Juan 4:1-54
4 ToTekotsin kimatik ke fariseos kitekakilijkaj ke yejua* kinpiaya okachi imomachtijkauan uan kinauijtoya okachi miakej ke Juan.
2 (Jesús amo teauiaya, ta imomachtijkauan).
3 Yejua ika kisak de Judea uan oksepa yajki Galilea.
4 Sayoj ke monekia panos Samariajkopa.
5 Yejua ika ajsik itech se ueyi xolal tein monotsa Sicar, tein poui Samaria, uan ompaka yetoya tal tein Jacob kimakaka ikoneuj, José.
6 Tein melauj, ompa yetoya iameyal* Jacob. Jesús sioujtoya porin ojtokaka, uan tokotsyetoya inakastan nejon ameyal. Katka kemej nepantaj.*
7 Uan se siuatsin akin kayot Samaria kikixtiko at. Jesús kiluij: “Xinechmaka tepitsin at”.
8 (Imomachtijkauan yajkaj ueyi xolal kikouatoj tein kikuaskiaj).
9 Sayoj ke siuatsin kitajtanij:* “¿Keyej tinechtajtania at, ta tejua tijudío uan nejua nikayot Samaria?”. (Porin judíos amo mouikaj iniuan akin kayomej Samaria).
10 Jesús kinankilij: “Komo tikmatiskia tein Dios mitstayokolia uan tikmatiskia akoni mitsiluijtok ‘Xinechmaka tepitsin at’, tejua tiktajtaniskia at yejua, uan yejua mitsmakaskia at tein kichiua maj se nemi”.
11 Siuatsin kiluij: “Tejuatsin, nion tikpia toni ika tikixtis at, uan ameyal semi uejkatan. ¿Kani tikuiti nejon at tein kichiua maj se nemi?
12 ¿Xe okachi tiueyichiujkej ke touejkaujtat Jacob? Yejua techkauilij nejin ameyal, kampa atikej yejua, ikoneuan uan itapialuan”.
13 Jesús kinankilij: “Akin tayis nejin at, oksepa amikis.
14 Akin tayis at tein nejua nikmakas, amo keman amikisok. Porin at tein nejua nikmakas, itech mochiuas kemej se ameyal tein mextos* para kichiuas maj nemi nochipaya”.
15 Siuatsin kiluij: “Tejuatsin, xinechmaka nejon at, para maj amo oksepa niamiki nion maj niuaualajto nikan nikixtiki at”.
16 Yejua kiluij: “Xiknotsati motakatsin uan oksepa xiuiki nikan”.
17 Siuatsin kinankilij: “Amo nikpia notakatsin”. Jesús kiluij: “Melauak keman tikijtoj ke amo tikpia motakatsin,
18 porin tikinpiakya makuilimej, uan takat akin axkan iuan tinemi amo motakatsin. Tein tikijtoj melauak”.
19 Siuatsin kiluij: “Tejuatsin, nikita ke titanauatijkej.*
20 Touejkaujtatuan kiueyichiuayaj Dios itech nejin tepet, sayoj ke namejuan nankijtouaj ke moneki se kiueyichiuatiuj ompa Jerusalén”.
21 Jesús kiluij: “Siuatsin, yekmelauj nimitsiluia: ejkos tonal keman nion itech nejin tepet nion ompa Jerusalén nankiueyichiuaskej toTajtsin.
22 Namejuan nankiueyichiuaj tein amo nankiixmatij; tejuan tikueyichiuaj tein tikixmatij, porin judíos yejuan akin yekinika kimatkej keniuj Dios temakixtis.
23 Sayoj ke ejkos hora, uan tein melauj ejkokya, keman akin yekmelauj kiueyichiuaj toTajtsin kiueyichiuaskej porin Dios kinyekanas ika ichikaualis* uan porin kiixmatiskej tein melauak. Porin toTajtsin kintemojtok akin ijkon kinekij kiueyichiuaskej.
24 Dios amo moita uan yetok ne iluikak,* uan akin kiueyichiuaj moneki kiueyichiuaskej porin Dios kinyekana ika ichikaualis uan porin kiixmatij tein melauak”.
25 Siuatsin kiluij: “Nejua nikmati ke ualas Mesías, akin kiluiaj Cristo. Keman yejua ualas, techmelauilis nochi”.
26 Jesús kinankilij: “Nejua nejon takat akin mouan tajtojtok”.
27 Nejon hora ejkokej imomachtijkauan uan kisenitakej porin yejua tajtojtoya iuan se siuatsin. Sayoj ke nion se kitajtanij “¿Toni tikneki?” oso “¿Keyej iuan titajtojtok?”.
28 Uan siuatsin kikaujteuak itsotsokol tein ika atakuia uan yajki ueyi xolal kiniluito oksekin:
29 “Xiualakan uan xikitakan se takat akin nechiluij nochi tein nikchiuani. ¿Amo yeski yejua Cristo?”.
