Jehova naaere antũ nthĩgũrũ. Nĩyo nja yeetũ. Kwou, muntũmũrũme na muntũmũka wa mbere Adamu na Hawa, batoombĩrwe batũũra ĩgũrũ nĩkwĩthĩrwa Mũrungu noombĩte araika batũũrage ĩgũrũ. (Ayubu 38:4, 7) Ĩndĩ, Mũrungu naajũkĩrie muntũ wa mbere aramwĩĩka ndeene ya paradiso ĩnthongi yeetagwa muunda jwa Edeni. (Kiambiriria 2:15-17) Jehova naaere Adamu, na nciarwa ciawe wĩrĩgĩĩro bwa kũgwĩrĩrua ũtũũro bũtĩna mũthia nthĩgũrũne.—Thooma Zaburi 37:29; 115:16.

Kĩambĩrĩriene, paradiso yaarĩ muunda jwa Edeni akĩ. Aciari beetũ ba mbere baarĩ baciarane boojũrie nthĩ. Nyumeene, barĩngĩkũthegea na kũũjũria nthĩgũrũ yonthe na kũmĩeethia paradiso. (Kiambiriria 1:28) Gũtĩrĩo nthĩgũrũ ĩkorothirua. Ĩgatũũra ĩrĩ nja ya antũ magiita jonthe.—Thooma Zaburi 104:5.

Adamu na Hawa nĩbaaregere kwathĩkĩra Mũrungu, tontũ bũũ Jehova arabeenga muundeene jwa Edeni. Paradiso nĩyaũrĩre, na gũtĩ muntũ woomba kũmĩcookia kaĩrĩ. Bibiria yugaga ũjũ: “Nthiguru yeejani njarene cia uria mui.”—Ayubu 9:24.—Thooma Kiambiriria 3:23, 24.

Jehova rĩ, naatiganĩre na mworoto jwawe jwa mbere kĩrĩ antũ? Arĩ! Nĩwe mweneinya yonthe. Gũtĩ ũntũ bũũmba kũmũrema. (Isaya 45:18) Agacookia antũ bakare o ũrĩa eendaga.—Thooma Zaburi 37:11, 34.

Paradiso ĩgacookua nthĩgũrũne waathanine bwa Jesũ arĩ Mũnene ũrĩa ũtaari nĩ Mũrungu. Ndweene ĩrĩa ĩĩtagwa Amagedoni, Jesũ agatongeeria araĩka ba Mũrungu kũthiria  bonthe barĩa bareganaga na Mũrungu. Jesũ agacooka athaĩke Shaitani mĩaka 1,000. Antũ ba Mũrungu bakoonoka kũthirua kũu tontũ Jesũ akabatongeeria na abakarie. Bakagwĩrĩrua ũtũũro bwa kenya na kenya Paradiso nthĩgũrũne.—Thooma Kugwurirwa 20:1-3; 21:3, 4.

Nĩrĩ Mũrungu akathiria moothũũku nthĩgũrũne? Jesu naaejanĩre “rwano” rwa kwonania rĩrĩa mũthiro jũkeethĩrwa jũrĩ akuĩ. Mantũ jarĩa jarĩ nthĩgũrũne naarua, jatũmĩte mũtũũrĩre jwa antũ jwĩthĩrwa na ũgwati, jakĩonanagia atĩ tũrĩ ntukũ cia “muthiro jwa nthiguru.”—Thooma Mathayo 24:3, 7-14, 21, 22.

Waathanine bwa Jesũ bwa mĩaka 1,000 akĩathaga nthĩgũrũ arĩ ĩgũrũ, akathiria mĩthangĩko yonthe buru. (Isaya 9:6, 7; 11:9) Nkũrũki ya kwĩthĩrwa arĩ Mũnene, Jesũ agatumĩka arĩ Mũthĩnjĩri Ũmũnene wa Mũrungu na akaangũra meeyia ja antũ barĩa beendete Mũrungu. Kwou, gũkũrũkĩĩra Jesũ, Mũrungu akathiria mĩrimo, ũkũrũ, na gĩkuũ.—Thooma Isaya 25:8; 33:24.

Antũ barĩa baathĩkagĩra Mũrungu bagatũũra Paradiso. (1 Johana 2:17) Jesũ aatũmĩre athingati baawe gũcwaa antũ ba ũkiri, babaritane ũrĩa boomba gwĩtĩkĩrĩka kĩrĩ Mũrungu. Jehova nakũthuranĩra antũ mirioni inyiingĩ nandĩ, nĩkenda beeja gũtũũra Paradiso nthĩgũrũne ĩgiita rĩĩjĩte. (Zefania 2:3) Kũrĩa Akũũjĩ ba Jehova bacemanagia, antũ nĩbairitanaga kwaa akũrũ na ekũrũ babeega na aciari babeega nkũrũki. Aciari na aana nĩbathaathagia amwe na kwiritana ũrĩa boomba gũteetheka nĩ nkuma ĩnjega.—Thooma Mika 4:1-4.