एक चांगला नातेसंबंध जोडण्यासाठी मित्र एकमेकांशी संवाद साधत असतात. त्याच प्रकारे, देव आपल्याला त्याच्यासोबत संवाद साधण्याचं उत्तेजन देऊन जणू काय मैत्रीचा हात पुढं करतो. तो म्हणतो: “तुम्ही माझा धावा कराल, तुम्ही जाऊन माझी प्रार्थना कराल व मी तुमचे ऐकेन.” (यिर्मया २९:१२) जसजसं तुम्ही प्रार्थनेत देवाशी बोलाल, तसतसं तुम्ही देवाजवळ याल आणि तोसुद्धा तुमच्या जवळ येईल. (याकोब ४:८) बायबलमध्ये असं आश्वासन दिलं आहे: “जे कोणी त्याचा धावा करतात . . . त्या सर्वांना परमेश्वर जवळ आहे.” (स्तोत्र १४५:१८) आपण त्याला जितकी प्रार्थना करत राहू, तितकी त्याच्यासोबतची आपली मैत्री बहरत जाईल.

येशूनं म्हटलं: “आपल्या मुलाने भाकर मागितली तर त्याला धोंडा देईल आणि मासा मागितला तर त्याला साप देईल, असा तुमच्यात कोण माणूस आहे? . . . आपल्या मुलांबाळांना चांगल्या देणग्या देणे तुम्हाला समजते, तर तुमच्या स्वर्गातील पित्याजवळ जे मागतात त्यांना तो किती विशेषकरून चांगल्या देणग्या देईल?” (मत्तय ७:९-११) देव तुम्हाला प्रार्थना करण्यास सांगतो कारण तो “तुमची काळजी घेतो” आणि त्याला तुमची मदत करायची आहे. (१ पेत्र ५:७) तुमच्या काही समस्या असतील तर तुम्ही त्याच्याकडं मन मोकळं करावं, असंही तो सांगतो. बायबलमध्ये म्हटलं आहे: “कशाविषयीही चिंताक्रांत होऊ नका तर सर्व गोष्टींविषयी प्रार्थना व विनंती करून आभारप्रदर्शनासह आपली मागणी देवाला कळवा.”—फिलिप्पैकर ४:६.

मानव स्वभावाचा अभ्यास करणाऱ्या तज्ज्ञांच्या लक्षात आलं आहे, की कोट्यवधी लोकांना प्रार्थना करण्याची गरज भासते. या लोकांमध्ये नास्तिक आणि अज्ञेयवादी (देवाच्या अस्तित्वाबद्दल निश्‍चित मत नसणारी व्यक्ती) व्यक्तींचासुद्धा समावेश आहे. * हे या गोष्टीचा पुरावा देते, की मानवांना देवासोबत मैत्री जोडण्याच्या इच्छेसह निर्माण करण्यात आलं होतं. ही इच्छा ओळखणारी व्यक्ती “धन्य” आहे असं येशूनं म्हटलं. (मत्तय ५:३) देवासोबत नेहमी संवाद साधून आपण ही इच्छा पूर्ण करत असतो.

आपण देवाला प्रार्थना केली तर आपल्याला काय फायदा होऊ शकतो? (w15-E 10/01)