30 Uan yejuan kiskej den ueyi xolal uan kiitatoj.
31 Achto ke ejkoskiaj, imomachtijkauan miakpa kiluiayaj: “Tamachtijkej,* xikmajseua teisa”.
32 Sayoj ke yejua kiniluij: “Nejua nikpia takual, uan namejuan amo nankimatij toni”.
33 Yejua ika imomachtijkauan moiluiayaj: “Amo akaj kiualkuilij takual, ¿melauj?”.
34 Jesús kiniluij: “Notakual yejua nejin: maj nikchiua tein kineki akin nechualtitanik uan maj niktamichiua tekit tein nechmakak.
35 ¿Amo nankijtouaj namejuan ke poliuiok naui metsti para kisentiliskej tatok? Xikakikan tein namechiluia: ximoixajokuikan uan xikitakan, tatok chikauayakya,* uelisya se kisentilis.
36 Akin kisentilia tatok kitaxtauijtokejya uan kisentilijtokya takilot. In takilot yejuan akin nemiskej nochipaya. Ijkon, akin tatoka uan akin kisentilia tatok uelis senyolpakiskej.
37 Porin ijkon mochiua tein moijtoua “Se akin tatoka uan okse kisentilia tatok”.
38 Nejua namechtitanik xiktekitij tein amo nankitokkej. Sekin chikauak tekitikej; uan tekit tein kichiujkej yejuan, namechpaleuij”.
39 Miakej akin kayomej Samaria itech takuaujtamatkej Jesús keman nejon siuatsin kiyekijtoj: “Nechiluij nochi tein nikchiuani”.
40 Yejua ika, keman kiitatoj Jesús, kiluijkej maj iniuan mokauani, uan yejua mokauak ome tonal ompa.
41 Uan keman kikakkej tein tamachtiaya, okachi miakej itech taneltokakej,
42 uan kiluijkej siuatsin: “Amo titaneltokajok sayoj ika tein tejua titechtapouij. Tejuan tikakkejya uan tikmatij ke yekmelauj yejua akin techmakixtis”.
43 Keman panok nejon ome tonal, kisak de ompa uan yajki Galilea.
44 (Jesús kijtoj ke se tanauatijkej amo kitakachiuaj* kampa kayot).
45 Keman ajsik Galilea, akin ompa kayomej kuali kiselijkej, porin yejuan no yajkaj iluit uan kiitakaj nochi tein yejua kichiujka ompa Jerusalén keman mochiujtoya iluit.
46 Jesús oksepa yajki Caná tein poui Galilea, kampa kichiujka maj at mokepa vino. Uan se itekitikauj tekiuaj kipiaya se iokichpil akin mokokouaya ompa Capernaúm.
47 Keman yejua kimatik ke Jesús ualeujka de Judea uan ajsika Galilea, kiitato uan kiluito maj temo maj kipajtiti iokichpil, porin xikaujtoyaya.*
48 Sayoj ke Jesús kiluij: “Namejuan amo keman nantaneltokaskej komo amo nankiitaj milagros uan uejueyi taman tein se kimojkaita”.
49 Nejon takat kiluij: “NoTekotsin, nouan xitemo achto ke nookichpiltsin momikilis”.
50 Jesús kiluij: “Ximokepa mochan, porin mookichpil pajtikya”. Nejon takat kineltokak tein Jesús kiluij uan yajki.
51 Uan keman temotiaya ichan, itakeualuan kinamikitoj uan kiluijkej ke iokichpil pajtikaya.
52 Yejua kintajtanij toni hora peuak nenkenti. Uan yejuan kinankilijkej: “Totonik kikauak yalua kemej se hora tiotak”.*
53 Ijkuak, nejon takat kiitak ke nejon hora Jesús kiluijka “Mookichpil pajtikya”. Uan yejua uan nochin akin nemiaj ichan taneltokakej.
54 Yejua nejin ojpatika milagro tein Jesús kichiuak satepan ke mokepak de Judea uan yajki Galilea.
Tajtolmelaualismej
^ Itech griego, “Jesús”.
^ Oso “iamel”.
^ Itech griego, “chikuasentika hora”.
^ Oso “kitajtoltij”.
^ Oso “ixuatos”.
^ Xikonita tanauatijkej.
^ Tajtol griego, pnéuma. Xikonita chikaualis.
^ Oso “Dios kemej yeskia se ejekat”. Tajtol griego, pnéuma. Xikonita chikaualis.
^ Itech griego, “Rabí”.
^ Itech griego, “istakya”.
^ Oso “amo kipoujkaitaj”.
^ Oso “momikilijtoyaya”.
^ Itech griego, “chikometika hora”.
