1 Juan 5:1-21
5 Akin kineltokaj ke Jesús yejua Cristo, yejuan ikoneuan Dios. Uan akin kitasojtaj toTajtsin, no kintasojtaj ikoneuan.
2 Komo tiktasojtaj Dios uan tiktakamatij itanauatiluan, tikmatij ke no tikintasojtaj ikoneuan Dios.
3 Porin yejua nejin tein kijtosneki tiktasojtaskej Dios: maj tiktakamatikan itanauatiluan; uan itanauatiluan amo ouij se kitakamatis,
4 porin nochin ikoneuan Dios kixijxikouaj* tein amo kuali tein onkak nikan taltikpak. Uan kemej titakuaujtamatij, nejin techpaleuiani maj titatanikan.
5 ¿Akoni uelis kitanis tein amo kuali tein onkak nikan taltikpak? ¿Melauj ke yejua akin kineltoka ke Jesús iKoneuj Dios?
6 Jesucristo ualaj ika at uan esti; amo sayoj ika at, ta ika at uan esti. Uan Dios ika ichikaualis kiyeknextia nejin, porin ika ichikaualis kitematiltia tein melauak.
7 Porin onkak eyi taman tein kinextia akoni Jesús:
8 ichikaualis Dios, at uan esti, uan nejin eyi taman kinextiaj sayoj se taman.
9 Tejuan tikneltokaj tein oksekin kiteixmatiltiaj, sayoj ke tein Dios kiteixmatiltia okachi kuali, porin yejua kijtoua akoni iKoneuj.
10 Akin takuaujtamati itech iKoneuj Dios, kiuika itech iyolo tein Dios kimachtij. Akin amo kineltokilia Dios, kemej yeskia kijtojtok ke yejua se xolopij, porin amo kineltoka tein Dios kiteixmatiltij de iKoneuj.
11 Uan yejua nejin tein kiteixmatiltij: Dios kichiuak maj tinemikan nochipaya itechkopa iKoneuj.
12 Akin poui iuan iKoneuj Dios kichia nemis nochipaya; akin amo poui iuan iKoneuj Dios amo uelis nemis nochipaya.
13 Namechijkuilouilia nejin namejuan akin itech nantakuaujtamatij* iKoneuj Dios, para xikmatikan ke nanemiskej nochipaya.
14 Uan tikyekmatij nejin: ke uelis tiktajtaniskej nochi, uan komo yejua tein Dios kineki yejua techkaki.
15 Uan komo tikmatij ke yejua techkaki keman tiktajtaniaj tein yeski, tikmatij ke tikpiaskej tein titajtanij porin tiktajtanijkej yejua.
16 Komo aksa* kiita iikniuj kichiujtok se tajtakol tein amo ika se miki, maj kitataujti Dios maj kipaleui, uan Dios kichiuas maj nemi. Nejin sayoj kinpaleuia akin amo kichiujtokej se tajtakol tein ika se miki. Sayoj se tajtakol kichiua maj se miki. Uan amo akin nikiluia maj kitataujti Dios maj kipaleui akin kichiujtok nejon tajtakol.
17 Nochi tein amo kuali yetok, ipa tajtakol. Sayoj ke onkak se tajtakol tein amo kichiua maj se miki.
18 Tikmatij ke ikoneuan Dios amo tajtakolchiuaj, ta iKoneuj Dios kinyekpia, uan Amokuali amo teyi ueli kinchiuilia.*
19 Tikmatij ke tejuan Dios techixyekana, sayoj ke nochi in taltikpak moajsi imako in Amokuali.
20 Uan tikmatij ke iKoneuj Dios ualajya, uan techpaleuij maj tiyektanemilikan para tikixmatiskej akin yekmelauj Dios. Uan iuan tipouij itechkopa iKoneuj, Jesucristo. Yejua yekmelauj Dios uan akin kichiua maj tinemikan nochipaya.
21 Nokoneuantsitsin, ximoyekpiakan para amo nankiueyichiuaskej tein kiueyichiuaj nikan taltikpak.
Tajtolmelaualismej
^ Oso “kitanij”.
^ Itech griego, “nantakuaujtamatij itech itokay”.
^ Oso “akin”, “akaj”.
^ Oso “amo ueli kinkitskia”.
