Santiago 1:1-27
1 Nejua Santiago, niitakeual Dios uan toTekotsin Jesucristo, namechtajpaloua namejuan akin nanpouij itech 12 uejueyi kalyetonij tein namoyaujtokej noyampa:*
2 Nokniuan, semi xiyolpakikan keman nankiixnamiktoskej* tataman ouijkayomej,
3 porin keman nankiixnamikij nejon ouijkayomej uan nankinextiaj ke yekmelauj nantakuaujtamatij, nankimatijya keniuj nantaxikoskej.
4 Sayoj ke moneki nantaxikoskej itech nochi,* uan ijkon amo teyi namechpolos uan nochi kuali nankichiuaskej.
5 Yejua ika, komo aksa* kinemilia ke amo semi tamatkej, maj kisentoka kitajtani Dios, uan yejua kipaleuis maj tamatkej, porin yejua kintelpaleuia nochin ika nochi iyolo uan amo kualani iniuan akin kitajtaniaj.
6 Sayoj ke maj kisentoka tajtani uan maj takuaujtamati, porin akin amo kiyekneltoka ke kiselis tein tajtani tamati kemej at itech ueyiat tein ejekat kitatamota nikan uan nepa.
7 Tein melauj, akin ijkon kichiua maj amo kinemili ke Jehová* kimakas teisa.
8 Porin sayoj motanemililpapata uan kipapata nochi tein kichiua.
9 Sayoj ke tokniuj akin pobre* maj yolpaki porin kiueyitalijkej,
10 uan akin tominpia maj yolpaki porin kichiujkej kemej se akin amo ueyichiujkej, porin akin tominpia ixpoliuis kemej se xochit tein yetok xiujtaj.
11 Porin keman tonaltsin kisa uan peua chikauak tona, xiuit kuetaui uan uetsi ixochiyo, uan amo kualtsinok moita. No ijkon ixpoliuis akin tominpia porin semi kitemoua tomin.
12 Yolpaki akin kisentoka taxikoua keman kiixnamiktok se ouijkayot,* porin keman kitamixikoua, Jehová* kichiuas maj nemi, nejon yeski itaxtauil* tein motenkauak kinmakas akin kisentokaj kitasojtaj.
13 Maj amo akin kijto keman kiixnamiktos se ouijkayot: “Dios nechyejyekojtok”. Porin amo akin ueli kichiualtia Dios tein amo kuali nion Dios kichiua maj se kipia ouijkayomej.
14 Ta sejse kiixnamiki se ouijkayot keman tein kinejneki kiyoltilana uan kitanejnektia.*
15 Uan keman mochikaua tein kinejneki, kichiua maj tajtako,* uan yejua ika miki.
16 Nokniuantsitsin, amo ximokajkayauakan.
17 Nochi tatiochiualismej tein kuali uan tein amo teyi kinpoloua ualeuaj ne ajko, imako akin kichijchiuak nochi tein tauia ne iluikak. Yejua amo mopata kemej yekauil mopapata.
18 Kiixtalij techyolitis keman tikneltokakej itajtol tein melauak. Uan maski kinchijchiuak miakej, tejuan akin yekinika techijitak.*
19 Nokniuantsitsin, nikneki xikmatikan ke nochin moneki niman nantekakiskej, amo niman nantajtoskej uan nion niman nantelkualaniskej,
20 porin komo se tel kualani amo se kichiua tein Dios kiita ke kuali yetok.
21 Yejua ika, ximokixtilikan nochi tein pitsotik uan tein amo kuali tein namotech yetokok, xiyolnejmachmej uan xikauakan maj kemej yeskia monaluayoti itech namoyolo itajtol Dios tein uelis namechmakixtis.
22 Sayoj ke, xikchiuakan tein kijtoua itajtol Dios uan amo sayoj xikakikan, porin komo amo nankichiuaj sayoj namokajkayaujtoskiaj.
23 Porin komo aksa kikaki itajtol Dios sayoj ke amo kichiua, tamati kemej akin moixita itech se teskat:
24 moixita uan keman youi, niman kielkaua keniuj moitaya.
25 Porin tanauatil amo teyi kipoloua uan techpaleuia maj amo timoajsikan temako. Uan akin kiita ika nejmachkayot nejon tanauatil uan kisentoka kitakamati, amo sayoj kikaki uan kielkaua, ta kichiua tekit tein moneki. Yejua yolpakis itech nochi tein kichiuas.
26 Komo aksa kinemilia ke kiueyichiua Dios* sayoj ke amo kitsakuilia inenepil, moyolkajkayaujtok uan nenkajsan taueyichiua.
27 ToTajtsin Dios kiita ke taueyichiualis* tein chipauak uan amo pitsotik yejua nejin: maj se kinpaleui akin amo kipiaj inintatuan* uan siuatsitsin akin momikilijya inintakatsin keman tajyouijtoskej, uan maj amo tikauakan maj techpitsotili kemej nemij akin amo tatakamatij.
Tajtolmelaualismej
^ Oso “nanxintokej noyampa (nouian)”.
^ Oso “namechyejyekojtoskej ika”.
^ Oso “maj taxikolis kitamichiua itekiuj namotech”.
^ Oso “akin”, “akaj”.
^ Oso “akin amo ueyichiujkej”.
^ Oso “tayejyekolis”.
^ Oso “kimakas inemilis kemej se corona”.
^ Oso “kitsikoua”.
^ Oso “kemej yeskia yoli tajtakol”.
^ Oso “techixpejpenak”.
^ Oso “taneltoka”.
^ Oso “taneltokalis”.
^ Oso “iknotsitsin”, “mikakaualmej”.
