Ũnene bwa Mũrungu nĩ thirikarĩ ĩrĩa ĩrĩ ĩgũrũ. Ũnene bũu bũkajũkia kaanya ka thirikarĩ irĩa ikwathana nandĩ, na bũtũme wendi bwa Mũrungu bũthithue ĩgũrũ na nthĩgũrũne. Nkuma ya Ũnene bwa Mũrungu nĩ ĩnjega. Kagiita gatĩ kũraaja, Ũnene bwa Mũrungu bũkaingĩria antũ ũbatu bwa kwĩthĩrwa na thirikarĩ ĩnjega. Bũkareta ngwatanĩro kĩrĩ antũ bonthe nthĩgũrũne.—Thooma Danieli 2:44; Mathayo 6:9, 10; 24:14.

Ũnene, no mwanka bwĩthĩrwe na mũnene. Jehova aathuurĩre Mũtaana waawe Jesũ Kristũ, ae Mũnene wa Ũnene Bwawe.—Thooma Kugwurirwa 11:15.

Mũtaana wa Mũrungu nĩwe ũkwagĩra kwaa Mũnene tontũ arĩ kĩao na nathithagia mantũ na njĩra ya waagĩru. (Johana 1:14) Kinya arĩna inya ya gũteethia antũ, tontũ akaatha nthĩgũrũ arĩ ĩgũrũ. Nyuma ya kũriũkua, naaitĩrie ĩgũrũ araeteera akarĩte nthĩ njarene ya ũrio ya Jehova. (Ahibirania 10:12, 13) Mũthiene, Mũrungu naamweere ũnene na arambĩrĩria kwathana.—Thooma Danieli 7:13, 14.

Gĩkundi gĩĩtagwa “baria atheru” gĩkaathana ĩgũrũ amwe na Jesũ. (Danieli 7:27) Atheru ba mbere kũthuurwa, baarĩ atũmwa ba Jesũ eetĩkua. Jehova nethĩrĩtwe akĩthuura arũme na aka eetĩkua bae atheru mwanka nandĩ. Kinya bo bariũkagua na mwĩrĩ jwa kĩrũndu o ta ũrĩa Jesũ aariũkĩrue.—Thooma Johana 14:1-3; 1 Akorintho 15:42-44.

 Nĩ antũ bang’ana betaga ĩgũrũ? Jesũ aabetĩre “kooriithi kaniini.” (Luka 12:32) Na mũthiene bagakinya 144,000. Bakaatha nthĩgũrũ amwe na Jesũ.—Thooma Kugwurirwa 14:1.

Ũnene bwa Mũrungu bwambĩrĩĩrie kwathana mwaka jwa 1914. * Ũntũ bwa mbere bũrĩa Jesũ aathithĩrie arĩkwaa Mũnene, nĩ kwarũkia Nkoma amwe na araĩka baawe nthĩgũrũne. Shaitani arathũũra mono na araambĩrĩĩria kũreta mathĩĩna jamaingĩ nthĩgũrũne yonthe. (Kugwurirwa 12:7-10, 12) Kuuma ĩgiita rĩu mĩnyamaaro niingĩĩte nthĩgũrũne. Ndwaa, mpara, mĩrimo ĩmĩĩ na ithingithia bia nthĩ nĩ bimwe bia “kimenyithia” kĩrĩa gĩkwonania Ũnene bwa Mũrungu bũrĩ akuĩ kwatha nthĩgũrũ yonthe.—Thooma Luka 21:7, 10, 11, 31.

Gũkũrũkĩĩra ngũgĩ ya gũtũmĩĩria nthĩgũrũne yonthe, Ũnene bwa Mũrungu nĩbũgwatithanĩtie ntundu ĩnene ya antũ, kuuma nthĩ cionthe. Antũ ba ũkiri mirioni inyiingĩ nĩbagwĩtĩkĩra kwathwa nĩ Jesũ. Ũnene bwa Mũrungu bũkabakaria rĩrĩa bũkathiria mũtaratara jũmũthũũku jwa mantũ jarĩa jarĩ nthĩgũrũne. Kwou, bonthe barĩa bakwenda gũteetheka nĩ Ũnene bwa Mũrungu no mwanka bairitane kwaa raia bakwathĩkĩra Jesũ.—Thooma Kugwurirwa 7:9, 14, 16, 17.

Kagiitene ka miaka 1,000, Ũnene bwa Mũrungu bũkoojũria mworoto jwa Mũrungu jwa mbere kĩrĩ antũ. Nthĩgũrũ yonthe ĩgatwĩka paradiso. Mũthiene, Jesũ agacookeria Ĩthe Ũnene bwawe. (1 Akorintho 15:24-26) Kũrĩ muntũ wiijĩ ũũmba kwĩra nkuma ĩjĩ ya Ũnene bwa Mũrungu?—Thooma Zaburi 37:10, 11, 29.