ശരിയോ? തെറ്റോ? നമ്മളെല്ലാം നേരിടുന്ന ഒരു ചോദ്യം
പുതിയ ഒരു സ്ഥലത്തേക്കു നിങ്ങൾ ആദ്യമായി യാത്ര ചെയ്യുന്നെന്നിരിക്കട്ടെ. നിങ്ങൾ എന്തു ചെയ്യും?
1. നിങ്ങൾക്കു തോന്നുന്ന ഒരു വഴിയേ പോകും.
2. മറ്റുള്ളവർക്കു വഴി അറിയാമെന്ന ചിന്തയോടെ അവരുടെ പുറകേ പോകും.
3. ജിപിഎസ്സ്‌-ഓ ഭൂപടമോ നോക്കുകയോ വഴി അറിയാവുന്ന ഒരാളോടു സഹായം ചോദിക്കുകയോ ചെയ്യും.
ഒന്നാമത്തെയോ രണ്ടാമത്തെയോ രീതി തിരഞ്ഞെടുത്താലും നമ്മൾ എവിടെയെങ്കിലും എത്തുമെന്നുള്ളതു ശരിയാണ്‌. പക്ഷേ ഉദ്ദേശിച്ച സ്ഥലത്ത്‌ ആയിരിക്കണമെന്നില്ല. എന്നാൽ മൂന്നാമത്തെ രീതിയാണു തിരഞ്ഞെടുക്കുന്നതെങ്കിൽ ലക്ഷ്യസ്ഥാനത്ത്‌ എത്തുമെന്നു നമുക്ക്‌ ഉറപ്പായും പ്രതീക്ഷിക്കാം.
നമ്മുടെ ജീവിതം ഒരു യാത്രപോലെയാണ്‌; സന്തോഷം നിറഞ്ഞ ഒരു ഭാവിയിലേക്കു നയിക്കുമെന്നു നമ്മൾ പ്രതീക്ഷിക്കുന്ന ഒരു യാത്ര. എന്നാൽ നമ്മൾ അവിടെ എത്തുമോ ഇല്ലയോ എന്നത്‌, തീരുമാനങ്ങളെടുക്കുമ്പോൾ സഹായത്തിനായി നമ്മൾ എങ്ങോട്ടു നോക്കുന്നു എന്നതിനെ ആശ്രയിച്ചിരിക്കും.
നമ്മളെടുക്കുന്ന മിക്ക തീരുമാനങ്ങളും വളരെ ചെറുതായിരിക്കാം. പക്ഷേ ചിലതു വളരെ പ്രാധാന്യമുള്ളവയാണ്‌. ആ തീരുമാനങ്ങൾ ശരിയും തെറ്റും സംബന്ധിച്ച നമ്മുടെ കാഴ്‌ചപ്പാട്‌ എന്താണെന്നു തെളിയിക്കും. നമ്മൾ എടുക്കുന്ന ആ തീരുമാനങ്ങൾ നമ്മളെയും നമ്മുടെ പ്രിയപ്പെട്ടവരെയും നല്ല രീതിയിലോ മോശമായ രീതിയിലോ ബാധിക്കും. പിൻവരുന്ന കാര്യങ്ങളിലായിരിക്കാം പലപ്പോഴും നമുക്ക്‌ അത്തരം തീരുമാനങ്ങളെടുക്കേണ്ടിവരുന്നത്‌:
ലൈംഗികതയും വിവാഹവും
സത്യസന്ധത, ജോലി, പണം
മക്കളെ എങ്ങനെ വളർത്തണം
മറ്റുള്ളവരോട്‌ എങ്ങനെ പെരുമാറണം
നിങ്ങൾ എടുക്കുന്ന തീരുമാനങ്ങൾ നിങ്ങൾക്കും കുടുംബത്തിനും നല്ലൊരു ഭാവി കൊണ്ടുവരുമെന്നു നിങ്ങൾക്ക്‌ എങ്ങനെ ഉറപ്പോടെ പറയാനാകും?
നമ്മുടെ ഓരോരുത്തരുടെയും മുന്നിലുള്ള ചോദ്യം ഇതാണ്‌: ശരിയും തെറ്റും സംബന്ധിച്ച്‌ ശരിയായ തീരുമാനമെടുക്കാൻ എന്നെ എന്തായിരിക്കും സഹായിക്കുക?
ശരിയും തെറ്റും സംബന്ധിച്ച്‌ തീരുമാനമെടുക്കുന്ന കാര്യത്തിൽ ബൈബിൾ ആശ്രയിക്കാവുന്ന ഒരു വഴികാട്ടിയായിരിക്കുന്നത്‌ എന്തുകൊണ്ടെന്നും അതു നിങ്ങളെ എങ്ങനെ സഹായിക്കുമെന്നും ഈ മാസിക വിശദീകരിക്കും.
