij itech templo, uan tajtanik: “¿Keyej tajkuilouanij kijtouaj ke Cristo ikoneuj David?
36 Kemej ichikaualis Dios kiyekanak, David kijtoj: ‘Jehová* kiluij noTekotsin: “Ximotali noyekmakopa hasta maj nikintali mometstampa akin mitstauelitaj”’.
37 David kiluij noTekotsin; komo ijkon, ¿keniuj Cristo uelis yeski ikoneuj David?”.
Uan semi miakej kikaktoyaj ika pakilis.
38 Keman tamachtijtoya, kiniluij: “Amo xikchiuakan kemej tajkuilouanij akin kiuelitaj nentinemiskej ika ininueyak tasal uan maj kintajpalojtokan itech plazas,
39 uan kiuelitaj motaliskej hasta taixpan* kampa taueyichiuaj judíos uan itech se tatakualis kiuelitaj motaliskej kampa motaliaj uejueyi chiuanimej.
40 Kinkuiliaj tein ininaxka* siuatsitsin akin momikilijya inintakatsin, uan kemej kinekij maj oksekin kinitakan, uejkauaj kichiujtokej netataujtil. Yejuan okachi kintatsakuiltiskej ke oksekin”.
41 Uan motalij kampa moitayaj kaxomej kampa kipantaliaj tomin itech templo, uan peuak kiita keniuj kipantaliayaj tomin; miakej tominpianij kipantaliayaj miak tomin.
42 Uan ualaj se siuatsin pobre akin momikilijkaya itakatsin uan kipantalij ome centavitos.*
43 Yejua kinnotsak imomachtijkauan uan kiniluij: “Namechyekiluia ke nejin siuatsin pobre kipantalij itech kaxomej okachi ke oksekin.
44 Porin nochin yejuan kitemakaj tein amo kikuijok; sayoj ke siuatsin maski semi pobre, kipantalij nochi, nochi tein ika moixpanoltiskia”.
Tajtolmelaualismej
^ Oso “kiuitekkej”.
^ Oso “kitejtelchiujkej”.
^ Oso “kinuitekkej”.
^ Oso “Kipoujkaitaskej”.
^ Oso “tepanchikaualoni”.
^ Itech griego, “César”.
^ Itech griego, “César”.
^ Oso “kintajtoltij”.
^ Itech griego, “moajokuiskej”.
^ Itech griego, “se itaajsikamatilis”.
^ Oso “tapialmej uan okseki taman tein kichichinouaj”.
^ Oso “kampa okachi kualtsin”.
^ Itech griego, “ininchan”.
^ Itech griego, “ome leptones”. Nejin se cuadrante, tomin tein aksa kitania kemej itech 10 minutos.
